ޤަޠަރުގެ ވެރިރަށް ދޯހާގެ ހުޅަނގު ދެކުނުގައި ޤާއިމުކޮށްފައިވާ އަލްޢުދައިދު އަސްކަރީ މަރުކަޒުގައި އިތުރު ދިހަ އަހަރު ތިބުމަށް އެމެރިކާއިން ނިންމައިފިއެވެ. އަލްޢުދައިދަކީ މެދުއިރުމަތީގައި ހުންނަ އެމެރިކާގެ އެންމެ ބޮޑު އަސްކަރީ މަރުކަޒެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ފަލަސްޠީނުގެ ޣައްޒާގެ ވެރިކަންކުރާ ޙަމާސް ޖަމާޢަތާއި ޔަހޫދީ ފައުޖުތަކާއި ދެމެދު ހިނގަމުންދާ ހަނގުރާމައިގައި ދެ ފަރާތުގައި ތިބި އަސީރުންނާއި ޤައިދީން މިނިވަންކުރުމަށް އެމެރިކާއާއެކު ޤަޠަރުން ވަނީ މުހިންމު މަޝްވަރާތަކެއް ކޮށްފައެވެ. ޙަމާސްގެ ބެލުމުގެ ދަށަށް ގެންގޮސްފައިވާ ރަހީނުން ދޫކޮށްލުމާއި ޣައްޒާއަށް ފޯރުކޮށްދޭ އިންސާނީ އެހީތެރިކަން އިތުރުކުރުމާ ބެހޭ ގޮތުން އެމެރިކާގެ ރައީސް ޖޯ ބައިޑެންނާއި ޤަޠަރުގެ ޢަމީރާއި ދެމެދެ މިހާރު ވެސް މަޝްވަރާތައް ކުރަމުންދެއެވެ.
ޤަޠަރުގައި ޙަމާސްގެ އިސްވެރިން ދިރިއުޅެމުންދާތީ އެމެރިކާގެ ކޮންގްރެސްގައި ހިމެނޭ ބައެއް ބޭފުޅުންގެ ފާޑުކިޔުންތައް ވެސް ޤަޠަރަށް ވަނީ އަމާޒުވެފައެވެ.
ޤަޠަރަކީ 2021 ވަނަ އަހަރު އަފްޣާނިސްތާނުން އެމެރިކާ ސިފައިން ފޭބި ފަހުން ޠާލިބާނުންނާއި އެމެރިކާގެ މެދުވެރިއެއްގެ ދަޢުރު އަދާކުރި ޤައުމެވެ. އޭގެ އިތުރުން ޤަޠަރަކީ ވެނުޒުއޭލާއާއި ޢީރާނުގައި ތިބި ބައެއް އެމެރިކާ ޤައިދީން މިނިވަންކުރުމުގެ މަޝްވަރާތަކުގައި ވެސް މެދުވެރިއަކަށްވެފައިވާ ޤައުމެވެ.