ރައްޔިތުންގެ ފައިސާއަށް ޚިޔާނާތްތެރިވި އެންމެންގެ މައްސަލަ ބަލާނަން، ނުފިލޭނެ: މެންބަރުން

ކުރީ ސަރުކާރުތަކުގައި ފެނަކަ ކޯޕަރޭޝަންގެ އިސްވެރިން ކުންފުންޏަށް އިހުމާލުވެފައިވާކަމަށް ތުހުމަތުކުރެވޭ މައްސަލަ ބެލުމަށް ގޮވާލާ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފިއެވެ.

މި މައްސަލަ ހުށަހެޅުއްވީ ފޭދޫ ދެކުނު ދާއިރާގެ މެންބަރު އިބްރާހިމް ދީދީއެވެ. މި މައްސަލައަކީ ކުންފުންނަށް އިހުމާލުވުމުގެ ސަބަބުން އާންމުންނަށް ދޭ ޚިދުމަތްތަކަށް ބުރާއަރައި، ފޫނުބެއްދޭވަރުގެ ގެއްލުން ލިބެމުންދާތީ އެކަން ސަރުކާރުގެ ސަމާލުކަމަށް ގެނެސް ސަރުކާރުން އަޅަން ގަސްދުކުރާ ފިޔަވަޅުތައް ދެނެގަތުމަށް ހުށަހެޅުއްވި މައްސަލައެކެވެ.

ކުއްލި މައްސަލަ ހުށަހަޅުއްވައި ފޭދޫ ދެކުނު ދާއިރާގެ މެންބަރު އިބްރާހީމް ދީދީ ވިދާޅުވީ، މިދިޔަ ފަސް އަހަރު ތެރޭގައި ފެނަކައިގެ މެނޭޖިން ޑިރެކްޓަރުގެ ބެލުމުގެ ދަށުން ދަތުރުފަތުރަށް އެކަނިވެސް 100 މިލިއަން ރުފިޔާ ޚަރަދުކޮށްފައިވާ ކަމަށެވެ. އަދި ތަފާތު 60 މަޝްރޫއަށް އެއްބިލިއަން ރުފިޔާ ހޭދަކޮށްފައިވާއިރު މަޝްރޫއުތައް ނިމިފައިނުވާ ކަމަށާއި، ފައިސާއަށް ވީގޮތެއް ނޭނގޭކަމަށްވެސް މެންބަރު ތުހުމަތުކުރެއްވިއެވެ.

އިބްރާހީމް ދީދީ ވިދާޅުވީ ފެނަކައަށް މިހާރު އެކި ފަރާތްތަކަށް ފައިސާ ދައްކަން ދަތިވެފައިވަނީ ކުރީގެ މެނޭޖްމަންޓުގެ ޒިންމާދާރުކަން ކުޑަވުމުން ކަމަށެވެ. އެހެންކަމުން އޭރުގެ މެނޭޖިން ޑިރެކްޓަރު މަޖިލީހަށް ހާޒިރު ކުރަންޖެހޭކަމަށް އިބްރާހީމް ދީދީ ވިދާޅުވިއެވެ.

"މި މައްސަލަތައް ބަލަންޖެހޭ. ފެނަކައިގެ އެމްޑީ އަޙްމަދު ސަޢީދު މަޖިލީހަށް ޙާޒިރުކޮށްގެން ސުވާލުކުރަން އެބަޖެހޭ. ކޮބައިތޯއޭ މި ފައިސާ؟ ކޮންބަޔަކަށްތޯއޭ ދިނީ؟ ކީއްވެގެންތޯއޭ މިގޮތަށް ފައިސާ ޚަރަދުކުރީ؟ އަޅުގަނޑުމެން އެބަޖެހޭ މި މައްސަލަތައް ސަރުކާރުން ބަލާތޯ އަދި ނުބަލާތޯވެސް ބަލަން،" އިބްރާހިމް ދީދީ ވިދާޅުވިއެވެ.

ކުއްލި މައްސަލައަށް ވާހަކަފުޅު ދައްކަވަމުން ބާރަށު ދާއިރާގެ މެންބަރު އިބްރާހީމް ސުޖާޢު ވިދާޅުވީ މި ސަރުކާރުން ފެނަކައާ ހަވާލުވާން ޖެހުނީ ހަތަރު ބިލިއަން ރުފިޔާގެ ދަރަންޏާއެކުގައި ކަމަށެވެ. އަދި އެކި ރަށްރަށުގެ އިންޖީނުގެތަކުގެ ހާލަތު ހުރީ ވަރަށް ދަށް ޙާލަތެއްގައިކަމަށް ވިދާޅުވެ ސުޖާޢުވެސް ވަނީ ކުރީ ސަރުކާރުގައި ފެނަކައިގެ ވެރިން ރައްޔިތުންގެ ފައިސާއަށް ޚިޔާނާތްތެރިވެފައިވާކަމަށް ތުހުމަތު ކުރައްވާފައެވެ.

ރައްޔިތުންގެ ފައިސާއަށް ޚިޔާނާތްތެރިވެފައިވާ ހުރިހާ ކުންފުންޏެއް ހިންގި މީހުންގެ މައްސަލަތައް ބައްލަވާނެކަމަށްވެސް ސުޖާޢު ވިދާޅުވިއެވެ.

"މި ފެއްޓީ ބަލަން. ރައްޔިތުންގެ ފައިސާއަށް ޚިޔާނާތްތެރިވެފަތިބި ހުރިހާ ކުންފުނިތަކެއް ހިންގި މީހުން ޙާޒިރުކުރާނަން. އެއްވެސް މީހަކު ހީކޮށްގެން ނުވާނެ މި ދައުލަތަށް ފިލައިގެންދެވޭނެ ކަމަށް. އެކަކަށްވެސް ފިލައިގެން ނުދެވޭނެ،" ސުޖާޢު ވިދާޅުވިއެވެ.

މި މައްސަލަ ކުރިއަށްގެންގޮސް ފެނަކައިގެ މައްސަލަތައް ބެލުމަށް މަޖިލީހުގެ ގިނަ މެންބަރުން ވަނީ ގޮވާލާފައެވެ. އަދި ކުރީ ސަރުކާރުން ކުންފުނިތައް ހިންގުމުގައި އިހުމާލުވެފައިވޭތޯ ބަލައި ފިޔަވަޅު އެޅުމަށްވެސް މެންބަރުން ވަނީ ގޮވާލައްވާފައެވެ.