ސްކޫލްތަކުގައި މަދިރި އުފެދޭ ތަންތަން ނެތްކަން ކަށަވަރު ކުރުމުގެ ޕްރޮގްރާމެއް ސްކޫލްތަކުގައި ފަށައިފިއެވެ.
ތައުލީމާބެހޭ ވަޒީރު، އައިޝަތު ޝިހާމްގެ ސީދާ ބެއްލެވުމުގެ ދަށުން، ފެއްޓެވި މިޕްރޮގްރާމް މާލެއާއި އަތޮޅުތެރޭގެ ހުރިހައި ސްކޫލެއްގައި މިހާރު ފައްޓަވާފައިވާ ކަމަށް، ތަޢުލީމާބެހޭ ވުޒާރާއިން ވިދާޅުވެއެވެ. މި ޕްރޮގްރާމާ ބެހޭގޮތުން ޕީ.އެސް.އެމަށް މައްލޫމާތު ދެއްވަމުން، އެޑިއުކޭޝަން މިނިސްޓްރީގެ ޑެޕިއުޓީ ޑިރެކްޓަރ ޖެނެރަލް، ހުސައިން ރަޝީދު ވިދާޅުވީ ހަފްތާއަކު އެއްފަހަރު ހުރިހާ ސްކޫލެއްގައި މިޕްރޮގްރާމް ހިންގުމަށް ހަމަޖެހިފައިވާ ކަމަށާއި، އެގޮތުން މިއަދުވެސް މިޕްރޮގްރާމް މާލެއާއި އަތޮޅުތެރޭގައި ކުރިޔަށް ގެންގޮސްފައިވާ ކާމަށެވެ.
އޭނާ ވިދާޅުވީ، ޑެންގީ ޖެހިގެން ރިޕޯޓްކުރެވޭ ކޭސްތަކުގެ ތެރޭގައި ސްކޫލް އުމުރުފުރާގެ ކުދިން ގިނަަކަމަށާއި، މިފަދަ ޕްރޮގްރާމެއް ފެށުމުގެ ބޭނުމަކީ ސްކޫލްގެ ތެރެއިން ދަރިވަރުން ޑެންގީ ހުމަށް މަގުފަހިވާ މާހައުލަކަށް ހުށަަހެޅޭ މިންވަރު ކުޑަކުރުމަށް ކަމަށެވެ. އޭނާ ވިދާޅުވީ، މި ދުވަސްވަރު ހުމާއި، އަރިދަފުސް ރޯގާ ދަރިވަރަށް ޖެހިފައިވާނަމަ، ސްކޫލަށް ނުފޮނުވުމަށް އެޑިއުކޭޝަން މިނިސްޓްރީން އިލްތިމާސް ކުރައްވާކަމަށެވެ.
އަދި އެފަދަ ދުވަސްވަރު ގެއްލޭ ފިލާވަޅުތަކާއި އިމްތިހާންތައް އެ ދަރިވަރަކަށް ލިބޭނޭ އިންތިޒާމް އެސްކޫލަކުން ހަމަޖައްސަދޭނޭކަމަށްވެސް އޭނާ ވިދާޅުވިއެވެ.