2008 ވަނަ އަހަރަށްފަހު، ރާއްޖޭގެ ބައެއް ދާއިރާތައް އޭރު އޮތް ސަރުކާރުގެ ފިކުރާ ދެކޮޅުވުމުން، ތަރައްޤީއިން މަޙްރޫމްވެފައިވާކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ދ. މާއެނބޫދޫ ބަނދަރު ހުޅުއްވުމުގެ ރަސްމިއްޔާތުގައި މިއަދު ވާހަކަފުޅުދައްކަވަމުންނެވެ.
ދ. މާއެނބޫދޫ ބަނދަރު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ މ. އަތޮޅާއި ލ. އަތޮޅަކީވެސް އެއަތޮޅުތަކުގައި އޭރު ތިއްބެވި ރައްޔިތުންގެ މަޖިލީހުގެ މެންބަރުންނަކީ އޭރުގައި އޮތް ސަރުކާރުގެ ފިކުރާ އިދިކޮޅު ފަރާތްތައްކަމުން އެއަތޮޅުތައް އޭރު ތަރައްޤީން މަޙުރޫމް ކޮށްފައިވާކަމަށެވެ.
މީގެ އިތުރުން 2008 ވަނަ އަހަރު އަމަލުކުރަންފެށި ޤާނޫނު އަސާސީން ރައްޔިތުންނަށް ގެނެސްދިން ހައްޤުތައް އެއީ ވަކިބަޔަކު ގެނެސްދިން ކަންކަންކަމަށް ދެއްކުމަށް މަސައްކަތްކުރާކަމަށާއި ނަމަވެސް އެއީ އެއިރުގައި އޮތް ސަރުކާރަށް ތާއީދުކުރާ ފަރާތްތަކުގެ ބޮޑު އަޣްލަބިއްޔަތެއް އޮވެގެން ފާސްކުރެވުނު ކަންކަންކަމަށް ރައީސުލްޖުމްހޫރިއްޔާ ވިދާޅުވިއެވެ.
އަދި ރާއްޖޭގެ ރަށްރަށުގެ ތަރައްޤީއަށް ކުރެވޭ ކަންކަމުގެ އެއްވެސް ޙިއްޞާއެއް އިދިކޮޅު ފަރާތްތަކަށް ނެތްކަމަށް ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ މިކަންކަމުގެ ޙިއްޞާއެއް އިދިކޮޅު ފަރާތްތަކަށް ނެތީ ރަށްރަށުގެ ތަރައްޤީއަށް ކުރެވޭ ކަންކަންވެސް އެބޭފުޅުންގެ ޚިޔާލާ އިދިކޮޅު ފަރާތްތަކުން ހުށައަޅާނަމަ އެކަމެއް ފާސްކުރައްވަން ވޯޓް ދެއްވުމަށް އިދިކޮޅު ފާރާތްތަކުން ދެކޮޅު ހައްދަވަމުން ގެންދަވާތީ ކަމަށެވެ.
މުޒާހަރާކުރުމާއި ޚިޔާލުފާޅުކުރުގެ މިނިވަންކަމާބެހޭ ގޮތުން ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ ޤައުމުގެ އަމާންކަން ނަގާލުމަކީ އެއްވެސް ރައްޔިތަކު ޤަބޫލުކުރާނެކަމެއް ނޫންކަމަށެވެ. މާލޭގެ މަގުތަކުގައި ކޮންމެ ދުވަހަކު މުޒާހަރާކޮށް، އާންމުންނަށް އުނދަގޫވާގޮތަށް މަގުމަތީ އިށީނދެ ތިބެ މުޒާހަރާކުރެވިދާނެ ކަމަށް ޤަބޫލުފުޅު ނުކުރައްވާ ކަމަށެވެ. އަދި ރައީސުލްޖުމްހޫރިއްޔާގެ އޮފީސް ކައިރީގައި ބެރުދުންމާތި ފުންމާ ނުހެދިޔަސް ރައީސުލްޖުމްހޫރިއްޔާ އަޑު އައްސަވާނެކަމަށާއި، މިސަރުކާރަކީ ރައްޔިތުންގެ އަޑުއަހާ ސަރުކާރެއްކަމަށް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ މިހާރު ބޭރުދުނިޔޭގައި ރާއްޖެއާ ބެހޭގޮތުން ދެކެވޭ ނޭދެވޭ ވާހަކަތަކުގެ މައްޗަށްވެސް އަލިއަޅުވާލައްވާ ވާހަކަދައްކަވާފައިވެއެވެ.