ފަލަސްޠީނުގެ މިނިވަންކަމަށް މަސައްކަތްކުރާ ޙަމާސް ޖަމާޢަތުގެ ދެވަނައަށް އެންމެ އިސްވެރިޔާ ޞާލިޙް އަލް ޢަރޫރީ ޝަހީދުކޮށްލުމުން ހިމޭނުން ނުތިބޭނެ ކަމަށް ލުބުނާނުގެ ޙިޒްބުﷲ ޖަމާޢަތުގެ އިސްވެރިޔާ ޙަސަން ނަޞްރުﷲ ވިދާޅުވެއްޖެއެވެ. އޭނާ އެ ގޮތަށް ވިދާޅުވީ ޓީވީ މެދުވެރިކޮށް ދެއްވި ތަޤުރީރެއްގައެވެ.
ޢަރޫރީ ޝަހީދުކޮށްލީ ލުބްނާންގެ ވެރިރަށް ބެއިރޫތަށް ޔަހޫދީން ދިން ވައިގެ ޙަމަލާއެއްގައެވެ. އެއީ ޔަހޫދީ އަސްކަރިއްޔާއާއި ޙިޒްބުاللهއާ ދެމެދު ތިން މަސް ދުވަސް ވަންދެން ޙަމަލާތައް ބަދަލުކުރުމަށްފަހު ބެއިރޫތަށް ދިން ފުރަތަމަ ޙަމަލާއެވެ.
ޢަރޫރީ ޝަހީދުކޮށްލި ޙަމަލާއާ ގުޅިގެން ނަޞްރުﷲ ވިދާޅުވީ ޔަހޫދީން ލުބުނާނަށް ޙަމަލާދީ އެ ޤައުމާ ދެކޮޅަށް ހަނގުރާމަ ކުރަން އުޅެފިނަމަ ހިޒްބުﷲން އެއްވެސް ހައްދެއް ނެތި ޔަހޫދީންނާ ދެކޮޅަށް ޙަމަލާތައް ދޭނެ ކަމަށެވެ. ހަނގުރާމަ ކުރުމަށް ވިސްނުމަށް ގެނައި ނަމަވެސް އެކަމާ ފަހުން ދެރަވާނެ ކަމަށް ވެސް ނަޞްރުﷲ ވިދާޅުވިއެވެ.
އީރާނުގެ އިރުދެކުނުގައިވާ ކަރްމާންގައި ދިން ބޮމުގެ ޙަމަލާއެއްގައި ޢާންމުންގެ 73 މީހުން މަރުވި މައްސަލައަށް ވެސް ނަޞްރުﷲ ވަނީ ވާހަކަފުޅު ދައްކަވައިފައެވެ. އެ ގޮތުން އެ ޙަމާލާއަކީ ސީދާ ޢާންމުންނަށް އަމާޒުކޮށްގެން ދިން ޙަމަލާއެއް ކަމަށް ނަޞްރުﷲ ވިދާޅުވިއެވެ.
އީރާނުގައި ޙަމަލާތަކަކީ އަވަހާރަ ކޮށްލާފައިވާ އިސްލާމީ އިންޤިލާބީ ލަޝްކަރުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރިއަށް ދިން ޙަމަލާތަކެކެވެ. ބޮންތައް ގޮއްވައިލާފައި ވަނީ ސުލައިމާނީގެ މަރަށް ހަތަރު އަހަރު ފުރުން ފާހަގަ ކުރުމަށް އޭނާއަށް އިޙުތިރާމު އަދާ ކުރުމުގެ ގޮތުން ގިނަ ޢަދަދެއްގެ ބަޔަކު މަޤުބަރާ ކައިރިއަށް ޖަމާވި ވަގުތެއްގައެވެ.