މެޕްސް ކޮލެޖުން ހިންގި ފަންސާހަށްވުރެ ގިނަކޯހުން ނުވަދިހަ ފަސް ދަރިވަރަކު ދަސްވެނިވިއްޖެއެވެ.
ދަރުބާރުގޭގައި ބޭއްވި މެޕްސް ކޮލެޖުގެ ދަސްވެނިވުމުގެ ރަސްމިއްޔާތުގައި، ރޭވަނީ ސަނަދު ޙާސިލްކޮށްފައިވާ ސެޓްފިކެޓް ލެވެލް އިން ފެށިގެން މާސްޓަރސް ލެވެލްގެ ކޯސްތަށް ފުރިހަމަކުރި ދަރިވަރުންނާ ސަނަދު ޙަވާލުކޮށްދެއްވާފައެވެ. މެޕްސް ކޮލެޖުން ސަނަދު ޙާޞިލްކުރި ކޯސްތަކުގެ ތެރޭގައި، އޭއައިބީ މާސްޓާރސް އޮފް ބިޒްނަސް އެޑްމިނިސްޓްރޭޝަނާއި، ޑިޕްލޮމާ އިން ބިޒްނަސް މެނޭޖްމަންޓާއި، ޑިޕްލޮމާ އިން މާކެޓިންގ މެނޭޖްމަންޓާއި، ޑިޕްލޮމާ އިން ޓެރެވަލް ޓޫރިޒަމް ހޮސްޕިޓަލިޓީ މެނޭޖްމަންޓާއި، އެޑްމިނިސްޓްރޭޝަނާއި ފައުންޑޭޝަން ބިޒްނަސް އިންފޮމޭޝަން ކޯސްތަށް ފަދަ ކޯސްތަށް ހިމެނެއެވެ.
މީގެ އިތުރުން މެޕްސް ކޮލެޖުން ހިންގި ތަފާތު އެކި ކޯސްތަކުން އެންމެ މަތީ މާރކްސް ހޯދި 16 ދަރިވަރަކު ވަނީ އެކަޑަމިކް އެޗީވްމަންޓް އެވޯޑު ޙާސިލްކޮށްފައެވެ. އެ ދަރިވަރުންނަށް އެވޯޑު ޙަވާލުކޮށްދެއްވީ މިރަސްމިއްޔާތުގެ ޝަރަފުވެރި މެހުމާނު ޔޫއެން ރެޒިޑެންސް ކޯޑިނޭޓަރ ޝޯކޯ ނޯޑާއެވެ. ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން ޔޫއެން ރެޒިޑެންޓް ކޯޑިނޭޓަރ ދެއްކެވި ވާހަކަފުޅުގައި، ޖިންސުގެ ތަފާތުކަން ނައްތާލާ ތަޢުލީމް ފޯރުކޮށްދިނުމުގައި ރާއްޖެއިން ފާހަގަކޮށްލެވޭ ފަދަ ކާމިޔާބީތަކެއް ހޯދާފައިވާ ކަަން ފާހަގަކުރެއްވިއެވެ. އެހެންނަމަވެސް އަދިވެސް ބައެއް ދާއިރާތަކުގައި އަންހެނުންގެ ދައުރު ކުޑަކަން ފާހަގަ ކުރައްވައި ރާއްޖޭގައި ވަޒީފާ އަދާނުކުރާ އަންހެނުންގެ ނިސްބަތަކީ 39 އިންސައްތަކަން ފާހަގަކުރެެއްވިއެވެ.
މިރަސްމިއްޔާތުގައި ވާހަކަދައްކަވަމުން މެޕްސް ކޮލެޖުގެ ޑެޕިއުޓީ ރެކްޓަރ އަބްދުލް އަޒީޒް އިބްރާހީމް ވިދާޅުވީ، މެޕްސް ކޮލެޖުން ދެއްވާ ތަޢުލީމްގެ ފެންވަރު މަތިކޮށް، އެތަން ޔުނިވަރސިޓީއަކަށް ބަދަލުކުރެއްވުމުގެ މަސައްކަތް ފަށްޓަވާފައިވާ ކަމަށެވެ.
އޭނާ ވިދާޅުވީ، މިސަރަޙައްދުގެ އެންމެ ވަރުގަދަ ބިޒްނަސް ސްކޫލަކަށް މެޕްސް ކޮލެޖު ހެދުމަކީ އެކޮލެޖުގެ އެންމެ ބޮޑު އަމާޒު ކަަމަށާއި ފާއިތުވެދިޔަ ދެ އަހަރު އެކޮލެޖުން 400 އަށްވުރެ ގިނަ ދަރިވަރުން ދަސްވެނިވިވެފައިވާ ކަމަށެވެ. ދަސްވެނިވުމުގެ ރަސްމިއްޔާތުގައި މެޕްސް ކޮލެޖަށް ޚާއްސަ ޚިދުމަތްތަކެއް ކޮށްދީފައިވާ ފަރާތްތަކާއި، މީހުން ބިނާކުރުމުގައި އެހީތެރިކަން ފޯރުކޮށްދީފައިވާ އެކި ފަރާތްތަކަށް ވަނީ އެވޯޑު ދީފައެވެ. މީގެ އިތުރުން ބްލޫ ޓޯރޗް އެވޯޑާއި، ގްރީން ޓޯރޗް އެވޯޑާއި ކްރިސްޓަލް އެވޯޑުގެ ނަމުގައި ޚާއްސަ އެވޯޑުތަކެއް ދީފައިވެއެވެ.