މެލޭޝިޔާގެ ކުރީގެ ބޮޑުވަޒީރު މަހާތިރް މުޙައްމަދުގެ ކެބިނެޓުގައި މާލީ ވަޒީރު ކަމުގެ މަޤާމު ފުރައްވާފައިވާ ދައިމް ޒައިނުއްދިންގެ މައްޗަށް މަނީ ލޯންޑްރިން މަނާކުރާ ޤާނޫނުގެ ދަށުން ތަޙުޤީޤެއް ހިންގަމުންދާ ކަން އެ ޤައުމުގެ އެންޓި ކޮރަޕްޝަން ކޮމިޝަން (އެމްއޭސީސީ)ން ހާމަ ކޮށްފިއެވެ. 85 އަހަރުގެ ދައިމަކީ މަހާތިރްގެ ވަރަށް އަރިސް ބޭފުކެވެ. އޭނާ ވަނީ 1984އިން 1991އަށް، އަދި 1999އިން 2001 ވަނަ އަހަރަށް އެ ޤައުމުގެ މާލީ ވަޒީރު ކަމުގެ މަޤާމު ފުރުއްވާފައެވެ.
ދައިމްގެ މައްޗަށް މަނީ ލޯންޑްރިން މަނާކުރާ ޤާނޫނުގެ ދަށުން ތަޙުޤީޤެއް ފަށާފައިވާ ކަން އެމްއޭސީސީން ހާމަކޮށްފައި ވަނީ، އެ ކަމާ ގުޅޭ މީޑިޔާ ރިޕޯޓުތަކެއް ޢާންމުވެފައިވާ ދަނޑިވަޅެއްގައެވެ. އެމްއޭސީސީން ބުނީ، ކުއަލަ ލުމްޕޫރްގައި ހުންނަ އިލްހާމް ޓަވަރގެ ނަން ކިޔާ 60 ފަންގިފިލާގެ ޢިމާރާތެއް މި ތަޙުޤީޤުގެ ދަށުން ހިފަހައްޓާފައިވާ ކަމުގައެވެ. އެއީ، އޭނާއާ ގުޅުން ހުރި ޢިމާރާތެއް ކަމަށް ބެލެވެއެވެ.
ނަމަވެސް، ދައިމް ވަނީ އޭނާއާ ދެކޮޅަށް ކުރެވިފައިވާ ތުހުމަތުތައް ދޮގު ކުރައްވާފައެވެ. އޭނާއާ ދެކޮޅަށް ތަޙުޤީޤެއް ފަށާފައި ވަނީ ބޮޑުވަޒީރު އަންވަރް އިބްރާހީމް ފަހަތުގައި ހުންނަވައިގެން ސިޔާސީ މަޤުޞަދެއް ހާސިލު ކުރެއްވުމަށް ކަމުގައި ވެސް އޭނާ ތުހުމަތު ކުރެއްވިއެވެ. އޭނާގެ މައްޗަށް ތުހުމަތު ކުރެވޭ މައްސަލައިގެ މަޢުލޫމާތު ސާފު ކުރުމަށް އެތަކެއް ފަހަރަކު އެމްއޭސީސީގައި އެދުމުން، އެ މަޢުލޫމާތު ސާފު ކޮށްދޭން އެ އިދާރާއިން ދެކޮޅު ހަދާފައިވާ ކަމުގައި ވެސް ދައިމް ބުންޏެވެ.
2022 ވަނަ އަހަރު މެލޭޝިޔާގެ ވެރިކަމާ ހަވާލުވި އަންވަރް ވަނީ ކޮރަޕްޝަން ނައްތައިލަން މަސައްކަތް ކުރުމަށް ވަޢުދުވެ ވަޑައިގަންނަވާފައެވެ. އަދި، ދައިމްގެ މައްޗަށް ކޮރަޕްޝަންގެ ތުހުމަތުކޮށް، ތަޙުޤީޤު ފަށާފައި މި ވަނީ އެ ވަޢުދުގެ ދަށުން ކަމަށް ބެލެވެއެވެ. އެމްއޭސީސީން ބުނީ، މި އަހަރުގެ ފެބުރުވަރީ މަހުން ފެށިގެން ދައިމްގެ މައްސަލައިގެ ތަޙުޤީޤު ކުރަމުންދާ ކަމުގައެވެ. އަދި، މި ތަޙުޤީޤު ފެށުމުގައި އެއްވެސް ފަރާތެއްގެ ނުފޫޒެއް ނެތް ކަމުގައި ވެސް އެ އިދާރާއިން ބުނެއެވެ.
މިއީ، 2021 ވަނަ އަހަރު ލީކު ކޮށްލާފައިވާ ޕެންޑޯރާ ޕޭޕަރސްގައި ހާމަ ކޮށްފައިވާ މަޢުލޫމާތަށް ބަލައި ފަށާފައިވާ ތަޙުޤީޤެއް ކަމަށް ބެލެވެއެވެ. ދައިމާއި، އޭނާގެ ޢާއިލާގެ މެންބަރުންގެ އިތުރުން އޭނާއާ ގާތް ގުޅުން އޮންނަ ފަރާތްތަކުގެ ނަމުގައި ބޭރު ޤައުމުތަކުގައި އެތަކެއް މިލިޔަން ޑޮލަރުގެ އަގުހުރި ހަރުމުދާ ހުރި ކަމަށް އެ ލިޔެކިޔުންތަކުން ހާމަވިއެވެ. އެ މީހުންގެ ނަމުގައި ހުރި މުދަލުގެ އަގު 31.82 މިލިޔަން ޑޮލަރަށް އަރާ ކަމުގައި ވެސް އެ ލިޔެކިޔުންތަކުން ހާމަވެއެވެ.
އެމްއޭސީސީން ބުނީ މި ކަމާ ގުޅޭ މަޢުލޫމާތާއި މާލީ ބަޔާންތައް ހުށަހެޅުމަށް ދައިމަށް ފަސް ފަހަރެއްގެ މަތިން ފުރުޞަތު ދީފައިވާނެ ކަމުގައެވެ. ނަމަވެސް، އޭނާގެ ފަރާތުން މި ކަމަށް އެއްބާރުލުން ލިބިފައި ނުވާ ކަމުގައި އެ އިދާރާއިން ބުނެއެވެ. މިހާރު ރިޓަޔަރ ކުރައްވާފައިވާ ދައިމަކީ، މެލޭޝިޔާގެ ސިޔާސީ މައިދާނުގައި ބަސްވިކޭ ބޭފުޅެއް ކަން ފާހަގަ ކޮށްލަން ޖެހެއެވެ. 2018 ވަނަ އަހަރު މަހާތިރް ބޮޑުވަޒީރު ކަމުގެ މަޤާމާ ހަވާލު ވަޑައިގެންނެވުމަށް ފަހު ދައިމަށް ވަނީ ސަރުކާރުގެ އެޑްވަޒަރީ ކައުންސިލްގެ އިސްެވެރިޔާގެ މަޤާމަށް އޭނާ ޢައްޔަން ކުރައްވާފައެވެ. ދައިމަކީ ޗައިނާއާ ގާތް ގުޅުންތަކެއް ބާއްވަވާ ބޭފުޅެއް ކަން ވެސް ފާހަގަ ކޮށްލަން ޖެހެއެވެ.