މެންބަރު އިސްމާޢީލްގެ މައްޗަށް 850،000 ރުފިޔާގެ ދަރަންޏެއް ސާބިތުވެއްޖެ
-
ޙުކުމުގައި ވަނީ 15 ދުވަހުގެ ތެރޭގައި ފައިސާ ދައްކާ ޚަލާސްކުރުމަށް
-
ޙުކުމް ކުރީ މިދިޔަ މަހުގެ 29 ވަނަ ދުވަހު
-
އަދާކުރަންޖެހޭ ސާބިތު ދަރަންޏެއް އޮތްނަމަ މެންބަރުކަމަށް ޝަރުތު ހަމަނުވާނެ
ދުވާފަރު ދާއިރާގެ މެންބަރު އިސްމާއީލް އަޙްމަދު ދަރަންޏެއް ސާބިތުވެ 15 ދުވަހުގެ ތެރޭގައި އެ ދަރަނި ދައްކާ ޚަލާސްކުރުމަށް ސިވިލް ކޯޓުން ޙުކުމްކޮށްފިއެވެ.
މެންބަރު އިސްމާޢީލްގެ މައްޗަށް ދަރަންޏެއް ސާބިތުވީ، ތ.އަތޮޅު ކަނޑޫދޫ ސްކޫލުގައި ތިން ކްލާސް ރޫމްގެ ޢިމާރާތެއް އެޅުމުގެ މަޝްރޫޢު، އޭނާގެ ކުންފުންޏަކުން ނަގައިި ސަބް ކޮންޓްރެކްޓަރެއްގެ ގޮތުގައި ހަމަޖެއްސި މޫސާ ހަލީލް ކިޔާ މީހަކަށް ފައިސާ ދައްކާފައި ނުވާތީއެވެ. އެގޮތުން އެކުންފުންޏަށް މަސައްކަތް ހަވާލުކުރީ 1.28 މިލިއަން ރުފިޔާއަށްނަމަވެސް މަސައްކަތްކުރި މިހާއަށް 425،000 ރުފިޔާ ދިނުމަށް ފަހު ބާކީ ފައިސާ ދީފައި ނުވާކަމަށް ޙުކުމުގައިވެއެވެ. މިދިޔަ މަހުގެ 29ގައި ސިވިލް ކޯޓުން ކުރި ޙުކުމުގައި ވަނީ އެ ދުވަހުން ފެށިގެން 15 ދުވަހުގެ ތެރޭގައި 856،830.19 ރުފިޔާގެ ދަރަނި ސިވިލް ކޯޓަށް ދައްކައި ހަލާސްކުރަން އިސްމާޢީލް އަޙްމަދުގެ މައްޗަށް ޢަމުރުކުރާކަމަށެވެ.
ދަޢުވާއަށް ޖަވާބުދާރީވާން ސިވިލް ކޯޓުން ދިން ފުރުޞަތުގައި މެންބަރު އިސްމާޢީލް އަޙްމަދު ޖަވާބުދާރީވެފައިނުވެއެވެ. އެހެންކަމުން ކޯޓުން އޭނާގެ މައްޗަށް ދަރަނި ސާބިތުވާކަމަށް ހުކުމް ކުރީ ޣައިރު ހާޒިރުގައެވެ.
ޤާނޫނު އަސާސީގައި ބަޔާންކުރަނީ އަދާކުރަންޖެހޭ ސާބިތު ދަރަންނެއް އޮތް މީހަކު، އެ ހުކުމާ އެއްގޮތަށް ދަރަނިއަދާކުރަމުން ނުދާކަމުގައިވަނީނަމަ، އެމީހާގެ މެންބަރުކަމުގެ ޝަރުޠު ހަމަނުވާކަމަށެވެ.