މަޖިލީހުގެ ރައީސާއި ނައިބު ރައީސް މަޤާމުން ވަކިކުރަން ޕީޕީއެމް/ޕީއެންސީން ހުށަހަަޅައިފި

ރައްޔިތުންގެ މަޖިލީހުގެ ރައީސް މުޙައްމަދު އަސްލަމާއި ނާއިބު ރައީސް އަހުމަދު ސަލީމް މަޤާމުން ވަކިކުރަން އިތުބާރު ނެތްކަމުގެ މައްސަލައެއް ޕީޕީއެމް/ޕީއެންސީން ހުށައަޅައިފިއެވެ.

މަޖިލީހުގެ ރައީސާއި ނާއިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުއްވީ ރައްޔިތުންގެ މަޖިލީހުގެ 23 މެންބަރުންގެ ސޮޔާއެކުއެވެ.

މަޖިލީހުގެ ރައީސް މަގާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ ރައްޔިތުންގެ މަޖިލީހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެންބަރުންގެ ސޮޔާއިއެކުއެވެ. އެއީ މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 22 މެންބަރުންގެ ސޮއިއެވެ.

23 މެމްބަރުންގެ ސޮޔާއެކު ހުށަހެޅި އިތުބާރު ނެތްކަމުގެ މައްސަލައިގައި ޕީޕީއެމް ޕީއެންސީގެ މެމްބަރުންގެ އިތުރުން، އެމްޑީއޭގެ މެމްބަރުންނާއި އަމިއްލަ ބައެއް މެމްބަރުންވެސް ސޮއިކޮށްފައިވެއެވެ.

ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމަށް ހުށަހެޅި މައްސަލައިގައި ބުނެފައި ވަނީ މަޖިލީހުގެ ރައީސާއި ނައިބު ރައީސް މަސައްކަތްކުރައްވަނީ މަގާމުގެ ނުފޫޒު ބޭނުންކޮށްގެން ވަކި ޕާޓީއެއްގެ މަސްލަހަތު ކުރިއަރުވަންކަމަށެވެ. މީގެއިތުރުން ވަޒީރުންނަށް ރުހުން ދިނުމުގެ މައްސަލައިގައިވެސް މަޖިލީހުގެ ރިޔާސަތުން އަމަލުކޮށްފައިވަނީ މަޖިލީހުގެ ޤަވާއިދާއި ޤާނޫނުއަސާސީއާ ހިލާފަށްކަމަށްވެސް އިތުބާރު ނެތްކަމުގެ މައްސަލައިގައި ބުނެފައިވެއެވެ.

ރައްޔިތުންގެ މަޖިލީހުގެ ޤަވާއިދުގައިވާ ގޮތުން މަޖިލީހުގެ ރައީސް ނުވަތަ ނާއިބު ރައީސް މަޤާމުން ވަކިކުރެވޭނީ، އެކަމަށްޓައި ނަގާ ވޯޓްގައި ބައިވެރިވާ މެންބަރުންގެ އަޣްލަބިއްޔަތުން ފާސްކުރުމުންނެވެ.

މަޖިލީހުގެ ގަވާއިދުގައިވާ ގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށަހެޅުމުން، އެ މައްސަލައިގެ ލިޔުން ލިބޭތާ ގިނަވެގެން ރަސްމީ ބަންދުނޫން 3 ދުވަހުގެ ތެރޭގައ،ި އެ މައްސަލައިގެ ނޯޓިސް އަމީން ޢާންމު މެންބަރުންނަށާއި މަޖިލީހުގެ ރައީސަށް ފޮނުވަންޖެހޭނެއެވެ. އަދި އެނޯޓިހުގެ ތާރީޚުން ފެށިގެން ރަސްމީ ބަންދުނޫން 10 ދުވަހުގެ މުއްދަތު ދިނުމަށްފަހު، އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ މައްސަލަ އެޖެންޑާކުރަންޖެހޭނެއެވެ،

ރައްޔިތުންގެ މަޖިލީހުގެ ރައީސްގެ މަޤާމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އިންތިހާުބުވެވަޑައިގަތީ މިދިޔަ ނޮވެމްބަރުމަހުގެ 14 ވަނަ ދުވަހުއެވެ. އޭނާ މަޖިލިސް ރައީސްގެ މަޤާމަށް އިންތިހާބުވެވަޑައިގަތީ އެ މަޤާމުގައި ކުރިން ހުންނެވީ މައްޗަންގޮޅި މެދު ދާއިރާގެ މެމްބަރު އަދި ކުރީގެ ރައީސް މުހައްމަދު ނަޝީދު ނޮވެމްބަރުމަހުގެ 13 ވަނަ ދުވަހު އިސްތިއުފާދެއްވުމުންނެވެ.

މަޖިލީހުގެ ނައިބު ރައީސްގެ މަޤާމަށް ހޯރަފުށީ ދާއިރާގެ މެމްބަރު އަހުމަދު ސަލީމް އިންތިހާބުވެވަޑައިގަތީ މިދިޔަ ޑިސެމްބަރުމަހުގެ 3 ވަނަ ދުވަހުއެވެ. އޭނާ އެ މަޤާމަށް އިންތިހާބުވެވަޑައިގަތީ މަޖިލީހުގެ ނައިބު ރައީސްކަމުގެ މަޤާމުގައި އޭރު ހުންނެވި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އިސްތިއުފާ ދެއްވުމުންނެވެ.