ޓެކްސް ކޮމިޝަނަރުގެ މަޤާމަށް ޔަޒީދާއި ޒަރީރުގެ ނަން
-
ޔަޒީދަކީ ކުރިން ކޮމިޝަނަރ އަދި ޒަރީރަކީ ޑެޕިއުޓީ ކޮމިޝަނަރ
-
އެދެބޭފުޅުންގެ މަޤާމު ގެއްލުނީ 2019 ވަނަ އަހަރު ޤާނޫނަށް ގެނައި އިޞްލާހުން
-
ދެބޭފުޅުންގެ ނަންފުޅު ދިރާސާކުރަން ވަނީ ކޮމިޓީއަށް ފޮނުއްވާފައި
ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ކުރިމަތިލެއްވި ބޭފުޅުންގެ ތެރެއިން ކުރިން އެ މަޤާމުގައި ހުންނެވި ޔަޒީދު މުޙައްމަދާއި، ކުރީގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަން ޙަސަން ޒަރީރުގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފިއެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމު ހުސަވީ ކުރިން އެ މަޤާމުގައި ހުންނެވި ފަތުހުﷲ ޖަމީލް ރައްޔިތުންގެ މަޖިލީހުގެ އިންތިޚާބުގައި ވާދަކުރެއްވުމަށް އިސްތިއުފާ ދެއްވުމުންނެވެ.
ރައްޔިތުންގެ މަޖިލީހަށް ރައީސުލްޖުމްހޫރިއްޔާ ފޮނުއްވެވި ސިޓީފުޅުގައި ބަޔާންކުރައްވާފައިވަނީ، ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އާންމުކޮށް ހުޅުވައިލުމުން، ކުރިމަތިލެއްވި ބޭފުޅުންގެ ތެރެއިން އެ މަޤާމަށް ޝަރުތު ހަމަވާ ބޭފުޅުންނަކީ ޔަޒީދު އަދި ޒަރީރު ކަމަށެވެ.
މަޖިލީހުގެ މިއަދުގެ ޖަލްސާގައި ރައީސް ފޮނުއްވާފައިވާ އެ ދެނަންފުޅު ދިރާސާކުރެއްވުމަށް ވަނީ އިޤްތިޞާދީ ކޮމިޓީއަށް ފޮނުއްވާފައެވެ.
ޔަޒީރު އަދި ޒަރީރުގެ މަޤާމު ކުރިން ގެއްލުނީ، 2019 ވަނަ އަހަރު، ޓެކްސް ނެގުމުގެ އިދާރީ ޤާނޫނަށް ގެނައި އިޞްލާހާއި ގުޅިގެންނެވެ. އެ އިޞްލާހުގައި ވަނީ ޤާނޫނަކަށްވެ އަމަލު ކުރަން ފަށާ ތާރީޚުން ފެށިގެން 30 ދުވަހުގެ ތެރޭގައި ކޮމިޝަނަރ ޖެނެރަލް އޮފް ޓެކްސޭޝަނާއި، ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އަލުން މީހަކު އައްޔަން ކުރަން ޖެހޭނެކަމަށެވެ. އަދި އެ މުއްދަތުގެ ތެރޭގައި މީރާގެ ބޯޑު އަލުން އެކުލަވާލަން ޖެހޭނެކަމަށްވެސް އޭރު ގެނައި އިޞްލާހުގައިވެއެވެ.