ޖަޕާނުން ޔޫކްރެއިނަށް ޕެޓްރިއަޓް މަރުކާގެ ވައިގެ ދިފާޢީ މިސައިލްތަކެއް ފޯރުކޮށްދޭން ތައްޔާރުވަމުންދާ ކަމުގެ އަޑުތަކެއް ފެތުރުމާ ގުޅިގެން ރަޝިޔާއިން އެ ކަމާ ނުރުހުންވެ އިންޒާރު ދީފިއެވެ. ރަޝިޔާގެ ޚާރިޖީ ވުޒާރާއިން ބުނީ، ޖަޕާނުން ޔޫކްރެއިނަށް ވައިގެ ދިފާޢީ މިސައިލް ފޯރުކޮށްދީފި ނަމަ، ރަޝިޔާއާއި ޖަޕާނާ ދެމެދު އޮތް ގުޅުމަށް ނުރަނގަޅު އަސަރެއް ކުރާނެ ކަމުގައެވެ. ރަޝިޔާގެ އިންޒާރުތައް ޖަޕާނަށް އަމާޒު ކޮށްފައި ވަނީ ރަޝިޔާ-ޔޫކްރެއިން ހަނގުރާމައާ ގުޅިގެން ރަޝިޔާއާއި ޖަޕާނާ ދެމެދު އޮތް ގުޅުން ހީނަރުވެފައިވާ ދަނޑިވަޅެއްގައެވެ.
ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމަައާ ގުޅިގެން ހުޅަނގުގެ ބާރުތަކުން ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކުގައި ޖަޕާނުން ވެސް ވަނީ ބައިވެރިވެފައެވެ. މި ކަމާ ގުޅިގެން ރަޝިޔާއާއި ޖަޕާނުގެ ގުޅުންތައް ވަނީ ހީނަރުވެފައެވެ.
ޖަޕާނުގެ ހަތިޔާރު ވިއްކުމާ ގުޅޭ ޤަވާޢިދު އިސްލާޙުކޮށް، ޕެޓްރިއަޓް އެއަރ ޑިފެންސް މިސައިލުތަކެއް އެމެރިކާއަށް ވިއްކަން ނިންމާފައިވާ ކަން ޖަޕާނުން ހާމަ ކޮށްފައި ވަނީ ހުސްވި ހަފުތާގައެވެ. މިއީ، ފާއިތުވި ނުވަ އަހަރުގެ ތެރޭގައި ޖަޕާނުން އެ ޤައުމުގެ ހަތިޔާރު ވިއްކުމާ ގުޅޭ ޤަވާޢިދު އިސްލާޙު ކުރާ ފުރަތަމަ ފަހަރެވެ. ޖަޕާނުން ސީދާ ޔޫކްރެއިނަށް ހަތިޔާރު ފޯރުކޮށްނުދިން ނަމަވެސް، އެމެރިކާއަށް ހަތިޔާރު ފޯރުކޮށްދީފި ނަމަ، އެމެރިކާއިން އެ ތަކެތި ޔޫކްރެއިނަށް ފޯރުކޮށްދޭނެ ކަމަށް ބެލެވެއެވެ.
"ޖަޕާނުން އެމެރިކާއަށް މިސައިލްތައް ވިއްކައިފި ނަމަ، އެމެރިކާއިން އެ ތަކެތި ޔޫކްރެއިނަށް ފޯރުކޮށްދޭނެ ކަމާ މެދު ސުވާލެއް ނުއުފެދޭ،" މި ކަމާ ގުޅޭ ގޮތުން ވާހަކަފުޅު ދައްކަވަމުން ރަޝިޔާގެ ޚާރިޖީ ވުޒާރާގެ ތަރުޖަމާނު މަރިޔާ ޒަޚަރްވާ ވިދާޅުވިއެވެ. އަދި، އެއީ ރަޝިޔާއާ ދެކޮޅަށް ހިންގާ ޢަމަލެއްގެ ގޮތުގައި ދެކޭނެ ކަމަށާއި، އެއާއެކު ރަޝިޔާ-ޖަޕާން ގުޅުމަށް ނުރަނގަޅު އަސަރުތަކެއް ކުރާނެ ކަމުގައި ވެސް އޭނާ ވިދާޅުވިއެވެ.
ދާދިފަހުން ރަޝިޔާއާއި ޗައިނާ ގުޅިގެން ހިންގި އަސްކަރީ ތަމްރީނުތަކަކާ ގުޅިގެން ވެސް ރަޝިޔާއާއި ޖަޕާނާ ދެމެދު ބަހުގެ ޙަމަލަތަކެއް ބަދަލުކޮށްފައިވެއެވެ. އަދި، ރަޝިޔާއާއި ޗައިނާގެ އަސްކަރީ މަތިންދާބޯޓުތައް ޙަރަކާތްތެރިވަމުން ދިޔަ ސަރަޙައްދަކަށް ޖަޕާނުގެ އިތުރުން ދެކުނު ކޮރެޔާއިން ވެސް ވަނީ އެ ޤައުމުތަކުގެ އަސްކަރީ މަތިންދާބޯޓުތައް ފޮނުވާފައެވެ. ރަޝިޔާއާއި ޗައިނާގެ އަސްކަރީ ތަމްރީނުތައް ހިންގާފައި ވަނީ ޖަޕާނާއި ދެކުނު ކޮރެޔާގެ ސަރަޙައްދު ކައިރީގައި ކަން ފާހަގަ ކޮށްލަން ޖެހެއެވެ.