އުމުރަށް ޖަލަށްލާފައި ތިބި 314 މީހަކު ނިމިދިޔަ ސަރުކާރުން ދޫކޮށްލާފައިވޭ: ވަޒީރު

މަސްތުވާތަކެތީގެ ވިޔަފާރިކޮށްގެން އުމުރަށް ޖަލަށްލާފައި ތިބި 314 މީހަކު ނިމިދިޔަ ސަރުކާރުން މައާފް ދިނުމަށްފަހު ޖަލުން ދޫކޮށްލާފައިވާކަމަށް ދާޚިލީ ސަލާމަތާއި ފަންނިއަޔާތާބެހޭ ވަޒީރު އަލީ އިހްސާން ވިދާޅުވެއްޖެއެވެ.

އެ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ ރާއްޖޭގައި ކުށްކުރާ މިންވަރު ގިނަވަމުންދާއިރު، އެކަމުގެ މައިގަނޑު ސަބަބަކީވެސް މަސްތުވާތަކެތިކަން ފާހަގަކޮށްފައިވެއެވެ.

ދާޚިލީ ސަލާމަތާއި ފަންނިއަޔާތާބެހޭ ވަޒީރު އަލީ އިހްސާން ވިދާޅުވީ މަސްތުވާތަކެތީގެ މައްސަލައެއްގައި މީހަކު އުމުރަށް ޖަލަށް ލެވެނީ ފުލުހުން ވަރަށް ބުރަ މަސައްކަތްތަކެއް ކޮށްގެންކަމަށެވެ. އެގޮތުން މީހެއްގެ މައްޗަށް ޑަރަގް ޓްރެފިކް ކުރި ކަމުގެ ތަހުގީގުނިމި، ދައުވާކޮށް، އެތައް ދުވަހެއްގެ ކޯޓް މަރުހަލާގެ ތަހުގީގެއް ގޮސްގެން ނޫނީ ޝަރީއަތުން މީހެއްގެ މައްޗަށް އެފަދަ ކުށެއް ސާބިތު ނުކުރާނެކަމަށް ވަޒީރު ވިދާޅުވިއެވެ.

މަސްތުވާތަކެތީގެ ވިޔަފާރިކުރާ މީހުން މިނިވަންްކުރުމަކީ ކުށްމަދުކުރުމަށް އެޅިފައި އޮތް ހުރަހެއްގެ އިތުރުން، ވައްކަމާއި ފޭރުމުގެ މައްސަލަ ތަކުގައިވެސް ގިނައިން ހަރަކާތްތެރިވެ އުޅެނީ މަސްތުވާތަކެތި ބޭނުންކުރާ މީހުންކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ އެތައް ދުވަހެއްގެ ބުރަ މަސައްކަތުން ބޮޑެތި ކުށްވެރިން ޖަލަށްލީނަމަވެސް އެމީހުން ޖަލު ދޫކޮށްލާ މަންޒަރު ފެންނަކަމަށާއި، އެއީ ވަރަށް ބޮޑު ކަންބޮޑުވުމެއްކަމަށެވެ. އެގޮތުން މަސްތުވާތަކެތީގެ މައްސަލަތަކުގައި އުމުރަށް ޖަލަށް ލާފައި ތިބި 300 އަށްވުރެ ގިނަ މީހުން މިދިޔަ 5 އަހަރު ތެރޭގައި މައާފްދިނުމަށްފަހު ޖަލުން ދޫކޮށްލާފައިވާކަން ވަޒީރު ފާހަގަކުރެއްވިއެވެ. އަދި އެކަމުގެ ސަބަބުން މަސްތުވާތަކެތީގެ މައްސަލަ ހައްލުކުރަން އުނދަގޫތަކެއް ކުރިމަތިވާކަމަށްވެސް ވަޒީރު ވިދާޅުވިއެވެ.

"މިގޮތަށް ދޫކުރެވިފައި ތިބި މީހުން ތަކުރާރުކޮށް އަނެއްކާ ފެންނަމުންދާކަން ފާހަގަކުރަން. 314 މަސްތުވާތަކެތީގެ ޓްރެފިކް ކުރާ މީހުން އާންމު މުޖްތަމައަށް ދޫވެގެން ދިއުމަކީ މަސްތުވާ ތަކެތީގެ މައްސަލަ ހައްލު ކުރަން އަންނަ ވަރަށް ބޮޑު އުނދަގުލެއް." ވަޒީރު ވިދާޅުވިއެވެ.

ރާއްޖޭގެ ކުށުގެ މާހައުލުގައި ހިނގާ ގިނަ ކުއްތަކަކީ މަސްތުވާތަކެއްޗާއި ގުޅުން އޮތް ކުށްތަކަށްވާއިރު، ސަރުކާރުން ގެންދަވަނީ އެ މައްސަލައަށް ވަަށާޖެހޭ ހައްލެއް ހޯދައިދިނުމުގެ މަސައްކަތްކުރަމުންނެވެ. އެގޮތުން މަސްތުވާތަކެތި އެތެރެކުރުން ހުއްޓުމަށް ކުރާ މަސައްކަތުގެ އިތުރުން، މަސްތުވާތަކެތި ބޭނުންކުރާ މީހުންނަށް ފަރުވާދެވޭނެ ސެންޓަރުތައްވެސް އެކި ކަންކޮޅުތަކުގައި ދަނީ ޤާއިމްކުރައްވަމުންނެވެ.