މާލޭގައި ޢިމާރާތްކުރާ 4 ޕާކިންގ ބިލްޑިންގގެ މަސައްކަތް މިމަހު ފަށަނީ

މާލޭގައި އަލަށް ޢިމާރާތްކުރާ 4 ޕާކިންގ ބިލްޑިންގގެ މަސައްކަތް މިމަހު ފަށާނެކަމަށް މާލެ ސިޓީ ކައުންސިލުން ވިދާޅުވެއްޖެއެވެ.

ހިތްފަސޭހަ އަމާން ތަނަކަށް މާލެ ހެދުމަށް ދިމާވާ އެންމެ ބޮޑު މައްސަލައަކީ މާލޭގެ ޕާކިންގ މައްސަލަކަން މާލެ ސިޓީ ކައުންސިލްގެ އެކްޓިން މޭޔަރ އަޙްމަދު ނަރީޝް ވަނީ ފާހަގަ ކުރައްވާފައެވެ. މާލެ ސަރަޙައްދަކީ ވަރަށްބޮޑަށް ތޮއްޖެހިފައިވާ ސަރަޙައްދެއްކަމަށާއި، އެކަން ޙައްލު ކުރުމަށް ގިނަ މަސައްކަތްތަކެއް ކުރައްވާކަމަށް ނަރީޝް ވަނީ ވިދާޅުވެފައެވެ.

ޕީއެސްއެމް ނިއުސްއަށް މައުލޫމާތު ދެއްވަމުން މާލޭ ސިޓީގެ އެކްޓިންގ މޭޔަރ އަޙްމަދު ނަރީޝް ވިދާޅުވީ، މާލޭގައި ވެހިކަލް ޕާކްކުރުމުގެ މައްސަލަ ހައްލުކުރުމަށް ކުރާ މަސައްކަތުގެ ދަށުން ސިޓީ ކައުންސިލުން އަޅާ ހުރިހާ އިމާރާތެއްގައި ޕާކިން އޭރިޔާ ލައިގެން އެޅުމަށް ނިންމާފައި ވާކަމުގައެވެ. އަދި މިކަމުންވެސް ބަދަލުތަކެއް އަންނާނެކަމަށް ބެލެވޭކަމަށް ނަރީޝް ވިދާޅުވިއެވެ.

ނަރީޝް ވިދާޅުވީ ސަރުކާރާއި ގުޅިގެން ޕާކިންގ ބިލްޑިންގ ތަކެއްގެެ މަސައްކަތް ފެށުމަށް ހަމަޖެހިފައި ވާކަމުގައެވެ. އަދި މިމަހުގައި 4 ޕާކިންގ ބިލްޑިންގއެއްގެ ޢަމަލީ މަސައްކަތް ފަށާނެކަމަށްވެސް ނަރީޝް ވިދާޅުވިއެވެ. ނަރީޝް ވަނީ މި 4 ބިލްޑިންގ އަޅާނެ ތަންތަން ސިޓީކައުންސިލުން ހާމަކުރާނެކަމަށް ވިދާޅުވިއެވެ.

ނަރީޝް ވިދާޅުވީ މިމަހުގައި އަމަލީ މަސައްކަތް ފެށުމަށް ހަމަޖެހިފައިވާ ޕާކިންގ ބިލްޑިންގތަކުގެ މަސައްކަތް 8 ވަރަކަށް މަސް ތެރޭ ނިންމާ އާއްމުންނަށް ބޭނުންކުރަން ފެށޭވަރުވާނެކަމަށެވެ.

ހިތްފަސޭހަ އަމާން ތަނަކަށް މާލެ ހެދުމަށް، ޕާކިންގެ މައްސަލައަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމަނިކުފާނު މާލޭގެ މޭޔަރުކަމުގައި ހުންނެވިއިރު ދެކުނު ތަޞައްވުރުތަކުގެ ތެރެއިން ދިމާވި އެންމެ ބޮޑު މައްސަލަކަމުގައި ނަރީޝް ވަނީ ފާހަގަކުރައްވާފައެވެ.

ނަރީޝް ވިދާޅުވީ މާލެއަކީ "ކޮންޖެސްޓް ވެފައިވާ އޯލްޑް ސިޓީ" އެއް ކަމުގައެވެ. އަދި މިއޯލްޑް ސިޓީ ޑިވޮލޮޕް ކުރަން ޖެހޭ ކަމަށާއި، ހިތްފަސޭހަ އަމާން ތަނަކަށް މާލެ ހަދަން ޖެހޭކަމަށް ނަރީޝް ވަނީ ފާހަގަކުރައްވާފައެވެ. އަދި މިބަދަލުތައް ސަރުކާރާއި ސިޓީ ކައުންސިލް ގުޅިގެން ކުރިއަށް ގެންދެވޭނެކަމަށްވެސް އެކްޓިން މޭޔަރު ވިދާޅުވިއެވެ.