ޔޫކްރޭނަށް ޙަމަލާ ދޭން ރަޝިޔާއިން ބޭނުންކުރަނީ އުތުރު ކޮރެޔާއިން ރަޝިޔާއަށް ފޯރުކޮށްދީފައިވާ ބެލިސްޓިކް މިސައިލްތަކާއި އިތުރު އެހެން ހަތިޔާރު ކަމަށް އެމެރިކާއިން ބުނެފިއެވެ. ރަޝިޔާއާ ގާތް ގުޅުމެއް އޮންނަ އީރާނުންވެސް މިސައިލް ހޯދުމަށް ރަޝިޔާއިން މަސައްކަތްކުރާ ކަމަށް އެމެރިކާއިން ތުޙުމަތުކުރެއެވެ.
ގާތްގަނޑަކަށް 900 ކިލޯމީޓަރު ދުރަށް ޙަމަލާދެވޭ މިސައިލްތައް އުތުރު ކޮރެޔާއިން ފޯރުކޮށްދީފައިވާ ކަމަށާއި ފާއިތުވި ހަފުތާތަކުގެ ތެރޭގައި ޔޫކްރޭނަށް ދިން ދެ ޙަމަލާއެއްގައި ރަޝިޔާއިން ބޭނުންކޮށްފައި ވަނީ އެ މިސައިލްތައް ކަމަށް އެމެރިކާގެ ޤައުމީ ސަލާމަތީ މަޖިލީހުގެ ތަރުޖަމާނު ޖޯން ކަރބީ ވިދާޅުވިއެވެ. އެހެންކަމުން ޔޫކްރޭނަށް ބޭނުންވާ މުހިންމު އަސްކަރީ އެހީތެރިކަން ދިނުމަށް އަވަސް ގޮތެއްގައި އެމެރިކާގެ ކޮންގްރެސްސުން ފާސްކުރަން ޖެހޭ ކަމަށް ވެސް ކާރބީ ވިދާޅުވިއެވެ.
އެމެރިކާއާއި އެކުވެރި ޤައުމުތަކުން މިހާރު ތައްޔާރުވަމުން އަންނަނީ އުތުރު ކޮރެޔާއިން ރަޝިޔާއަށް ހަތިޔާރު ފޯރުކޮށްދޭ މައްސަލަ އދގެ ސަލާމަތީ މަޖިލީހަށް ހުށަހެޅުމަށެވެ. އެމެރިކާއިން އދއަށް އެ މައްސަލަ ހުށަހަޅަން ނިންމާފައި ވަނީ ބައިނަލްއަޤުވާމީ މުޖުތަމަޢުން ވެސް އުތުރު ކޮރެއާއި ދެކޮޅަށް ފިޔަވަޅު އަޅަމުންދާ ދަނޑިވަޅެއްގައެވެ.
އުތުރު ކޮރެއާއިން ފޯރުކޮށްދޭ ހަތިޔާރު ރަޝިޔާއިން ބޭނުންކުރުން އިނގިރޭސިވިލާތުން ވެސް ވަނީ ކުށްވެރިކޮށްފައެވެ.
އުތުރު ކޮރެޔާގެ އިތުރުން އީރާނުންވެސް ހަތިޔާރު ހޯދުމަށް ރަޝިޔާއިން މަސައްކަތްކުރަމުންދާ ކަމަށް ކާރބީ ވިދާޅުވިއެވެ. އެ ގޮތުން އީރާނުން ހަތިޔާރު ގަތުމާމެދު އެއްބަސްވުމަކަށް އައިސްފައި ނުވި ނަމަވެސް ދުރު ރާސްތާ މިސައިލް ގަތުމާމެދު ދެ ޤައުމުގެ ދެމެދުގައި މަޝްވަރާތައް ކުރިއަށްދާ ކަމަށް ކާރބީ ވިދާޅުވިއެވެ.
އެމެރިކާއިން އޮކްޓޯބަރު މަހު ބުނެފައި ވަނީ އުތުރު ކޮރެޔާއިން ރަޝިޔާއަށް 1،000 އަށްވުރެ ގިނަ ކޮންޓެއިނަރުގެ އަސްކަރީ ސާމާނާއި ވަޒަން ފޯރުކޮށްދީފައިވާ ކަމަށެވެ.