ޔަހޫދީ ފައުޖުން ހުޅަނގު އައްސޭރީގެ ރަށްތަކަށް އަރައި ހިންގި ޢުދުވާންތަކަކަށް ފަހު ފަލަސްޠީން ރައްޔިތުންގެ 2.5 މިލިޔަން ޑޮލަރު ފޭރިގަނެފިއެވެ. މި ޢުދުވާނުގެ ތެރެއިން ޔަހޫދީ ފައުޖުން ވަނީ ހުޅަނގު އައްސޭރީގެ ރަށްތަކުގައި ހުންނަ ފައިސާގެ މުޢާމަލާތް ހިންގާ އެކްސްޗޭންޖް ފިހާރަތަކަށް ރޭޑު ޖަހާފައެވެ. އަދި، އެ ތަންތަނުގައި ރައްކާކޮށްފައި ހުރި ހުރިހާ ފައިސާއެއް ފޭރިގަނެފައެވެ.
ފަލަސްޠީނުގެ މަރުކަޒީ ބެންކުން ބުނީ ޚަލީލާއި، ޙަލްޙޫލާއި، ނާބުލުސްއާއި، ޖިނީނާއި، ޠުލްކަރްމާއި އަލް-ބީރާގެ އިތުރުން އަރީޙާއާއި ރާމަاللهގައި ހުންނަ އެކްސްޗޭންޖް ފިހާރަތަކަށް ޔަހޫދީ ފައުޖުން ރޭޑު ޖަހާފައިވާ ކަމުގައެވެ. މި ރޭޑުތަކުގެ ތެރެއިން ހިނގި ކުރިމަތިލުންތަކުގައި ފަލަސްޠީނުގެ އެކަކު ޝަހީދު ކޮށްލާފައިވާއިރު، ގިނަ ޢަދަދެއްގެ ބަޔަކު ޒަޚަމު ކޮށްލާފައިވާ ކަން ވެސް ފާހަގަ ކޮށްލަން ޖެހެއެވެ.
ޔަހޫދީ ފައުޖުން ހުޅަނގު އައްސޭރީގެ ރަށްތަކަށް އަރާފައި ވަނީ ބަރުހަތިޔާރާ އެކުގައެވެ. އަދި، ކަރުނަގޭސް ޖަހައި މަގުތައް ބަންދު ކުރުމަށް ފަހު، އެކްސްޗޭންޖް ފިހާރަތަކަށް ރޭޑު ޖަހާފައިވާ ކަމުގައި މަންޒަރު ފެނުނު މީހުން ބުނެއެވެ. "ޔަހޫދީ ފައުޖުން ވަނީ އެކްސްޗޭންޖް ފިހާރަތަކާއި ކުންފުނިތަކުގެ މުވައްޒަފުން ހައްޔަރު ކޮށްފައި. އަދި، އެ ތަންތަނުގައި ހުރި ތިޖޫރީތައް ފަޅައިލާ، އޭގައި ހުރި ފައިސާތައް ފޭރިގަނެފައި. މިއީ، ބައިނަލްއަޤުވާމީ ޤާނޫނުތަކާ ޚިލާފަށް ހިންގާފައިވާ އަމަލެއް،" ފަލަސްޠީނުގެ މަރުކަޒީ ބޭންކުން ބުންޏެވެ.
ފާއިތުވި މަސްތަކުގެ ތެރޭގައި ހުޅަނގު އައްސޭރިއާއި ބައިތުލްމަޤްދިސްގައި ދިރިއުޅޭ ފަލަސްޠީނުގެ ރައްޔިތުންގޭ ހާލަތު ދަށު ދަރަޖައަކަށް ވައްޓައިލާފައިވާ ކަމުގައި އދގެ އިންސާނީ ޙައްޤުތަކާ ބެހޭ އިދާރާގެ އިސްވެރިޔާ ފޮލްކަރ ތުރްކު ވިދާޅުވިއެވެ. "ޔަހޫދީ ފައުޖުން ދަނީ ޢާންމު ރައްޔިތުންނާ ދެކޮޅަށް ބޭނުން ކުރުން މަނާ ހަތިޔާރާއި އުކުޅުތައް ބޭނުން ކުރަމުން. އަދި ހާލާތާ ނުބައްދަލު ބާރުގެ ބޭނުން ކުރަމުން. މިއީ ވަރަށް ކަންބޮޑުވާ މައްސަލައެއް،" ތުރްކު ވިދާޅުވިއެވެ.
ފަލަސްޠީނުގެ މަދަނީ ޖަމުޢިއްޔާތަކުން ބުނީ ޔަހޫދީންގެ ޢުދުވާނުގައި ފަލަސްޠީނުގެ 25 މީހުން ހައްޔަރު ކޮށްގެން ގެންގޮސްފައިވާ ކަމުގައެވެ. މެދުއިރުމަތީގެ މަސްރަޙު ދިރާސާކުރާ މީހެއް ކަމުގައިވާ އެމެރިކަން ޔުނިވަރސިޓީ އޮފް ބެއިރޫތުގެ ފެލޯ ރާމީ ޚޫރީ ވިދާޅުވީ ޔަހޫދީ ފައުޖުގެ މި ފަދަ ރޭޑުތަކުގެ ބޭނުމަކީ ހުޅަނގު އައްސޭރީގެ މުސްލިމުން ޔަހޫދީންނާ ދެކޮޅަށް ހަތިޔާރު އުފުލުމަށް ހުރަސް އެޅުން ކަމުގައެވެ.
ނަމަވެސް، މެދުއިރުމަތީގެ މަސްރަޙު ދިރާސާކުރާ އެހެން ފަރާތެއް ކަމުގައިވާ މުޢީން ރައްބާނީގެ ޚިޔާލު ތަފާތެވެ. އޭނާ ވިދާޅުވީ، ޔަހޫދީ ފައުޖުގެ ބޭނުމަކީ ފަލަސްޠީނުގެ ހުރިހާ ބިންތަކަކަށް ވެރިވެގަތުން ކަމުގައެވެ. އަދި، މި ވަގުުތު ޣައްޒާގެ މުސްލިމުންނާ ދެކޮޅަށް ހިންގަމުންދާ ފަދަ ލާއިންސާނީ ޢުދުވާނެއް ހުޅަނގު އައްސޭރީގައި ވެސް ހިންގޭނީ، ހުޅަނގު އައްސޭރީގައި ހަރަކާތްތެރިވާ މުޖާހިދުންގެ ޖަމާޢަތްތައް ރުޅިވަރުވައިގެން ކަމުގައި އޭނާ ވިދާޅުވިއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 21,000 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 55,000 އަށް އަރާފައެވެ. ނަމަވެސް، ޣައްޒާގެ ގިނަ ހޮސްޕިޓަލްތައް ސުންނާފަތި ކޮށްލާފައިވުމުގެ ސަބަބުން އެ މީހުންނަށް ޞިއްޙީ ފަރުވާ ފޯރުކޮށްދެވޭނެ ގޮތެއް ނެތެވެ.