ޢިރާޤުގެ ވެރިރަށް ބަޣްދާދުގެ އިރުމަތީގައި ހުންނަ ޢިމާރާތަކަށް ޑްރޯން ޙަމަލައެއްދީ ހަނގުރާމަވެރިންގެ ހަތަރު މީހުން ޝަހީދުކޮށްލައިފިއެވެ. ޙަމަލަ ދީފައި ވަނީ ޢިރާޤުގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ އަލް-ނަޖްބައުގެ މައި މަރުކަޒަކަށެވެ. އެ ޙަމަލާގައި އެ ޖަމާޢަތުގެ އިތުރު ހަ މީހަކު ޒަޚަމުވެފައިވެއެވެ.
ބަޣްދާދުގެ ފުލުހުންނާއި މަންޒަރު ފެނުނު މީހުން ބުނީ، އަލް-ނަޖްބައުގެ މައި މަރުކަޒަށް ދެ ފަހަރު ޙަމަލަ ދީފައިވާ ކަމުގައެވެ. އެއީ އެމެރިކާއިން ދީފައިވާ ޙަމަލައެއް ކަމުގައި އަލް-ނަޖްބައު ޖަމާޢަތުން ތުހުމަތު ކުރެއެވެ. އަދި، މި ޙަމަލާގެ ބަދަލު ހިފާނެ ކަމުގެ އިންޒާރު އެ ޖަމާޢަތުން ދީފައިވެއެވެ. އަލް-ނަޖްބައަކީ އީރާނުން ވާގިވެރިވާ ހަތިޔާރު އެޅި ޖަމާޢަތެކެވެ.
"މި ޙަމަލާގެ ބަދަލު ހިފާނަން. މި ޙަމަލާގެ ފަހަތުގައި އޮތް އެމެރިކާއިން މި ކަމާ މެދު ހިތާމަ ކުރާނެ،" އަލް-ނަޖްބައުގެ އިސް ކޮމާންޑަރެއް ކަމުގައިވާ އަބޫ އަޤީލް އަލް-މޫސަވީ ވިދާޅުވިއެވެ. އެ ޖަމާޢަތުގެ ތުހުމަތުތަކަށް އެމެރިކާއިން ރައްދު ދީފައެއް ނުވެއެވެ. އަދި، އެ ޖަމާޢަތުގެ މައި މަރުކަޒަށް ދިން ޙަމަލާގެ ޒިންމާ އުފުލާފައެއް ވެސް ނުވެއެވެ.
އެ ޙަމަލާގައި ޝަހީދުވި މީހުންގެ ތެރޭގައި އަލް-ނަޖްބައު ޖަމާޢަތުގެ އިސް ކޮމާންޑަރެއް ކަމުގައިވާ އަބޫ ތަޤްވާ އަލް-ސަޢީދީއާއި އޭނާގެ އިސް އެހީތެރިއެއް ހިމެނެއެވެ. ޙަމަލަތައް އަމާޒު ކޮށްފައި ވަނީ މަރުކަޒުގެ ގޯތިތެރޭގައި އެ މީހުން ތިބި ދުއްވާ އުޅަނދަށް ކަމުގައި މަންޒަރު ފެނުނު މީހުން ބުނެއެވެ. މި ޙަމަލައާ ގުޅިގެން ޢިރާޤުގެ ސަލާމަތީ ބާރުތަކުން ވަނީ އެ ސަރަޙައްދުގައި ސަލާމަތީ ފިޔަވަޅުތައް ވަރުގަދަ ކޮށްފައެވެ.
ހުސްވި މަހު އެމެރިކާގެ މަރުކަޒަކަށް ދިން ޑްރޯން ޙަމަލައެއްގައި އެމެރިކާ ސިފައިންގެ ތިން މީހަކު ޒަޚަމު ކޮށްލުމާ ގުޅިގެން ވެސް އެމެރިކާއިން ވަނީ ބަދަލުގައި ވައިގެ ޙަމަލަތަކެއް ދީފައެވެ. އެމެރިކާގެ މަރުކަޒަށް ޑްރޯން ޙަމަލަ ދީފައި ވަނީ އީރާނުން ވާގިވެރިވާ ހަތިޔާރު އެޅި ޖަމާޢަތަކުން ކަމަށް އެމެރިކާއިން ތުހުމަތު ކުރެއެވެ.
އޮކްޓޫބަރު 7 ވަނަ ދުވަހު ޔަހޫދީން ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާންތައް ފެށުމާ ގުޅިގެން އިރާޤާއި ސޫރިޔާގައި ހަރަކާތްތެރިވާ އެމެރިކާ ސިފައިންނަށް އޮތް ނުރައްކާތެރި ކަން އިތުރުވެފައިވާ ކަން ފާހަގަ ކޮށްލަން ޖެހެއެވެ. ޔަހޫދީންގެ ޢުދުވާން ފެށި ފަހުން އިރާޤާއި ސޫރިޔާގައި ތިބި ސިފައިންނަށް އަމާޒުތައް 100 އެއްހާ ޙަމަލަ ދީފައިވާ ކަމުގައި ރިޕޯޓުތައް ބުނެއެވެ. ޢިރާޤުގައި 900 އެއްހާ އެމެރިކާ ސިފައިން ތިބިއިރު، ސޫރިޔާގައި ވެސް އެ ޤައުމުގެ 2,500 އެއްހާ ސިފައިން ދަނީ ހަރަކާތްެތެރިވަމުންނެވެ.