ސައިކަލްތަކުގައި ރޯކޮށްލީ ކަމަށް މިހާތަނަށް ސާބިތެއް ނުވޭ: ޝިފާން

މާލޭ މަގުމަތީ ހުރި ސައިކަލުތަކުގައި ރޯވި ހާދިސާއަކީ ބަޔަކު ގަސްތުގައިކުރި ކަމެއް ކަމަށް ސާބިތުނުވާ ކަމަށް އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝިފާން ވިދާޅުވީ މިހާތަނަށް ބެލުމުން މިހާދިސާއަކީ ހިނގާފައިވާ އެކްސިޑެންޓެއް ކަމަށް ބެލެވޭކަމަށެވެ.

އެމްއެންޑީއެފުން ވިދާޅުވީ ހެންވޭރު މެހެލިގޯޅީގައި ޕާކުކޮށްފައި ހުރި ސައިކަލްތަކެއްގައި އަލިފާނުގެ ޙާދިސާއެއް ހިނގައިގެން ރިޕޯޓު ލިބިފައިވަނީ ރޭ 00:37 ހާއިރުގައިކަމަށެވެ. މިޙާދިސާގެ ރިޕޯޓު ލިބުމާއި ގުޅިގެން އެމްއެންޑީއެފްގެ ފަޔަރ އެންޑް ރެސްކިޔު ޓީމުން ކުރި މަސައްކަތުން އަލިފާން ނިއްވާލެވުނީ 00:42 ހާއިރުގައިކަމަށް އެމްއެންޑީއެފުން ވިދާޅުވެއެވެ.

ހެންވޭރު މެހެލިގޯޅީގައި ޕާކުކޮށްފައި ހުރި ސައިކަލްތަކެއްގައި ރޯވި އަލިފާން، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ނިއްވާލައިފި.https://t.co/QwSHj5M6Xa pic.twitter.com/Ob4x2GoSY3

— Maldives National Defence Force (@MNDF_Official) June 16, 2024

މިޙާދިސާގައި އެއްވެސް މީހަކަށް އަނިޔާއެއް ލިބިފައިނުވިނަމަވެސް އެސަރަޙައްދުގައި ހުރި 5 ސައިކަލެއް ބޭނުން ނުކުރެވޭވަރަށް އަނދާފައިވާކަމަށް އެމްއެންޑީއެފުން ވިދާޅުވެއެވެ. މިމައްސަލަ ތަޙުގީގުކުރަމުންދާ ކަމަށް ފުލުހުންވަނީ ވިދާޅުވެފައެވެ.

ހޮޓެލް ޖެން ކައިރީ ޕާކިންގ ޒޯނުގައި ޕާކުކޮށްފައި ހުރި ސައިކަލުތަކެއްގައި މިމަހުގެ 4 ވަނަ ދުވަހުވަނީ ރޯކޮށްލާފައެވެ. އެޙާދިސާގައި 7 ސައިކަލަކަށާއި ވޭނަކަށް ގެއްލުންވެފައިވާއިރު އޭގެ ތެރެއިން 3 ސައިކަލު ބޭނުން ނުކުރެވޭ ވަރަށްވަނީ އަނދާފައެވެ. މިމައްސަލައިގައި އަލިފާން ރޯކޮށްލި މީހާ ދެނެގަނެވިފައިވާއިރު އޭނާ ހައްޔަރުކޮށް ބަންދަށްވަނީ 30 ދުވަހުގެ މުއްދަތެއް ޖަހާފައެވެ.

އެމައްސަލައިގައި ހައްޔަރުކޮށްފައިވަނީ 36 އަހަރުގެ ދިވެހި ފިރިހެނެކެވެ.