އިންޑޮނޭޝިޔާއަށް ހިޖުރަކުރުމަށް ރޮހިންޔާ ރެފިއުޖީން ދަތުރުކުރަމުންދިޔަ ލަކުޑި ބޯޓެއް އެ ޤައުމަށް އެތެރެވިޔަނުދީ ފައްސާލައިފިއެވެ.
އިންޑޮނޭޝިޔާގެ ކަނޑުގެ ސިފައިން ބުނެފައިވަނީ އެ ބޯޓު ދަތުރުކުރަމުންދިޔައީ އަޗޭގެ އައްސޭރިފަށާ ދިމާލަށެވެ. ނަމަވެސް އިންޑޮނޭޝިޔާގެ މަނަވަރެއް އެ ސަރަޙައްދަށް ގޮސް އެ ބޯޓު އެ ޤައުމުގެ ކަނޑުގެ ސަރަޙައްދުން ބޭރުކޮށްލާފައިވާ ކަމަށް އެ ޤައުމުގެ ކަނޑުގެ ސިފައިން ބުނެފައިވެއެވެ. އެ ބޯޓުގައި ތިބި ރޮހިންޔާ ރެފިއުޖީންގެ ޢަދަދެއް ކަށަވަރުކުރެވިފައެއް ނުވެއެވެ. އަދި އެ މީހުން ފައްސާލުމުން ދަތުރުގެ މިސްރާބު ބަދަލުކުރި ގޮތެއް ވެސް ސާފެއް ނުވެއެވެ.
އދގެ އެފިއުޖީންނާ ބެހޭ އިދާރާއިން ބުނެފައިވަނީ މިދިޔަ ނޮވެންބަރު މަހުގެ ފަހުން 1،500 ރޮހިންޔާ ރެފިއުޖީން އިންޑޮނޭޝިޔާއަށް ހިޖުރަކޮށްފައިވާ ކަމަށެވެ. ގިނަ ޢަދަދެއްގެ ރޮހިންޔާ ރެފިއުޖީން އިންޑޮނޭޝިޔާއަށް ހިޖުރަކުރަން ފެށުމުން އެ ޤައުމުގެ ޢާންމުން ވަނީ ނުރުހުން ފާޅުކޮށްފައެވެ. އަދި ފާއިތުވި ދުވަސްތަކުގައި ރޮހިންޔާ ރެފިއުޖީން ތިބޭ ބައެއް މަރުކަޒުތަކަށް ޙަމަލާ ވެސް ދީފައިވެއެވެ.
މިޔަންމާގެ އަސްކަރިއްޔާއިން ރޮހިންޔާ ދަރިކޮޅުގެ މީހުންނާ ދެކޮޅަށް ހިންގަމުންދާ ޖަރީމާތަކުން ސަލާމަތްވުމަށް އެތައް ހާސް ބަޔަކު ވަނީ އަވަށްޓެރި ބަންގްލަދޭޝަށް ހިޖުރަކޮށްފައެވެ. އަދި ނޮވެންބަރު މަހުން އޭޕްރިލް މަހަށް ކަނޑު މަޑުވުމުން ލަކުޑި ބޯޓުފަހަރުގައި ރޮހިންޔާ ރެފިއުޖީން އިންޑޮނޭޝިޔާއަށާއި މެލޭޝިޔާއަށް ދަތުރުކުރެއެވެ.
ދުނިޔޭގެ އެންމެ ބޮޑު މުސްލިމުންގެ އާބާދީ އޮންނަ އިންޑޮނޭޝީޔާއަކީ އދގެ ރެފިއުޖީންނާ ބެހޭ މުޢާހަދާގައި ސޮއިކޮށްފައިވާ ޤައުމެއް ނޫނެވެ. ނަމަވެސް އެ ޤައުމުން މީގެ ކުރިން ވަނީ ރެފިއުޖީން ބަލައިގަނެފައެވެ.