އީރާނުގެ އިރުދެކުނުގައި އޮންނަ ކަރްމާންގައި މި މަހުގެ 3 ވަނަ ދުވަހު ދިން ދެ ބޮމުގެ ޙަމަލާގެ ޒިންމާ އައިއެސުން ނަގައިފިއެވެ. އެ ޙަމަލާގައި 100އަށްވުރެ ގިނަ މީހުން ވަނީ މަރުވެފައެވެ.
ޙަމަލާތައް އަމާޒު ކޮށްފައި ވަނީ އަވަހާރަ ކޮށްލާފައިވާ އީރާނުގެ އިސްލާމީ އިންޤިލާބީ ލަޝްކަރުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރީގައެވެ. ބޮންތައް ގޮއްވައިލާފައި ވަނީ ސުލައިމާނީގެ މަރަށް ހަތަރު އަހަރު ފުރުން ފާހަގަ ކުރުމަށް އޭނާއަށް އިޙުތިރާމު އަދާ ކުރުމުގެ ގޮތުން ގިނަ ޢަދަދެއްގެ ބަޔަކު މަޤުބަރާ ކައިރިއަށް ޖަމާވެފައިވާ ވަޤުތެއްގައެވެ.
އައިއެސްސުން އެ ޙަމަލާގެ ޒިންމާ ނަގާ ކަމަށް އިޢުލާންކޮށްފައިވަނީ ޓެލެގްރާމް އެކައުންޓެއް މެދުވެރިކޮށެވެ. އެ ޙަމަލާގެ ޒިންމާ އައިއެސްސުން ނަގައިފައި ވަނީ އެ ޙަމަލާގައި ޒިންމާވާ މީހުންގެ ކިބައިން ބަދަލު ހިފާނެ ކަމަށް އީރާނުން ބުނެފައިވަނިކޮށެވެ. އެ ގޮތުން ބޮމުގެ ޙަމަލާގައި ޒިންމާވާ މީހުންގެ ކިބައިން ބަދަލު ހިފާނެ ކަމަށް އީރާނުގެ ރޫޙީ ލީޑަރު އާޔަތުالله ޢަލީ ޚާމަނާއީއާއި އީރާނުގެ އިންޤިލާބީ ލަޝްކަރާއި އީރާނުގެ ނައިބު ރައީސް މުހައްމަދު މުޚްބީރު ވަނީ ވައުދުވެވަޑައިގެންފައެވެ.
ދެ ބޮން ގޮއްވައިލައި ދިން އެ ޙަމަލާއަކީ 1979 ވަނަ އަހަރަށްފަހު އީރާނަށް ދިން އެންމެ ވަރުގަދަ ޙަމަލާއެވެ. އީރާނުގެ އިސްލާމީ އިންޤިލާބީ ލަޝްކަރުގެ ކުރީގެ އިސްވެރިޔާ ސުލައިމާނީ އަވަހާރަ ކޮށްލާފައި ވަނީ 2020 ވަނަ އަހަރު އެމެރިކާއިން ޢިރާޤުގައި ދިން ޑްރޯން ޙަމަލާއެއްގައެވެ.
އީރާނަށް ދިން އެ ބޮމުގެ ޙަމަލާ އދގެ ސަލާމަތީ މަޖިލީހުން ވަނީ ކުށްވެރިކޮށްފައެވެ. "ސަލާމަތީ މަޖިލީހުން ކަރްމާން ސިޓީގައި ދިން ބިރުވެރި ޙަމަލާ އެންމެ ހަރުކަށި އިބާރާތުން ކުށްވެރިކުރި" ސަލާމަތީ މަޖިލީހުން ނެރުނު ބަޔާނެއްގައި ބުނެފައިވެއެވެ.