އިޤްތިޞާދާ ގުޅޭ ދޮގު ވާހަކަ ނުފަތުރާ، އޭގެ އަސަރު ކުރަނީ ރާއްޖެއަށް: ޖަނާހު

އަމިއްލަ ފައިދާއަށް ރާއްޖޭގެ އިޤްތިޞާދާ ގުޅޭ ދޮގު ވާހަކަތައް ނުފެތުރުމަށް ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުޙައްމަދު ޢަލީ ޖަނާޙު ވިދާޅުވެއްޖެއެވެ.

ޖަނާހު މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގއ. ވިލިނގިލީގެ ރައްޔިތުންނާ ބައްދަލުކުރެއްވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުޙައްމަދު ޢަލީ ޖަނާޙު ވިދާޅުވީ 1990ގެ އަހަރުތަކުން ފެށިގެން ރާއްޖޭގެ އިޤްތިޞާދު މެނޭޖް ކުރަމުން އަންނަނީ އިކޮނޮމިކް މެނޭޖްމަންޓް އުޞޫލާ ޚިލާފަށްކަމަށެވެ. އަދި އިޤްތިޞާދާ ގުޅޭގޮތުން ކިތަންމެ ގިނަ އިކޮނޮމިސްޓުންނެއް ލަފާދިންނަމަވެސް އެއިރަކު ހުންނަ ވެރިއަކު ބޭނުންވާ ގޮތަށް އަމަލުކުރަމުން އަންނަކަން ޖަނާހު ފާހަގަކުރެއްވިއެވެ.

ޖަނާހު ވިދާޅުވީ ރާއްޖޭގެ އިޤްތިޞާދު އޮތީ އޭގެ ބުރަދަނުގައި ހިފޭވަރަށްވުރެ ބުރަ ބޮޑު ހާލަތެއްގައިކަމަށެވެ. ނަމަވެސް ރާއްޖޭގެ އިޤްތިޞާދު ރަނަގޅު ކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންނެވީ ވަރުގަދަ ޓީމެއްކަމަށެވެ.

ޖަނާހު ވަނީ ކިތަންމެ ބައިބައިވުމެއް ނުވަތަ ޚިޔާލުތަފާތުވުންތަކެއް ހުރިނަމަވެސް ރާއްޖޭގެ އިޤްތިޞާދާ ގުޅޭގޮތުން ދޮގު ޚަބަރު ނުފެތުރުމަށް އެދިވަޑައިގެންފައެވެ. އެފަދަ ޚަބަރުތަކުން އަސަރުކުރާނީ މުޅި ރާއްޖެއަށް ކަމަށް ޖަނާހު ވިދާޅުވިއެވެ.

"ރާއްޖެއަކީ ސްޓޮކް އެކްސްޗޭންޖް އޮތްތަނެއް ނޫން، ބޮޑެތި ބޭންކުތަކެއް އޮތްތަނެއް ނޫން. އަޅުގަނޑުމެންގެ ރަޙުމަތްތެރި ވިޔަފާރިވެރިން ދުނިޔޭގެ އެކި ތަންތަނަށް ދަތުރުކޮށް ލާރި ހުރިތަން ތަނުން ލާރި ހޯދައިގެން ގެނެސް މި ޤައުމު ތަރައްޤީ ކުރަމުން ދަނީ. އެހެންވީމަ ރާއްޖޭގެ އިޤްތިޞާދާ ގުޅިގެން ދައުރުކުރާ ނޭދެވޭ ޚަބަރަކީ އިންވެސްޓަރުންގެ މޭޒުމަތީގައި އޮންނާނެ އެކަން." މުޙައްމަދު ޢަލީ ޖަނާޙު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ދިމާވެފައި އޮތް ވަރުގެ އުނދަގޫ ދަތި ޗެލެންޖެއް އެއްވެސް ރައީސްއަކަށް ދިމާވެފައެއް ނެތްކަން ފާހަގަކުރައްވާ ޖަނާހު ވިދާޅުވީ އެޗެލެންޖް ކާމިޔާބު ކުރެއްވުމަށް ރައީސާއެކު މަސައްކަތް ކުރައްވާނެކަމަށެވެ. އަދި ރައީސް އެދިވަޑައިގަންނަވަނީ ޤައުމުގެ މުސްތަޤުބަލަށްޓަކައި ގޮތްތައް ހޯއްދަވަންކަމަށާއި މިޤައުމު އެހެން ބަޔަކަށް ބަރޯސާ ނުވެ އަމިއްލަ ފައިމައްޗަށް ތެދުވެ އިޤްތިޞާދު ދިވެހިންގެ އަތްމަތީގައި ބާއްވަންކަމަށްވެސް ޖަނާހު ވިދާޅުވިއެވެ.

"ރައީސް އަވަހާރަފުޅު ލައްޕަވަނީ ކިހިނެތްތޯއޭ ހިތަށް އަރާ. އެހާ ވަރުގެ ޗެލެންޖެސްތައް އެބަހުރި. އަޅުގަނޑުމެން މިތިބީ ދޫކުރާ ގޮތަކަށް ނޫން. ދުނިޔޭގެ ތާރީޚުގައި ލިޔެފައި އެބަހުރި ރާއްޖެއަކީ އަސޭކަރައިން އަސޭ މިރުސް ގަނެގެން ރާއްޖޭގައި ޓްރާންސިޓްކޮށް ރެޑްސީ ތުރޫކޮށް ވެނިސްއަށް މުދާ އުފުލާފައި އޮތްކަމަށް." މުޙައްމަދު ޢަލީ ޖަނާޙު ވިދާޅުވިއެވެ.

ޖަނާހު ވިދާޅުވީ ރައީސުލްޖުމްހޫރިއްޔާ ހުންނެވީ ކުރިން ފައްކާވެފައި އޮތް އިޤްތިޞާދު ހޯއްދަވާ ދިވެހިންގެ ފައިމައްޗަށް އިޤްތިޞާދު ނަގަހައްޓަވަންކަމަށެވެ. އަދި ރައީސް ކުރައްވާ މަސައްކަތަކީ އޮޅުން ބޮޅުމުގައި އޮތް އިޤްތިޞާދު ރަނގަޅުކުރެއްވުމަށްޓަކައި ކުރައްވާ މަސައްކަތް ކަމަށްވެސް ޖަނާހު ވިދާޅުވިއެވެ.