އާރުޑީސީގެ ޚިޔާނާތުގެ މައްސަލައިގެ ތަހްގީގް ނިމުމަކާ ގާތަށް، ވަރަށް އަވަހަށް ދައުވާކުރަން ފޮނުވޭނެ: ފުލުހުން

ރޯޑް ޑިވޮލޮޕްމެންޓް ކޯޕަރޭޝަން، އާރުޑީސީގެ ފައިސާތަކަށް ޚިޔާނާތްތެރިވިކަމަށް ތުހުމަތުކުރެވޭ މައްސަލައިގެ ތަހުގީގް ނިމުމަކާހަމައަށް އައިސްފައިވާކަމަށް ފުލުހުން ވިދާޅުވެއްޖެއެވެ.

މިދިޔަ ސަރުކާރުގައި އުފެއްދި ކުންފުންޏެއްކަމަށްވާ އާރުޑީސީގެ އެކައުންޓަކުން، އެ ކުންފުނީގެ ވެރިއެއްގެ އެކަންޓަކަށް 14 މިލިއަން ރުފިޔާ ވަދެފައިވާ މައްސަލަ ފެންމަތިވެގެން އެ މައްސަލަ ތަހުގީގުކުރަން ފެށީ މިދިޔަ އަހަރުގެ ނޮވެމްބަރުމަހުއެވެ.

މި މައްސަލައާއި ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން ފުލުހުންގެ ފުލުހުންގެ ހެޑް އޮފް ފައިނޭންޝަލް ކްރައިމް ޔުނިޓްގެ އިންސްޕެކްޓަރ އޮފް ޕޮލިސް ޔޫސުފް ލޫތު ވިދާޅުވީ މި މައްސަލާގައި ތުހުމަތުކުރެވޭ 3 މީހަކާ ސުވާލުކޮށް ތަހުގީގުގެ ބޮޑު ބައެއް ނިމިފައިވާކަމަށެވެ. ކޯވިޑްގެ ތެރޭގައި ފައިސާގެ މުއާމަލާތަށް ގެނައި ބަދަލަކާއި ގުޅިގެން އެ ކުންފުނީގެ ފައިސާ އެތަނުގެ އިސް ވެރިންގެ އެކައުންޓަށް ޖަމާކޮށް ދައުރުކޮށްފައިވާކަން ފާހަގަކުރެވިފައިވާކަމަށެވެ. ކޯވިޑުގެ ޙާލަތު ނިމުނުއިރުވެސް އެކަމަށް ބަދަލު ނުގެނެސް އޮޅުވާލައިގެން އަދި މަކަރާ ހީލަތުން ފައިސާއަށް ޚިޔާނާތްތެރިވެފައިވާކަން ފާހަގަވެފައިވާކަމަށް ވިދާޅުވިއެވެ.

"އުންމީދު މިކުރަނީ ކުޑަ ދުވަސްކޮޅެއްގެ ތެރޭގައި މި މައްސަލާގައިވެސް ދައުވާކުރަން އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވޭވަރަށް އަޅުގަނޑުމެންނަށް ތަހްގީގް ފުރިހަމަ ކުރެވޭނެކަމަށް." ލޫޠު ވިދާޅުވިއެވެ.

ފުލުހުން މީގެ ކުރިން ވިދާޅުވެފައިވަނީ މި މައްސަލައިގައި ހިމެނޭކަމަށް ތުހުމަތުކުރެވޭ މީހެއްގެ އެކައުންޓަށް އާރުޑީސީގެ އެކައުންޓުން 216 ޓްރާންސެކްޝަން ހަދާފައިވާކަމަށެވެ. އަދި މިއިން ކޮންމެ ޓްރާންސެކްޝަން އެއްގެ ތެރޭގައި އެތަކެއް މީހަކާއި ގުޅުންހުރި އިތުރު ޓްރާންސެކްޝަންތައް ހިމެނޭ ކަމަށާއި އަދި އޭގެއިން ކޮންމެ އެކައުންޓެއްގެ މައުލޫމާތަކީ ވަކިވަކިން ހޯދަންޖެހޭ މައުލޫމާތު ކަމަށްވެސް ފުލުހުން ވިދާޅުވެފައިއެވެ.

ފުލުހުން ވިދާޅުވެފައިވަނީ ހިޔާނާތްތެރިވިކަމަށް ބެލެވޭ ފައިސާ ކުރީގެ ސަރުކާރުގެ ބައެއް ވެރިންނާއި އެމީހުންގެ މަސްހަލަތު އޮންނަ ކުންފުނިތަކަށްވެސް ވަދެފައިވާކަން ތަހުޤީޤަށް ހާމަވާކަމަށެވެ.