ޕީއެންއެފް ޖަލްސާއާގުޅިގެން އެސްއޯ ފުލުހުން ޢަމަލުކުރިގޮތުގެ ރިޕޯޓް ރައީސަށް ލިބިއްޖެ

ޕީޕަލްސް ނޭޝަނަލް ފްރޮންޓް، ޕީ.އެން.އެފްއިން ޣިޔާޘުއްދީން ސްކޫލްގައި ބާއްވަން އުޅުނު ޖަލްސާއަށް ހުރަސްއަޅައި، އެސްއޯ ފުލުހުން ޙަރަކާތްތެރިވުމާއި ގުޅިގެން، ރައީސުލްޖުމްހޫރިއްޔާ އެދިވަޑައިގެންފައިވާ ތަޙްޤީޤު ރިޕޯޓް އެމަނިކުފާނަށް އަރުވައިފިއެވެ.

ޕީއެންއެފް އުފައްދަން ރޭ ޣިޔާޘުއްދީން ސްކޫލްގައި ބާއްވަން އުޅުނު ޖަލްސާއަށް ހުރަސްއަޅައި އެސްއޯ ފުލުހުން ނުކުމެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސީދާ އިރުޝާދާ ޚިލާފަށްކަމަށް އެމަނިކުފާނު ވަނީ ވިދާޅުވެފައެވެ. އަދި އެ އެންގުމާ ޚިލާފުވީ ބަޔަކަށް ފިޔަވަޅު އަޅުއްވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.

މިކަމާގުޅިގެން ސަރުކާރުން ވިދާޅުވީ، ރޭގައި ޣިޔާޘުއްދީން ސްކޫލްގައި އެސްއޯ ފުލުހުން ޙަރަކާތްތެރިވުމާއި ގުޅިގެން، ރައީސުލްޖުމްހޫރިއްޔާ އެދިވަޑައިގެންފައިވާ ތަޙްޤީޤު ރިޕޯޓް އެމަނިކުފާނަށް މިހާރު ވަނީ ލިބިވަޑައިގެންފައިވާކަމަށެވެ. އަދި މި ރިޕޯޓް ދިރާސާކުރައްވައި، އަޅުއްވަވަން ފެނިވަޑައިގަންނަވާ ފިޔަވަޅުތައް އަޅުއްވަވަމުން ގެންދަވާނެކަމަށެވެ.

ރައީސްގެ ރަސްމީ ގެ މުލިއާގޭގައި ޢީދު ސަލާމްކުރެއްވުމަށްފަހު ނޫސްވެރިންނާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނު ރައްޔިތުންނަށް ވެވަޑައިގެންނެވި ވަޢުދަކީ ޤައުމުގައި ހަމަޖެހުން ޤާއިމްކުރުންކަމަށެވެ. ކުރީގައި ރާއްޖެއިން ފެނުނުފަދަ ބަދަލު ހިފުމުގެ ރޫހު ނުގެންގުޅުއްވާނެކަމަށާއި، ސިޔާސީ ޚިޔާލު ފާޅުކޮށްގެން އެއްވެސް މީހަކަށް ދޭނެ އަދަބެއް ނޯންނާނެކަމަށް ރައީސް ވިދާޅުވާ ވާހަކަފުޅު ތަކުރާރު ކުރެއްވިއެވެ.

ނަމަވެސް ޕީ.އެން.އެފް އުފެއްދުމުގެ ޖަލްސާ ޣިޔާޘުއްދީން ސްކޫލްގައި ބޭއްވުމަށް މަސައްކަތްކުރަނިކޮށް އެސްއޯ ފުލުހުން ހުރަސްއެޅި މައްސަލައަށް އިޝާރާތްކުރައްވާ ރައީސް ވަނީ ނުރުހުން ފާޅުކުރައްވާފައެވެ. އެކަމާ ހިތާމަކުރައްވާކަން ހާމަކުރައްވާ ރައީސް ވިދާޅުވީ، ހޯމް މިނިސްޓަރާއި، ކޮމިޝަނަރ އޮފް ޕޮލިސްއާއި ފުލުހުންނާއި ބައްދަލުކުރައްވާ އެމަނިކުފާނު މީގެ ކުރިން ދެއްވާފައިވާ އިރުޝާދަކީ ސިޔާސީގޮތުން އެއްވެސް މީހަކަށް ގޯނާއެއް ކުރުމަށް އެމަނިކުފާނުގެ އެއްވެސް އެންގުމެއް ނާންގަވާނެކަންކަމަށެވެ.

ސަރުކާރުގެ އެއްވެސް ހިސާބަކުން އެކަމެއް ނުކުރާނެކަމަށާއި، އެކަމެއް ހިނގައިފިނަމަ ފިޔަވަޅު އަޅުއްވާނެކަމަށް ވިދާޅުވެފައިވާނެކަމަށެވެ. އެމަނިކުފާނު އަބަދުވެސް ބޭނުންފުޅުވަނީ ފުލުހުން ޕްރޮފެޝަނަލްކޮށް މަސައްކަތްކުރުމަށް ކަމަށާއި، ޚާއްޞަކޮށް ކުރީގައި ފެނުނުގޮތަށް އެސްއޯ ފުލުހުން ރައްޔިތުންނަށް އަނިޔާކޮށް، ހިފާ ހައްޔަރުކުރުންފަދަ އެއްވެސް ކަމަކަށް ޖާގަ ދެއްވަން ބޭނުންފުޅުނުވާކަމަށް ރައީސް ވިދާޅުވިއެވެ.