ޝަހީދުންގެ ދުވަހާ ގުޅުވައިގެން އައްޑޫ ސިޓީގައި ބާއްވާ ރަސްމީ ޖަލްސާގެ އިތުރުން ގިނަ ޙަރަކާތްތަކެއް ހިންގެވުމަށް ރާއްވަވާފައިވާކަމުގައި ހޯމް މިނިސްޓްރީން ވިދާޅުވެއްޖެއެވެ.
އައްޑޫގައި ޝަހީދުންގެ ދުވަހުގެ ޖަލްސާއާއި އެ ސިޓީގައި މި މުނާސަބަތުގައި ކުރިޔަށްގެންދަވަން ރާއްވަވާފައިވާ ޙަރަކާތްތަކާ ގުޅޭގޮތުން ޕީއެސްއެމްއަށް މައުލޫމާތު ދެއްވަމުން ޝާހީދުންގެ ދުވަހުގެ އިވެންޓް ޑައިރެކްޓަރ މުހައްމަދު ޢަބްދުއްސަމަދު ވިދާޅުވީ ހޯމް މިނިސްޓްރީން އައްޑޫސިޓީގައި ޝަހީދުންގެ ދުވަހުގެ ޙަރަކާތްތައް ހިންގެވުމަށް ނިންމެވީ ސަރުކާރުން އެއްވެސް ސަރަޙައްދެއް ބާކީނުކުރައްވައި އެކި ރަށްރަށުގައި މިފަދަ ދުވަސްތައް ފާހަގަކުރެއްވުމަށް ނިންމަވާފައިވާތީ އެ އުޞޫލުގެ ދަށުން ކަމަށެވެ. އެގޮތުން ޝަހީދުންގެ ދުވަހުގެ ރަސްމީ ޖަލްސާ އާދީއްތަ ދުވަހުގެ ރޭ ބޭއްވެވުމަށް ނިންމަވާފައިވާއިރު، މިއަދު ހަވީރު ކުޑަކުދިންގެ ހަވީރެއް ފާހަގަކުރެއްވުމަށް ނިންމަވާފައިވާ ކަމަށާއި އައްޑޫސިޓީގެ ހުރިހާ ރަށްތައް ބައިވެރިވާ ގޮތަށް ސައިކަލު ބުރެއް ބޭއްވެވުމަށް ނިންމަވަފައިވާކަމަށްވެސް މުޙައްމަދު ޢަބްދުއްޞަމަދު ވިދާޅުވިއެވެ.
އައްޑޫސިޓީގައި ހިންގަވަން ނިންމަވާފައިވާ ޙަރަކާތްތައް އިންތިޒާމްކުރެއްވުމަށް އެކުލަވާލައްވާފައިވާ ކޮމިޓީގެ ޗެއަރ މުޙައްމަދު ރަޝީދު ވިދާޅުވީ އައްޑޫ ސިޓީގައި ޝަހީދުންގެ ދުވަހު ރަސްމީ ޖަލްސާއާއި ޙަރަކާތްތައް ކުރިޔަށް ގެންދެއްވާތީ އުފާކުރައްވާކަމަށާއި، މިކަމަށްޓަކައި ބޮޑެތި ތައްޔާރީތައް ކުރައްވަމުން ގެންދަވާކަމަށެވެ.