ރައީސް މުޢިއްޒު ފެއްޓެވި ކަންކަން ކުރިއަށްދާނެ، ސަރުކާރުގެ އެއްބާރުލުން ލިބޭ: ޢާޒިމް

ޢަމާޒަކަށްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނަވައިގެން ފެއްޓެވި ހުރިހާކަމެއްވެސް އެގޮތުގައި ކުރިއަށް ގެންދިއުންކަމަށް މާލެ ސިޓިގެ މޭޔަރު އާދަމް ޢާޒިމް ވިދާޅުވެއްޖެއެވެ. މޭޔަރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުންނެވެ. ރާއްޖެމިއަދުގެ މި ޕްރޮގްރާމް މިރޭ 21:00ގައި ޕީއެސްއެމް ނިއުސްއިން ގެނެސްދޭނެއެވެ.

މާލޭގެ ތަރައްޤީއަށް ކުރިއަށްގެންދާ މުހިންމު މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުން މާލެ ސިޓީގެ މޭޔަރު އާދަމް ޢާޒިމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނަވައިގެން ފެއްޓެވި ރަނގަޅު ހުރިހާ ކަމެއް ކުރިއަށްގެންދަވާނެކަމަށާއި، އެއީ ކައުންސިލާ ރައްޔިތުންގެ ފައިދާއަށް ކުރައްވާފައިވާ ކަންތައްތަކެއްކަމަށެވެ. އަދި އެ ކަންތައް ތަންފީޒްކުރެއްވުމަށް މަސައްކަތްކުރައްވަމުން ގެންދަވާކަމަށް މޭޔަރު ވިދާޅުވިއެވެ.

"އަޅުގަނޑުގެ އަމާޒަކަށްވީހަމަ އޭރުގަ ރައީސް މުޢިއްޒު ހުންނަވައިގެން ފެއްޓެވި މަސައްކަތްތައް ހަމަ، ރަނގަޅު ހުރިހާ މަސައްކަތެއް އެ އޮތްގޮތަށް ކުރިއަށް ގެންދާނެ. އެއީ ކައުންސިލާ ރައްޔިތުންގެ ފައިދާއަށް ކޮށްފަ ހުންނަ ކަންތައްތައް. އަޅުގަނޑަށް އޮތީ އެ އިމްޕްލިމަންޓުކުރުން. އަޅުގަނޑުމެން މިޤައުމުގަ ވިސްނަން އެބަޖެހޭ ވަކި މީހަކު ކުރި މަސައްކަތެއްވީމަ ހުއްޓާލާފަ ވަކި މީހަކު ކުރިކަމެއްވީމަ ނުކޮށް ތިބުން އެ ސަގާފަތް ދޫކޮށްލަން. އެހެންނޫނީ ރައްޔިތުންގެ އެތައް ވަގުތެއް ގެއްލި ރައްޔިތުންގެ އެތައް ބައިވަރު ފައިސާތަކެއް ބޭކާރު ވެގެން އެބަދޭ." މާލޭގެ މޭޔަރު އާދަމް ޢާޒިމް ވިދާޅުވިއެވެ.

ޢާޒިމް ވިދާޅުވީ މަޤާމުތަކަށް ރައްޔިތުން އިންތިޚާބުކުރަނީ ޚިދުމަތްކުރަންކަމަށާއި، އެހެންކަމުން އަމާޒަކީ އެގޮތުގައި ކުރިއަށް ދިއުންކަމަށެވެ.

އާޒިމް ވިދާޅުވީ ކައުންސިލްގެ މަސައްކަތްތައް ކުރިއަށް ގެންދިއުމަށް މިވަގުތު ދަތިކަމެއް ނެތްކަމަށެވެ. ނަމަވެސް އިތުރަށް ސަރުކާރުގެ އެއްބާރުލުން ބޭނުންވާ ބައެއްކަންކަން ހުރިކަން ފާހަގަކުރައްވާ އާޒިމް ވިދާޅުވީ، މިހާތަނަށް މަސައްކަތްކުރެވިފައިވަނީ ސަރުކާރާ ވަރަށް ގުޅިގެންކަމަށެވެ.

ހުޅުމާލޭގެ މުނިސިޕަލް މަސައްކަތްތައް ކައުންސިލްގެ ދަށަށް ބަދަލުކުރުމަށް ކުރެވޭ މަސައްކަތްތަކަށް އަލިއަޅުއްވާލައްވާ މޭޔަރު ވިދާޅުވީ، މާލޭގައި އެ ޚިދުމަތްދޭގޮތަށް ހުލުމާލޭގައި ޚިދުމަތްދިނުމަށް ރައްޔިތުން އެދޭކަމަށެވެ. އެއީ ސަރުކާރުންވެސް އެދޭގޮތްކަން ފާހަގަކުރައްވާ ޢާޒިމް ވިދާޅުވީ މިހާތަނަށް އެކަން ނުކުރެވިއޮތީ ކޯޓު ޢަމުރެއް އޮވެގެންކަމަށެވެ.

"ދާދިފަހުންވެސް ސަރުކާރުން އެޗްޑީސީއަށް ސިޓީއެއް ފޮނުވާފައިވާކަމަށް މަޢުލޫމާތުލިބޭ އެކަންކުރުމަށް. އަޅުގަނޑު އެ ސިޓީއެއް ނުދެކެން. އެހެންކަމުން ސަރުކާރުގައިވެސް އެބައޮތް ރަނގަޅު ނިޔަތް މިކަމުގައި ހުޅުމާލެ ސިޓީ ކައުންސިލްގެ ތެރެއަށް ގެނެސްގެން މިކަންކުރަން. އެޗްޑީސީން އެއްބާރުލުން ބޮޑުކޮށްފިނަމަ މިކަމުގައި ވަރަށް ބޮޑު ކާމިޔާބީއެއް އަޅުގަނޑުމެންގެ ޤާނޫނު އަސާސީ އަދި ލާމަރުކަޒީ ޤާނޫނަށް ލިބޭނެ. އެތައް ބަޔަކު ނުކޮށް އޮތްކަމެއް ސަރުކާރާ އެޗްޑީސީއާ އަޅުގަނޑުމެންނަށް އޭރުން ކުރެވޭނެ." މާލެ ސިޓީގެ މޭޔަރު އާދަމް ޢާޒިމް ވިދާޅުވިއެވެ.

ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލްގެ ދަށަށް ބަދަލުކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދެކެވެ. އެއީ މޭޔަރުކަމުގައި ހުންނަވައިގެންވެސް އެމަނިކުފާނު މަސައްކަތްކރެއްވިކަމެވެ.

ހުޅުމާލެ މުނިސިޕަލް ހިދުމަތްތައް ހައުސިން ޑިވެލޮޕްމަންޓް ކޯޕަރޭޝަންގެ ދަށުން މާލެ ސިޓީ ކައުންސިލްގެ ދަށައް ބަދަލުކުރި ނަމަވެސް މުވައްޒަފުންގެ މުސާރައާއި އިނާޔަތްތައް އެއްވެސް އުނިކަމެއް ނެތި އެގޮތުގައި ލިބޭނެކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެއްވާފައެވެ.