2008 ވަނަ އަހަރު އިންޑިޔާގެ ވިޔަފާރީގެ މަރުކަޒީ ރަށް މުމްބާއީގައި ދިން ނުރައްކާތެރި ޙަމަލާ ރޭވުމުގައި އިސްކޮށް ޙަރަކާތްތެރިވި މޭސްތިރި ކަމުގައި އިންޑިޔާއިން ތުޙުމަތު ކުރާ ހާފިޛް ސަޢީދު ހަވާލު ކުރަން އެ ޤައުމުން ޕާކިސްތާނުގެ ކިބައިން ރަސްމީ ގޮތުން އެދެފިއެވެ. އެ އަހަރުގެ ނޮވެންބަރު މަހުގެ 26 ވަނަ ދުވަހު މުމްބާއީގައި ދީފައިވާ ޙަމަލާގައި 160 މީހުން މަރުވިއެވެ. އޭގެ ތެރޭގައި އެހެން ޤައުމުތަކުގެ ރައްޔިތުން ވެސް ހިމެނެއެވެ.
ސަޢީދަކީ ޕާކިސްތާނުގެ ހަނގުރާމަވެރި ޖަމާޢަތެއް ކަމުގައިވާ ލަޝްކަރް ޠައިބާ (އެލްއީޓީ)ގެ ބާނީއެވެ. މުމްބާއީއަށް ޙަމަލަ ދީފައި ވަނީ އޭނާގެ މޭސްތިރި ކަމުގެ ދަށުން ކަމުގައި އިންޑިޔާއިން ތުޙުމަތު ކުރާއިރު، އެމެރިކާއިން އޭނާ ހައްޔަރު ކުރުމަށް އަންގާފައިވާ ކަން ފާހަގަ ކޮށްލަން ޖެހެއެވެ. ސަޢީދާއި އޭނާގެ ޖަމާޢަތުގެ އިސްވެރިން ހައްޔަރުކޮށް ހަވާލުކުރާ ފަރާތަކަށް 100 މިލިޔަން އެމެރިކާ ޑޮލަރު ދިނުމަށް ވެސް އެމެރިކާއިން ވަނީ ހުށަހަޅާފައެވެ.
އިންޑިޔާގެ ޚާރިޖީ ވުޒާރާގެ ތަރުޖަމާނު އަރިންދަމް ބާގްޗީ ވިދާޅުވީ ސަޢީދު ހަވާލު ކުުރުމަށް އެ ވުޒާރާއިން ޕާކިސްތާނުގެ ޚާރިޖީ ވުޒާރާގައި ރަސްމީކޮށް އެދިފައިވާ ކަމުގައެވެ. އޭނާ ހަވާލު ކުރަން އަންގާފައި ވަނީ މުމްބާއީގައި ދީފައިވާ ޙަމަލާގެ ސަރިޔަތް ހިންގުމަށެވެ. "ކަމާ ގުޅޭ ލިޔެކިޔުންތަކާ އެކު އަޅުގަނޑުމެން ވާނީ ޕާކިސްތާނުގެ ޚާރިޖީ ވުޒާރާއަށް ރަސްމީކޮށް ހުށަހަޅާފައި،" ބާގްޗީ ވިދާޅުވިއެވެ. ސަޢީދަކީ އިންޑިޔާއިން ހޯދަން ބޭނުންވެގެން އިޢުލާނު ކޮށްފައިވާ ޓެރެރިސްޓުންގެ ލިސްޓުގައި ހިމެނޭ މީހެކެވެ.
އޭނާ އިންޑިޔާއާ ހަވާލު ކުރަން ހުށަހަޅާފައިވީ ނަމަވެސް، ކަމާ ގުޅޭ މާހިރުން ވިދާޅުވީ ދެ ޤައުމުގެ ދެމެދުގައި ކުށްވެރިން ބަދަލު ކުރުމުގެ ރަސްމީ އެއްބަސްވުމެއް އެކުލަވައިލާފައި ނުވާ ކަމުގައެވެ. އިންޑިޔާގެ އިތުރުން ބައެއް އެހެން ޤައުމުތަކުން ވެސް ވަނީ ސަޢީދަކީ ޓެރެރިސްޓެއްގެ ގޮތުގައި ކަނޑައަޅާފައެވެ. އޭނާ މިހާރު ހުރީ ޓެރެރިޒަމަށް ޚަރަދު ކުރުމުގެ ކުށް ސާބިތުވެ ޕާކިސްތާނުގައި ޖަލަށް ލާފައެވެ.
ދިފާޢީ ދާއިރާގެ މާހިރުން ވިދާޅުވީ، ސަރަޙައްދީ ޤައުމުތަކާ އެކު އޮތް ގުޅުން ބަދަހި ކުރަން ޕާކިސްތާނުން ބޭނުންވާ ނަމަ، އަދި ޓެރެރިޒަމް ކޮންޓްރޯލް ކުރަން ބޭނުންވާ ނަމަ، އިންޑިޔާއިން އެދުނު ގޮތަށް ސަޢީދު އެ ޤައުމާ ހަވާލު ކުރަން ޕާކިސްތާނުން ދެކޮޅު ނަހަދާނެ ކަމުގައެވެ.