ލައިބީރިޔާގެ މެދުއުތުރުގައި އޮންނަ ރަށެއްގައި ހިނގި މަގުމަތީގެ އެކްސިޑެންޓެއްގައި ފުރޮޅައިލި ތެޔޮ އުފުލާ ލޮރީއެއް ގޮވައި 40 މީހުން މަރުވެއްޖެއެވެ. މި ޙާދިޘާ ހިނގާފައި ވަނީ ވެރިރަށް މޮންރޯވިޔާއާ 130 ކިލޯމީޓަރު ދުރުގައި އޮންނަ ލޮވަރ ބޮޮންގް ކައުންޓީގެ ރަށެއް ކަމުގައިވާ ޓޯޓޯޓާގައެވެ.
ލައިބީރިޔާގެ ޞިއްޙީ ވުޒާރާގެ އިސްވެރިއެއް ކަމުގައިވާ ފްރާންސިސް ކާޓަރ ވިދާޅުވީ ލޮރީގައި އަލިފާންރޯވެ އެ އުޅަނދު ގޮވި ވަގުތު އެ ސަރަޙައްދުގައި ތިބި ގިނަ ޢަދަދެއްގެ ބަޔަކު މަރުވެފައިވާ ކަމުގައެވެ. އޭގެ ތެރެއިން ގިނަ ބަޔަކު މަރުވީ ފިހިގެން ކަމަށާއި، މި ހާދިސާގައި މަރުވެފައިވާ މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ. މި ޙާދިޘާގައި ގިނަ ޢަދަދެއްގެ ބަޔަކު ޒަޚަމުވިއެވެ.
ލައިބީރިޔާގެ ޤައުމީ ފުލުހުންގެ އިދާރާގެ އިންސްޕެކްޓަރ-ޖެނެރަލްގެ ނައިބު ޕްރިންސް ބީ. މަލްބާ ވިދާޅުވީ މި ޙާދިޘާގައި ފިހިފައިވާ މީހުންގެ ފުރިހަމަ ޢަދަދު އަދިވެސް ކަށަވަރު ނުވާ ކަމުގައެވެ. މި ޙާދިޘާގައި އެހާ ގިނަ ޢަދަދެއްގެ ބަޔަކު މަރުވެފައި ވަނީ، ލޮރީ ފުރޮޅައިލުމުން އެ އުޅަނދުގެ ޓޭންކުން ލީކުވާން ފެށި ތެޔޮ ނެގުމަށް ގިނަ ޢަދަދެއްގެ ބަޔަކު އެތަނަށް ޖަމާވުމެވެ. އަދި، ތެޔޮތައް ނެގުމަށް ބައެއް މީހުން އުޅަނދުގެ ޓޭންކުގައި ދަގަނޑު އާލާތްތަކުން ތަޅާފައިވާ ކަމުގައި ވެސް ފުލުހުން ބުނެއެވެ.
އދގެ ތަފާސްހިސާބުތަކަށް ބަލައިލާއިރު، ލައިބީރިޔާއަކީ މަގުމަތީގެ އެކްސިޑެންޓުތައް ގިނަ ޤައުމެކެވެ. އަދި، މި ފަދަ އެކްސިޑެންޓުތަކުގައި މަރުވާ މީހުންގެ ޢަދަދު ގިނަ ޤައުމެއް ކަމުގައި ވެސް އދން ބުނެއެވެ. ވިލާތުގެ ޤައުމުތަކާ އަޅައިބަލާއިރު، ލައިބީރިޔާގައި ހިނގާ މި ފަދަ ނުރައްކާތެރި އެކްސިޑެންޓުތަކުގައި މަރުވާ މީހުންގެ ޢަދަދު ތިން ގުނަ އިތުރު ކަމަށް ތަފާސްހިސާބުތަކުން ދައްކައެވެ.