މިއަދު ފާހަގަކުރާ ދުނިޔޭގެ އާރތް ދުވަހާ ގުޅުވައިގެން، ފުވައްމުލަކުގައި ބައިސްކަލް ދުއްވުމުގެ ޙަރަކާތްތަކެއް ހިންގައިފިއެވެ.
ބައިސްކަލް ދުއްވުމުގެ ޙަރަކާތަކީ ބައިކް މޯލްޑިވްސްއާއި ފުވައްމުލަކު އަތޮޅު ކައުންސިލް ގުޅިގެން އިންތިޒާމުކުރި ޙަރަކާތެކެވެ. ފުވައްމުލަކު ރަސްގެފަންނު ސަރަޙައްދުގައި ބޭއްވި ރަސްމިއްޔާތުގައި މިއިވެންޓް ފަށްޓަވައިދެއްވަމުން ފުވައްމުލަކު އަތޮޅު ކައުންސިލްގެ ރައީސް އަބްދުﷲ ފަލާޙު ޝަރީފް ވިދާޅުވީ، ފުވައްމުލަކު އަތޮޅު ކައުންސިލްގެ އަމާޒަކީ ފުވައްމުލަކީ ދެހާސް ތިރީސް އަންނަން ވާއިރަށް ބައިސްކަލްގައި އުޅޭ ރަށަކަށް ހެއްދެވުން ކަމަށެވެ.
\ބައިސްކަލް ދުއްވަމަކީ ދުޅަހެޔޮ ޞިއްޙަތެއްގައި ހުރުމަށް ބާރުއަޅާ ކަމެއްގެ އިތުރަށް ތިމާވެއްޓާވެސް ރަށްޓެހި ކަމެއް ކަމަށް އޭނާ ފާހަގަކުރެއްވިއެވެ.
ފުވައްމުލަކު ރަސްގެފަންނު ސަރަޙައްދުން ފެށި ބައިސްކަލް ދުއްވުމުގެ ޙަރަކާތް ނިންމާލީ އެރަށު ބަނދަރު ސަރަޙަދަށެވެ. މި ޙަރަކާތުގައި ބައިކް މޯލްޑިވްސްގެ ޓީމާއި، ފުވައްމުލަކު ސްކޫލްތަކުގެ ދަރިވަރުންނާއި، ޢާންމު ފަރާތްތަކާއި ރަށު ކައުންސިލްތަކުން ވަނީ ބައިވެރިވެފައެވެ.