ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަރިހަށް އިންޑިޔާގެ އެކްސްޓަރނަލް އެފެއަރޒް މިނިސްޓަރ ސުޝްމާ ސުވަރާޖް އިޙްތިރާމްގެ ޒިޔާރަތެއް ކުރައްވައިފިއެވެ.
މިބައްދަލުކުރެއްވުން އޮތީ މިއަދު ހެނދުނު ލީލާ ޕެލަސްގައެވެ. މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި 'މޯލްޑިވްސް އިންވެސްޓްމަންޓް ފޯރަމް' އިންޑިޔާގެ މުމްބާއީގައި ބޭއްވުމަށް ހަމަޖެހިފައިވާކަން ފާހަގަ ކުރައްވަމުން ، އިންޑިޔާގެ އިންވެސްޓަރުންނަށް ދިވެހިރާއްޖެއިން އަބަދުވެސް މަރުޙަބާ ދަންނަވާ ކަމަށް ވިދާޅުވިއެވެ. އަދި މި ސަރުކާރުގެ ފަރާތުން އިންޑިޔާއާ ގުޅިގެން ޓެރަރިޒަމް އާ ދެކޮޅަށް މަސައްކަތް ކުރުމަށާއި އިންޑިއަން އޯޝަންގެ ސަލާމަތްތެރިކަމާއި ރައްކާތެރިކަމަށް މަސައްކަތްކުރުމަށް އެއްބާރުލުން ދެއްވާނެ ކަމުގައި ވިދާޅުވިއެވެ.
ރައިސުލްޖުމްހޫރިއްޔާ ފާހަގަކުރެއްވި ގޮތުގައި، އިންޑިޔާއާ ގުޅިގެން ދިވެހިރާއްޖޭގެ ރައްކާތެރިކަމަށްޓަކައި މިހާރު ކުރިއަށް ގެންދެވޭ ކަންތައްތަކަކީ ދެ ޤައުމުގެ ޚާރިޖީ ގުޅުން ބިނާވެފައިވާ މައިގަނޑު އަސާސެވެ. މި ބައްދަލުކުރެއްވުމުގައި ތްރިވަނަންތަޕޫރަމްގައި މޯލްޑިވިއަން އެޑިއުކޭޝަނަލް އެންޑް ކަލްޗަރަލް ސެންޓަރެއް ޤާއިމުކުރެއްވުމާބެހޭ ގޮތުން ރައީސުލްޖުމްހޫރިއްޔާއާއި އިންޑިޔާގެ މިނިސްޓަރ އޮފް އެކްސްޓަރނަލް އެފެއާޒް މަޝްވަރާ ކުރެއްވިއެވެ.