ރާއްޖޭގައި ޑިވެލޮޕްމަންޓް ބޭންކެއް ޤާއިމުކުރުމަކީ އަމާޒެއް: ރައީސް

ރާއްޖޭގައި ޑިވެލޮޕްމަންޓް ބޭންކެއް ޤާއިމުކުރުމަކީ އަމާޒެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ބައިނަލްއަޤްވާމީ މާލީ މުޢާމަލާތްތަކާ ވިޔަފާރީގެ މުހިންމު މަންޒިލަކަށް ރާއްޖެ ހެދުމުގެ އަމާޒު ސަރުކާރުގައި އެބަހުރިކަމަށެވެ.

ރާއްޖޭގައި ޑިވެލޮޕްމަންޓް ބޭންކެއް ޤާއިމުކުރުމާ، ބައިނަލްއަޤްވާމީ ބޭންކިންގެ ޚިދުމަތް ފުޅާކުރުން އެއީ އަމާޒެއްކަމަށް ވިދާޅުވެ ރައީސް ޑރ. މުޢިއްޒު ވިދާޅުވީ މާލެ އަތޮޅު ފުނަދޫގައި މިހާރުހުރި ތެޔޮ ރައްކާކުރާ ފެސިލިޓީ އެހެން ސަރަހައްދަކަށް ބަދަލުކޮށް އެތަނުގައި ބައިނަލްއަޤްވާމީ މާލީ މުޢާމަލާތްތަކަށް ޚާއްޞަ މަރުކަޒެއް ޤާއިމުކުރައްވާނެކަމަށެވެ. އެކަން ފަހިކުރުމަށްޓަކައި ސަރުކާރުން މޯލްޑިވްސް އިންޓަނޭޝަނަލް ފައިނޭންޝަލް ސާރވިސަސް އޮތޯރިޓީ އުފައްދާފައިވާކަން ރައީސް ފާހަގަކުރެއްވިއެވެ.

ރައީސް ވިދާޅުވީ ދައުލަތުގެ ތަނަވަސްކަމާއި ކުޅަދާނަކަން ހުރި މިންވަރު އިތުރުކޮށް، އިޤްތިޞާދީ ޙައްޤުތައް ހޯދައިދިނުމަށްޓަކައި، މިހާތަނަށް ރާއްޖޭގައި ފަށާ އެންމެ ބޮޑު މަޝަރޫޢުގެ ޢަމަލީ މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން އުފައްދާ، އެ ކުންފުނި މެދުވެރިކޮށް ފަށާފައިވާކަމަށެވެ.

" އެ ކުންފުންޏަކީ ރާއްޖޭގެ ރައްޔިތުންނަށް ރަނގަޅު ކާނާއާއި، ފޭރާމާއި، ބޭހުގެ އަގު، އަދި ޢިމާރާތްކުރުމަށް ބޭނުންވާ ތަކެތީގެ އަގު އަތްފޯރާފަށަށް ގެނެސްދިނުމުގެ ނިޒާމު ހިންގުމުގެ މަސައްކަތްކުރާނެ ކުންފުންޏެއް، އަދި، ރާއްޖޭގެ ޖިއޮގްރަފިކަލް ލޮކޭޝަންގެ ބޭނުން ހިފައި، އެހެން ފްރީ ޒޯންތަކާއި ވާދަކުރެވޭފަދަ ގޮތަކަށް، ރީއެކްސްޕޯޓު ޕްރޮސެސިންގ އަދި ވެލިއު އެޑިޝަން މަސައްކަތްތައް ރާއްޖޭގައި ތަޢާރަފުކޮށް އިޤުތިޞާދު ސިންދަފާތު ކުރެވޭނެފަދަ އައު ސިނާޢަތްތަކެއްގެ ބިންގާ އެޅުމުގެ ގާބިލުކަން މި ކުންފުނީގައި ހުންނާނެ" ރައީސް ވިދާޅުވިއެވެ.

ރައީސް ވިދާޅުވީ ރާއްޖެއަކީ ބައިނަލްއަޤްވާމީ ކަނޑު ބަނދަރުގެ ޚިދުމަތަށް އެންމެ ފައްކާ އެއް ސަރަޙައްދަށްވާއިރު މި ފުރުޞަތުގެ ބޭނުން ހިފައި، މި ސަރުކާރުގެ އަމާޒު ހުރީ މޯލްޑިވްސް އިކޮނޮމިކް ގޭޓްވޭގެ ގޮތުގައި، އިހަވަންދިއްޕޮޅުގައި ބަންކަރިންއާއި ބައިނަލްއަޤްވާމީ ބިޔަ ބަނދަރަކާ ވިޔަފާރީގެ މަޝްރޫޢެއް ހިންގަންކަމަށެވެ.

" މާލެ އަތޮޅު ތިލަފުށީގައިވެސް ބައިނަލްއަޤްވާމީ ވިޔަފާރި ބަނދަރެއްގެ ޚިދުމަތް ފެށުމާއި، ލ.ގާދޫގައި ބަންކަރިންގ ޚިދުމަތް ފަށައި، މިއިން ކޮންމެ ބަނދަރަކާ ކޮންމެ ޚިދުމަތަކީ ވެސް ބޮޑެތި އިންވެސްޓްމަންޓްތަކެއް، މިއީ ރާއްޖޭގެ އާމްދަނީ އެތައް ގުނައެއް އިތުރުވެގެން ދާނެ ކަންތައްތަކެއް." ރައީސް ވިދާޅުވިއެވެ.

ރައީސް ވިދާޅުވީ، އެމަނިކުފާނުގެ ތަޞައްވުރުގައި ހުރި އިޤްތިޞާދީ ގިނަ މަޝްރޫޢުތަކުގެ ޢަމަލީ މަސައްކަތް މިއަހަރު ފަށައިގަނެވޭނެކަމަށެވެ. މިއިން ކޮންމެ މަޝްރޫޢެއް ފެށުމާއެކު ރާއްޖޭގެ އިޤްތިޞާދަށް އޭގެ މަންފާކުރާނެކަމަށާއި، ވަޒީފާއާ އާމްދަނީގެ މަގުތައް ހުޅުވި، ރައްޔިތުންނަށް ތިޔާގިކަމާ ތަނަވަސްކަން ލިބޭނެކަމުގެ ޔަޤީންކަން ރައީސްވަނީ ދެއްވާފައެވެ.