ޖަޕާނުގެ މެދުތެރޭގައި އޮންނަ އިޝިކަވާ ޕުރޮވިންސަށް އައި ބާރުގަދަ ބިންހެލުމުގައި 30 މީހުން މަރުވެއްޖެއެވެ.
ޖަޕާނުގެ ކާރިޘާތަކާ ބެހޭ އިދާރާއިން ބުނީ އިތުރު ބަޔަކު މަރުވެފައިވާ ކަމަށް ބެލެވޭ ކަމަށާއި ގިނަ މީހުން މަރުވެފައި ވަނީ ބިން ހެލުމުގެ އަސަރު އެންމެ ބޮޑަށްކުރި ވަޖިމާ ސަރަޙައްދުން ކަމަށެވެ.
ބިންހެލުމުގެ ސަބަބުން ޢާންމުންގެ ގެދޮރާއި ޢިމާރާތްތައް ވެއްޓި ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވެއެވެ. ބައެއް ސަރަޙައްދުތަކުން ކަރަންޓުގެ ޚިދުމަތްވެސް ވަނީ މެދުކެނޑިފައެވެ. ބައެއް ސަރަޙައްދުތަކުގެ ވައިގެ ބަނދަރުތައް ބަންދުކުރަންޖެހި ވައިގެ ދަތުރުތަކާއި އެއްގަމާއި ކަނޑުދަތުރުފަތުރަށް ވެސް ވަނީ ބުރޫއަރައިފައެވެ.
ރިކްޓަރ މިންގަނޑުން 7.5ގައި ރެކޯޑު ކުރެވިފައިވާ ބިންހެލުމާ އެކު ޖަޕާނުގެ އައްސޭރިފަށު ސަރަޙައްދުތަކަށް ސުނާމީއެއް އަރާފާނެ ކަމުގެ އިންޒާރު ދީފައިވެއެވެ. ނަމަވެސް ސުނާމީގެ އިންޒާރު މިހާރު ވަނީ އުވައިލައިފައެވެ.
ބިންހެލުމަށްފަހު 140އަށްވުރެ ގިނަ ލޮޅުންތައް އައިސްފައިވާ ކަމަށް ޖަޕާނުގެ މޫސުމާ ބެހޭ އިދާރާއިން ބުނެއެވެ. ކުރިއަށް އޮތް ދުވަސްތަކުގައި އިތުރު ލޮޅުންތަކެއް އަތުވެދާނެ ކަމުގެ އިންޒާރު ވެސް އެ އިދާރާއިން ވަނީ ދީފައެވެ.
ބިންހެލުމާ ގުޅިގެން 97،000އަށްވުރެ ގިނަ މީހުންނަށް ރައްކާތެރި ހިސާބުތަކަށް ދިއުމަށް އަންގައިފައިވެއެވެ. ނަމަވެސް ސުނާމީގެ އިންޒާރު އުވާލުމުން ގިނަ ބަޔަކު ވަނީ އެ މީހުން ދިރިއުޅޭ ސަރަޙައްދުތަކަށް އެނބުރި ގޮސްފައެވެ.
ޖަޕާނަށް މި ފަދަ ބާރުގަދަ ބިންހެލުމެއް އެންމެ ފަހުން އައިސްފައި ވަނީ 2011 ވަނަ އަހަރުއެވެ. އެ ބިންހެލުމުގެ ސަބަބުން އުފެދުނު ސުނާމީގައި 20,000 އެއްހާ މީހުން މަރުވިއެވެ. އަދި، ގިނަ ޢަދަދެއްެގެ ގެދޮރާއި ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބުނެވެ. އެ ބިންހެލުމާ ގުޅިގެން ފުކުޝިމާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަކަށް ބޮޑެތި ގެއްލުންތަކެއް ލިބި، ނިއުކްލިޔަރ ކާރިސާއެއް ހިނގުމުގެ ބިރު ހީވިއެވެ.