އީރާނުގެ އިރުދެކުނުގައިވާ ކަރްމާންގައި ދެ ބޮން ގޮއްވައިލައިގެން ދިން ޙަމަލާގައި މަރުވި މީހުންގެ ޢަދަދު 100 އެރުމާ ގާތްވެފައިވާއިރު، އެ ޙަމަލާގެ ފަހަތުގައިވާ ބަޔަކު ހޯދައި ބަދަލު ހިފާނެ ކަމަށް ބުނެ އެ ޤައުމުގެ ސަރުކާރާއި އެ ޤައުމުގެ އިސްލާމީ އިންޤިލާބީ ލަޝްކަރުން އިންޒާރު ދީފިއެވެ.
ބޮމުގެ ޙަމަލަތައް އަމާޒު ކޮށްފައި ވަނީ އަވަހާރަ ކޮށްލާފައިވާ އީރާނުގެ އިންޤިލާބީ ލަޝްކަރުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރީގައެވެ. ބޮންތައް ގޮއްވައިލާފައި ވަނީ ސުލައިމާނީގެ މަރަށް ހަތަރު އަހަރު ފުރުން ފާހަގަ ކުރުމަށް އޭނާއަށް އިޙުތިރާމު އަދާ ކުރުމުގެ ގޮތުން ގިނަ ޢަދަދެއްގެ ބަޔަކު މަޤުބަރާ ކައިރިއަށް ޖަމާވެފައިވާ ވަޤުތެއްގައެވެ.
"ސުލައިމާނީގެ މަޤުބަރާ ކައިރީގައި ދިން ބޮމުގެ ޙަމަލަތަކުގެ ފަހަތުގައިވާ ބަޔަކު އޭނާގެ ލަޝްކަރުން ހޯދާނެ. އެ ބަޔަކާ ދެކޮޅަށް ވަރުގަަދަ ޙަމަލަތަކެއް ދޭނެ،" އީރާނުގެ ނައިބު ރައީސް މުޙައްމަދު މުޚްބިރް ވިދާޅުވިއެވެ. އޭނާ މިހެން ވިދާޅުވެފައި ވަނީ، ޙަމަލާގައި އަނިޔާވި މީހުންގެ ތެރެއިން ހޮސްޕިޓަލުގައި ފަރުވާ ދެމުންދާ މީހުންނަށް ކުރެއްވި ޒިޔާރަތަކަށް ފަހުއެވެ. މިއީ، 1979 ވަނަ އަހަރު އީރާނުގައި ގެނައި އިސްލާމީ އިންޤިލާބަށް ފަހު އެ ޤައުމުގައި ދީފައިވާ މި ފަދަ އެންމެ ނުރައްކާތެރި ޙަމަލައެވެ.
ކަރްމާންގައި ދީފައިވާ ޙަމަލާގެ ޒިންމާ އެއްވެސް ފަރާތަކުން އުފުލާފައެއް ނުވެއެވެ. މި ޙަމަލައާ ގުޅޭ ގޮތުން އެމެރިކާއިން ބުނީ، މިއީ ޓެރެރިސްޓު ޖަމާޢަތެއް ކަމުގައިވާ އިސްލާމިކް ސްޓޭޓުން ދީފައިވާ ޙަމަލައެއް ކަމަށް ބެލެވޭ ކަމުގައެވެ.
އީރާނުގެ އިންޤިލާބީ ލަޝްކަރުން ބުނީ، މިއީ އީރާނުގެ ރައްޔިތުންގެ ހިތްތަކުގައި ބިރުވެރި ކަން އުފެއްދުމުގެ ނިޔަތުގައި ހިންގާފައިވާ ފިނޑި އަމަލެއް ކަމުގައެވެ. އަދި، އިސްލާމް ދީނަށް އޮތް ލޯތްބާއި ޤަދަރު ނެތިކޮށްލުމުގެ ނިޔަތުގައި ދީފައިވާ ޙަމަލައެެއް ކަމުގައި ވެސް ލަޝްކަރުން ސިފަ ކުރެއެވެ. "މި ޙަމަލާގައި ޒިންމާވާ ބަޔަކު ހޯދައި ބަދަލު ހިފުމަށް ވަރުގަދަ އަޒުމެއް ވަނީ އުފެދިފައި،" އެ ލަޝްކަރުން ނެރުނު ބަޔާނެއްގައި ބުނެފައިވެއެވެ.
އީރާނުގެ ރައީސް އިބްރާހީމް ރައީސީއާއި އެ ޤައުމުގެ ރޫޙީ ލީޑަރު އާޔަތުالله ޢަލީ ޚާމަންއީ ވެސް ވަނީ ޙަމަލަ އެންމެ ހަރުކަށި އިބާރާތުން ކުށްވެރި ކުރައްވާފައެވެ. އަދި، އެ ދެ ބޭފުޅުން ވެސް ވަނީ ޙަމަލާގެ ފަހަތުގައިވާ ބަޔަކާ ދެކޮޅަށް ބަދަލު ހިފާނެ ކަމުގެ އިންޒާރު ދެއްވާފައެވެ.
މިއީ އީރާނުގައި މި ފަދަ ޙަމަލައެއް ދީފައިވާ ފުރަތަމަ ފަހަރެއް ނޫނެވެ. އެ ޙަމަލަތަކުގެ ފަހަތުގައި އޮތީ އެމެރިކާއާއި ޔަހޫދީ ދަޢުލަތް ކަމަށް އީރާނުން ތުހުމަތު ކުރެއެވެ. އަދި، އެއީ އީރާނުގެ އެންމެ ބޮޑު ދުޝްމަނުންގެ ގޮތުގައި އެ ޤައުމުން ދެކެއެވެ. 2022 ވަނަ އަހަރު އިސްލާމިކް ސްޓޭޓުން ދިން މި ފަދަ ނުރައްކާތެރި ޙަމަލައެއްގައި 15 މީހުން މަރައިލާފައިވެއެވެ. 2017 ވަނަ އަހަރު ވެސް އެ ޖަމާޢަތުން ވަނީ އީރާނުގެ ޤާނޫނު ހަދާ މަޖިލީހާއި ޒައީމް އާޔަތުالله ރޫޙުالله ޚާމަންއީގެ މަޤުބަރާ ކައިރީގައި ބޮން ގޮއްވައިލާފައެވެ.
ސުލައިމާނީއަކީ، އީރާނުގެ އިސްލާމީ އިންޤިލާބީ ލަޝްކަރުގެ އެންމެ ބާރުގަދަ ގޮފި ކަމުގައިވާ ޤުދްޞް ފޯސްގެ އެންމެ އިސްވެރިޔާއެވެ. އޭނާ ޝަހީދު ކޮށްލުމަށް ޢަމުރު ކޮށްފައި ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕެވެ. 62 އަހަރުގެ ސުލައިމާނީ ޝަހީދު ކޮށްލާފައި ވަނީ 2020 ވަނަ އަހަރުގެ ޖަނަވަރީ މަހުގެ 3 ވަނަ ދުވަހު އެމެރިކާގެ އަސްކަރިއްޔާއިން ދިން ޑްރޯން ޙަމަލާއެއްގައެވެ.