އެމްޑީޕީއަށް 19 އަހަރު: ބޮޑެތި ނާކާމިޔާބީތަކާއެކު ލީޑަރޝިޕް ގެއްލި، މެމްބަރުން މާޔޫސްކަމުގައި

މޯލްޑިވިއަން ޑިމޮކްރެޓިކް ޕާޓީ، އެމްޑީޕީއަކީ ދިވެހިރާއްޖޭގައި މިހާރު އޮތް ގިނަ ޕާޓީ އެކުލެވޭ ނިޒާމުގެ ތެރެއިން އުފެދުނު އެންމެ ފުރަތަމަ ސިޔާސީ ޕާޓީއެވެ. ސިޔާސީ ޕާޓީ އުފެއްދުމަށް އޭރުގެ ސަރުކާރުން ދިން ހުއްދައާއެކު އެމްޑީޕީ އުފެދިގެން އައީ 2005 ވަނަ އަހަރުގެ ޖޫންމަހުގެ 26 ވަނަ ދުވަހުއެވެ.

އެމްޑީޕީ ރަސްމީކޮށް އުފެއްދުމަށްފަހު މިއަދާއި ހަމައަށް އެންމެ ބޮޑަށް ފާހަގަވެގެންދިޔައީ ޕާޓީގެ އެތެރޭގެ ކޯޅުންތަކެވެ. ވަކި ބައެއްގެ ނުފޫޒު ބޮޑުވުމުގެ ސަބަބުން ޕާޓީގެ ރައީސްކަން ކުރެއްވި ގިނަ ބޭފުޅުންގެ ދައުރު ހަމަނުވަނީސް މަޤާމުން އިސްތިއުފާ ދެއްވާފައިވެއެވެ. އޭގެތެރޭގައި އިބްރާހިމް އިސްމާއިލް، ޑރ. މުހައްމަދު މުނައްވަރު އަދި ޑރ. އިބްރާހިމް ދީދީ ހިމެނިވަޑައިގަންނަވައެވެ. އަދި އެންމެ ފަހުން ޕާޓީގެ ރައީސަކަށް ހުންނެވި މުޙައްމަދު ނަޝީދުވެސް ޕާޓީގެ ރައީސްކަމުން އިސްތިއުފާދެއްވީ ދައުރު ހަމަނުވަނީސްކަން ފާހަގަކޮށްލެވެއެވެ.

2005 ވަނަ އަހަރު އެމްޑީޕީ އުފެއްދުމަށްފަހު އެމްޑީޕީއަށް ސިޔާސީގޮތުން އެންމެ ފުރަތަމަ ލިބުނު ކާމިޔާބީއަކީ 2008 ވަނަ އަހަރު ބޭއްވި ރިޔާސީ އިންތިޚާބު ކާމިޔާބުކޮށް ރާއްޖޭގެ ވެރިކަން ހޯދުމެވެ. ނަމަވެސް އެ ފަހަރު އެމްޑީޕީން ވެރިކަން ހޯދީ ގިނަ ޕާޓީތަކެއް ހިމެނޭ ކޯލިޝަނެއްގެ ތެރެއިންނެވެ.

2008 ވަނަ އަހަރު އެމްޑީޕީއަށް ވެރިކަން ލިބުނުނަމަވެސް، 2009 ވަނަ އަހަރު ބޭއްވި މަޖިލިސް އިންތިޚާބުގައި އެ ޕާޓީއަށް މާ ބޮޑު ކާމިޔާބީއެއް ލިބޭ ގޮތެއް ނުވިއެވެ. 2009 އަހަރު ބޭއްވި މަޖިލިސް އިންތިޚާބުގައި ލިބުނު ނާކާމިޔާބީއާއެކު ސިޔާސީގޮތުން އެމްޑީޕީ ބަލިކަށިވެ، ސިޔާސީގޮތުން އެކި ފިއްތުންތައް ދިޔައީ ކުރިމަތިވަމުންނެވެ. އެކަމުގެ ނަތީޖާއެއްގެ ގޮތުން 2012 ވަނަ އަހަރުގެ ފެބްރުއަރީމަހުގެ 12 ވަނަ ދުވަހު އޭރުގެ ރައީސުލްޖުމްހޫރިއްޔާ މުޙައްމަދު ނަޝީދު މަޤާމުން އިސްތިއުފާދެއްވައި، އެމްޑީޕީގެ ފުރަތަމަ ވެރިކަން ނިމުމަކަށް އައެވެ.

އެމްޑީޕީގެ ވެރިކަން 2012 ވަނަ އަހަރު ނިމުމުގެ އިތުރުން، 2013 ވަނަ އަހަރު ބޭއްވި ރިޔާސީ އިންތިޚާބުގައި ލިބުނު ނާކާމިޔާބީއާއެކު، 7 އަހަރު އެމްޑީޕީ އޮތީ އިދިކޮޅު ޕާޓީއެއްގެ ގޮތުގައި މަގުމަތީގައެވެ. 7 އަހަރު އިދިކޮޅު ޕާޓީއެއްގެ ގޮތުގައި އޮތުމަށްފަހު އެމްޑީޕީއަށް ދެވަނަ ފަހަރަށް ވެރިކަން ލިބުނީ 2018 ވަނަ އަހަރު ބޭއްވި ރިޔާސީ އިންތިޚާބުގައެވެ. އެފަހަރުވެސް އެމްޑީޕީއަށް ވެރިކަން ލިބުނީ 2008 ވަނަ އަހަރު ވެރިކަން ލިބުނު ގޮތަށް ގިނަ ޕާޓީ ހިމެނޭ ކޯލިޝަނެއްގެ ތެރެއިންނެވެ.

2018 ވަނަ އަހަރު ޤާއިމްކުރި އެމްޑީޕީގެ ވެރިކަމުގައި އެ ޕާޓީއަށް ކާމިޔާބީތަކެއް ހާސިލުކުރެނުކަން ފާހަގަކޮށްލެވެއެވެ. އެގޮތުން މަޖިލިސް އިންތިޚާބުގައި ސުޕަރ މެޖޯރިޓީއެއް އެ ޕާޓީން ހޯދިއެވެ. ނަމަވެސް ޖެހިގެން އައި ލޯކަލް ކައުންސިލް އިންތިޚާބުގައި އެ ޕާޓީއަށް ކުރިމަތިވީ ނާކާމިޔާބީއެކެވެ. އެގޮތުން މާލެ ސިޓީގެ ކައުންސިލްގެ މެޖޯރިޓީއާއި މޭޔަރުގެ މަޤާމު ފުރަތަމަ ފަހަރަށް އެމްޑީޕީއަށް ގެއްލިގެންދިޔައީ ނިމިދިޔަ އެމްޑީޕީގެ ވެރިކަމުގައެވެ.

2018 ވަނަ އަހަރުގެ ނޮވެމްބަރުމަހުން 2023 ވަނަ އަހަރުގެ ނޮވެމްބަރުމަހުގެ ނިޔަލަށް ހިނގި އެމްޑީޕީގެ ވެރިކަމުގައި އެ ޕާޓީއަށް ސިޔާސީ ގޮތުން އިތުރު ގޮންޖެހުންތަކެއް ކުރިމަތިވިއެވެ. ޕާޓީއަށް ކުރިމަތިވި އެންމެ ބޮޑު މައްސަލައަަކަށްވީ އެމްޑީޕީގެ ތެރޭގައި 2 ފެކްޝަނެއް އުފެދި ޕާޓީ ބައިބައިވުމެވެ. އެއް ފެކްޝަނުގައި އިސްކޮށް ތިއްބެވީ ކުރީގެ ޑީއާރުޕީއާއި އެހެން ބައެއް ސިޔާސީ ޕާޓީތަކުގައި އިސްކޮށް އުޅުއްވި ބޭފުޅުންނެވެ. އަނެއް ފެކްޝަނުގައި ތިއްބެވީ އެމްޑީޕީ އުފެއްދުމުގައިވެސް އިސް ދައުރެއް އަދާކުރެއްވި ޕާޓީގެ ބާނީންނެވެ. ނަމަވެސް ޕާޓީގެ ތެރޭގައި އުފެދުނު ސިޔާސީ ހަލަބޮލިކަމުގެ ތެރެއިން ކާމިޔާބު ހޯދީ ކުރީގެ ޑީއާރުޕީއާއި އެހެން ބައެއް ސިޔާސީ ޕާޓީތަކުގައި އިސްކޮށް އުޅުއްވި ބޭފުޅުންނެވެ.

އެމްޑީޕީ ދެ ފަޅިވެ، ޕާޓީގައި އިސްކޮށް އުޅުއްވި ބޭފުޅުން ޕާޓީ ދޫކޮށް ވަޑައިގެންނެވުމުގެ ހިތި ނަތީޖާ އެމްޑީޕީއަށް ފެނުނީ 2023 ވަނަ އަހަރުގެ ރިޔާސީ އިންތިޚާބުގައެވެ. މީގެކުރިން ވެރިކަމުގައި އޮންނަ ޕާޓީއަށް ރިޔާސީ އިންތިޚާބުގެ ފުރަތަމަ ބުރުގައި ކުރި ލިބިފައިވީނަމަވެސް، 2023 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި އެމްޑީޕީގެ ރިޔާސީ ކެންޑިޑޭޓް އަދި އޭރުގެ ރައީސުލްޖުމްހޫރިއްޔާއަށް ލިބިވަޑައިގަތީ ދެވަނައެވެ. އަދި ރިޔާސީ އިންތިޚާބުގެ ދެވަނަ ބުރުގައި ތަފާތު ބޮޑުކޮށް ބަލިވެ، އެމްޑީޕީއަށް ވެރިކަން ގެއްލިގެންދިޔައެވެ.

އެމްޑީޕީގެ ވެރިކަން 2023 ވަނަ އަހަރުގެ ނޮވެމްބަރުމަހު ނިމުމަކަށް އައިފަހުން އެ ޕާޓީގެ އަޑު ވަނީ ވަރަށް ބޮޑަށް މަޑުވެފައެވެ. މީގެކުރިން ބާއްވަމުން ދިޔަ ޕާޓީގެ ހަރަކާތްތަކާއި ރެލީތަކާއި ޖަގަހަ ޖަލްސާތައް ހުއްޓުމުގެ ނަތީޖާއަކަށްވީ މިއަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި ބޮޑު ނާކާމިޔާބީއަކާއި ކުރިމަތިލާންޖެހުމެވެ. ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީއަށް މަޖިލީހުގެ 93 ގޮނޑީގެ ތެރެއިން ލިބުނީ އެންމެ 12 ގޮނޑިއެވެ. އެ ނަތީޖާއާއެކު އެމްޑީޕީ ވަނީ ދުވަހަކުވެސް ނުވެއްޓޭވަރުގެ އަނދަވަޅަކަށް ވެއްޓި، ޕާޓީ މަޑުޖެހިފައެވެ.

އެމްޑީޕީގެ 19 ވަނަ އަހަރީ ދުވަސް މިއަދު ފާހަގަކުރަމުންދާއިރު ޕާޓީގެ މެމްބަރުން ތިބީ މާޔޫސްކަމުގައެވެ. ޕާޓީގެ ލީޑަރޝިޕްގެ އަޑެއް ބަޑެއް ނެތްކަމާއި، އެންމެ ކުޑަ މިނުން ޕާޓީގެ އަހަރީ ދުވަސް ފާހަގަކޮށްލުމަށް ހަރުގެ ޖަލްސާއެއް ބާއްވާލާނެ ހިތްވަރު ނެތްކަން އެއީ މިއަދު ފެންނަން އޮތް ހަޤީޤަތަކެވެ.