އެންޓި ކެމްޕެއިންކުރާކަމަށް ތުހުމަތުކޮށް، މައްސަލަ ބެލުމަށް ގޮވާލައިފި

އިދިކޮޅު އެމްޑީޕީން އެންޓި ކެމްޕެއިން ކުރަމުންދާކަމަށާއި އަދި އެކަންކަން އިލެކްޝަންސް ކޮމިޝަނުން ނުބަލާކަމަށް ބުނެ ވެރިކަންކުރާ ޕީޕީއެމް/ ޕީއެންސީ ކޯލިޝަނުން ކަންބޮޑުވުން ފާޅުކޮށްފިއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ޕީޕީއެމް/ ޕީއެންސީގެ ތަރުޖަމާނު ހީނާ ވަލީދު ވިދާޅުވީ، މަޖިލިސް އިންތިހާބުގެ ކެމްޕޭނުގައި އެމްޑީޕީގެ ފަރާތުން ފެންނަނީ ސިޔާސަތުތައް ވިއްކުމުގެ ބަދަލުގައި އެންޓި ކެމްޕެއިން ކުރަމުންދާކަމަށް މަންޒަރުކަމަށެވެ. އަދި އެމްޑީޕީން މަސައްކަތް ކުރަމުންދަނީ ބަދަލު ހިފުމުގެ ރޫހެއްގައިކަމަށްްވެސް ހީނާ ވިދާޅުވިއެވެ.

ހީނާ ވިދާޅުވީ އެމްޑީޕީން އެންޓި ކެމްޕޭން ކުރަމުންދިޔަނަމަވެސް އެކަންކަން އިލެކްޝަންސް ކޮމިޝަނުން ބަލައި ފިޔަވަޅު ނާޅުއްވާތީ އެކޯލިޝަނުން ކަންބޮޑުވާކަމަށެވެ.

"އެމްޑީޕީގެ ކެމްޕޭނު ބެނާތަކުގައި އެ ބޭފުޅުންގެ ސިޔާސަތުތަކެއް ނެތް ފެންނާކަށް. އެހެން ނަމަވެސް އަޅުގަނޑުމެންނަށް ފެންނަން ހުރީ އެ ބޭފުޅުންގެ ވެރިކަން ގެއްލުމުން ނުވަތަ ވެރިކަން ބަދަލުވުމުން، އެ ލިބުނު އެއްޗެއް ގެއްލުނީމަ ވީ ތަދުން އެ ރިހުމުގައި އެންޓި ކެމްޕޭން ކުރަމުންދާތަން" ހީނާވިދާޅުވިއެވެ.

އެންޓި ކެމްޕެއިން ކުރަމުންދާ މައްސަލައިގައި ޕީޕީއެމް ޕީއެންސީ ކޯލިޝަނުން މިއަދު ވަނީ ބަޔާނެއްވެސް ނެރެފައެވެ. އެގޮތުން ވެރިކަންކުރާ ކޯލިޝަނުގެ ކެނޑިޑޭޓާއި ދެކޮޅަށް އެމްޑީޕީގެ މެޖޯރިޓީ އޮންނަ ހޯރަފުށީ ކައުންސިލުން އެންޓި ކެމްޕޭން ކުރުމުގެ އިތުރުން، އެ ކައުސިލްގެ ވަސީލަތްތައް އެމްޑީޕީގެ ކެމްޕޭނުގައި ބޭނުންކުރާކަމަށް ޕީޕީއެމް/ޕީއެންސީ ކޯލިޝަނުގެ ބަޔާނުގައި ވަނީ ތުހުމަތުކޮށްފައެވެ. އެހެންކަމުން، ކަނޑައެޅިފައިވާ އުސޫލުތަކުގެ ތެރެއިން ކެމްޕެއިން ކުރުމަށް ޕީޕީއެމް ޕީއެންސީ ކޯލިޝަނުން ވަނީ ގޮވާލާފައެވެ. އަދި ހޯރަފުށީ ކައުންސިލްގެ ވަސީލަތްތައް ނަހަމަގޮތުގައި ބޭނުންކުރާ މައްސަލަ ބެލުމަށް ކަމަބެހޭ އިދާރާތަކަށްވެސް ޕީއެންސީ އެކޯލިޝަނުން ވަނީ ގޮވާލާފައެވެ .