ޔަހޫދީންގެ ވިޔަފާރިތަކާއި މާލީ އެހީތެރިކަން ފޯރުކޮށްދޭ ވިޔަފާރިތައް ބޮއިކޮޓް ކުރަމުންދާ ދަނޑިވަޅެއްގައި މެލޭޝިޔާގައި ހިންގާ މެކްޑޮނަލްޑްސަށް މާލީ ގޮތުން ބޮޑެތި ގެއްލުންތަކެއް ލިބިފައިވާ ކަމަށް ބުނެ ބަދަލުގެ ގޮތުގައި 1 މިލިއަން އެމެރިކާ ޑޮލަރު ހޯއްދަން ކޯޓަށް ހުށަހަޅައިފިއެވެ. ދުނިޔޭގެ އެކި ކަންކޮޅުތަކުގައި ހިންގާ ޔަހޫދީންނާ ގުޅުންހުރި ވިޔަފާރިތައް ބޮއިކޮޓް ކުރަން ފަށާފައި ވަނީ، ޣައްޒާގެ މުސްލިމުންނާ ދެކޮޅަށް އެ މީހުން ހިންގަމުންދާ ލާއިންސާނީ ޢުދުވާނާ ގުޅިގެންނެވެ. މި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 22,000އަށް އަރާފައެވެ.
ބައިނަލްއަޤުވާމީ ފާސްޓްފުޑް ޗެއިނެއް ކަމުގައިވާ މެކްޑޮނަލްޑްސްގެ ވިޔަފާރި މެލޭޝިޔާގައި ކުރަނީ ގްރްބަންގް އަލަފް ރެސްޓޯރެންޓްސް ކިޔާ ކުންފުންޏަކުންނެވެ. އެ ކުންފުނިން ބުނީ ބޮއިކޮޓާ ގުޅިގެން މިހާތަނަށް ލިބިފައިވާ ގެއްލުމުގެ އަގު 1 މިލިޔަން އެމެރިކާ ޑޮލަރަށް އަރާ ކަމުގައެވެ. މި ކަމާ ގުޅިގެން ކޯޓަށް މައްސަލަ ވައްދައި ދަޢުވާ ކުރަން ހުށަހަޅާފައި ވަނީ، ޔަހޫދީންނާ ގުޅުންހުރި ވިޔަފާރިތައް ބޮއިކޮޓް ކުރަން ގޮވައިލާ މެލޭޝިޔާގެ މަދަނީ ޖަމުޢިއްޔާއަކާ ދެކޮޅަށެވެ.
މި މައްސަލައިގައި ދަޢުވާ ލިބޭ ފަރާތަކީ ބޮއިކޮޓް، ޑައިވެސްޓްމެންޓް އެންޑް ސެންކްޝަންސް (ބީޑީއެސް) މެލޭޝިޔާގެ ނަމުގައި ހިންގާ ޖަމުޢިއްޔާއެކެވެ. އެ ޖަމުޢިއްޔާއާ ދެކޮޅަށް މެކްޑޮނަލްޑްސް މެލޭޝިޔާއިން ދަޢުވާ އުފުލާފައި މި ވަނީ، ގެއްލުމުގެ ބަދަލު ހޯދާށެވެ. ބީޑީއެސްގެ ޢަމަލުތަކާ ގުޅިގެން މެކްޑޮނަލްޑްސް މެލޭޝިޔާއަށް 1.31 މިލިޔަން އެމެރިކާ ޑޮލަރުގެ ގެއްލުމާ ކުރިމަތިލާން ޖެހައިވާ ކަމުގައި އެ ކުންފުނިން ބުނެއެވެ.
މެލޭޝިޔާގެ އާބާދީގެ ބޮޑު ބައެއް ހިއްސާ ކުރަނީ މުސްލިމުންނެވެ. އަދި، އެއީ ފަލަސްޠީނުގެ ރައްޔިތުންގެ ޙައްޤުތަކަށް ވަކާލާތު ކުރަމުންދާ ޤައުމެއް ކަން ފާހަގަ ކޮށްލަން ޖެހެއެވެ. އެހެން މުސްލިމް ޤައުމުތަކެކޭ އެއްފަދައިން، މެލޭޝިޔާގައި ހިންގާ ހުޅަނގުގެ ވިޔަފާރިތަކަށް މި ދުވަސްވަރު ވަނީ ބޮއިކޮޓްގެ އޮއިވަރަކާ ކުރިމަތިލާން ޖެހިފައެވެ. ޔަހޫދީންނަށް ހިތްވަރުދީ، ޔަހޫދީންނަށް ވާގިވެރިވާ ކުންފުނިތަކުން މުދަލާއި ޚިދުމަތް ހޯދުމާ ދެކޮޅަށް އެ ޤައުމުތަކުގައި ދަނީ ގޮވައިލަމުންނެވެ. އަދި، އެ ގޮވައިލުމަށް އިޖާބަދީ، އެތަކެއް މިލިޔަން މީހުން ދަނީ އެ ފަދަ ކުންފުނިތަކުން މުދަލާއި ޚިދުމަތް ހޯދަން ދެކޮޅު ހަދަމުންނެވެ.
މެކްޑޮނަލްޑްސް މެލޭޝިޔާއިން ކޯޓަށް ހުށަހަޅާފައިވާ މައްސަލައިގައި ބުނެފައި ވަނީ، އެ ކުންފުންޏަށް ލިބެމުންދާ ގެއްލުންތަކުގެ އަސްލަކީ، ބީޑީއެސް ޖަމާޢަތުން ސޯޝަލް މީޑިޔާގައި ޝާއިޢު ކުރަމުންދާ ޕޯސްޓުތައް ކަމުގައެވެ. އެ ޕޯސްޓުތަކުގައި، މެކްޑޮނަލްޑްސަކީ ޔަހޫދީންނަށް ފަންޑު ކުރާ ނުވަތަ މާލީ ގޮތުން އެހީތެރިވާ ކުންފުންޏެއް ކަމަށް ތުހުމަތު ކުރަމުންދާ ކަމުގައި އެ ކުންފުނިން ބުނެއެވެ. އަދި، އެއީ ޔަހޫދީންނާ ގުޅުން އޮތް ކުންފުންޏެއް ކަމަށް ތުހުމަތު ކޮށްފައިވާ ކަމުގައި ވެސް ބުނެފައިވެއެވެ.
ބީޑީއެސްގެ ސޯޝަލް މީޑިޔާ ޕޯސްޓުތަކާ ގުޅިގެން މެކްޑޮނަލްޑްސް ކުންފުނިން ވިޔަފާރިކުރާ މީހުންގެ ޢަދަދު ބޮޑުތަނުން މަދުވެ، ވިޔަފާރީގެ ފައިދާ ދަށްވެ، މުވައްޒަފުންގެ ޢަދަދު މަދުކުރަން މަޖުބޫރުވެ، ބައެއް ރެސްޓޯރެންޓުތައް ބަންދު ކުރަންޖެހި، ރެސްޓޯރެންޓުތައް ހުޅުވާފައި ހުންނަ ވަގުތު މަދުކުރަން ޖެހިފައިވާ ކަމުގައި އެ ކުންފުނިން ބުނެއެވެ.
ބީޑީއެސްއާ ދެކޮޅަށް ކޯޓަށް ހުށަހަޅާފައިވާ މައްސަލައާ ގުޅިގެން އެ ޖަމުޢިއްޔާއިން ބުނީ، މެކްޑޮނަލްޑްސް މެލޭޝިޔާގެ އަގު ވައްޓައިލަން އެ ޖަމާޢަތުން މަސައްކަތް ކުރަމުންދާ ކަމަށް ކުރާ ތުހުމަތު ދޮގުކުރާ ކަމުގައެވެ. އަދި، މި މައްސަލައިގައި ކޯޓުން ނިންމާ ގޮތަކަށް އިޙުތިރާމު ކުރާނެ ކަމަށާއި، އެ ޖަމާޢަތުގެ ހަމައެކަނި މަޤުޞަދަކީ ޔަހޫދީންގެ ވިޔަފާރިތަކަށް އޮތް ތާޢީދު ކުޑަކޮށް، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާން ހުއްޓުވަން ބާރު އެޅުން ކަމުގައެވެ.