ޢަރަބި އެކުވެރި އިމާރާތް (ޔޫއޭއީ) މެދުވެރިއެއްގެ ދަޢުރު އަދާކޮށްގެން ރަޝިޔާ ޔޫކްރޭނުން ގިނަ ޢަދަދެއްގެ ޤައިދީން މިނިވަންކޮށްފިއެވެ. އެ ގޮތުން ކޮންމެ ޤައުމަކުން ވެސް ވަނީ ހަނގުރާމައިގައި ޖަލަށް ލާފައި ތިބި 200އަށްވުރެ ގިނަ ޤައިދީން މިނިވަކޮށްފިއެވެ.
ރަޝިޔާގެ ދިފާޢީ ވުޒާރާއިން ބުނީ އަސްކަރިއްޔާގައި މަސައްކަތްކުރާ 248 މުވައްޒަފުން ޔޫކްރޭނުން މިނިވަންކޮށްފައިވާ ކަމަށެވެ. ޔޫކްރެއިނުން ބުނީ މިހާތަނަށް 224 ސިފައިންނާއި ޢާންމުންގެ ހަ މީހުން ހިމެނޭހެން ޖުމަލް 240 ޤައިދީން ރަޝިޔާއިން މިނިވަންކޮށްފައިވާ ކަމަށެވެ.
ޤައިދީން މިނިވަން ކުރުމަށް މެދުވެރިއަކަށްވި ޔޫއޭއީން ނެރުނު ބަޔާނެއްގައި ބުނީ ޤައިދީން މިނިވަންކުރެވުނީ ރަޝިޔާ އަދި ޔޫކްރެއިނާއެކު އެ ޤައުމުން ބާއްވާ ގާތް ގުޅުމުގެ ސަބަބުން ކަމަށެވެ.
ރަޝިޔާއިން ޔޫކްރޭނުގައި ކުރަމުންދާ ހަނގުރާމައަށް 22 މަސް ދުވަސް ވަނީ ވެފައެވެ. ނަމަވެސް ހަނގުރާމަ ހުއްޓާލާނެ ކަމުގެ އިޝާރާތެއް ދެ ޤައުމުން ވެސް ދީފައެއްނުވެއެވެ.
ދެ ޤައުމުން ޤައިދީން މިނިވަންކޮށްފައި ވަނީ ދެ ޤައުމުން ވެސް ވަރުގަދަ ޙަމަލާތަކެއް ބަދަލުކޮށްފައިވާ ދަނޑިވަޅެއްގައެވެ.