އަންނަ އަހަރުން ފެށިގެން ފަންނުވެރިންނަށް 25 މިލިއަން ރުފިޔާގެ އެހީ ދޭނަން: ރައީސް

ފަންނުވެރިކަމުގެ ދާއިރާއަށް ވަންނަން ބޭނުންވާ މީހުންނަށާއި، އެ ދާއިރާގައި ހަރަކާތްތެރިވާ ފަރާތްތަކުގެ ކުރިއެރުމަށް އެހީތެރިވުމަށްޓަކައި ކޮންމެ އަހަރަކު ދައުލަތުގެ ބަޖެޓުން 25 މިލިއަން ރުފިޔާގެ އެހީ ދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މޯލްޑިވިއަން އާޓިސްޓް ކޮމިއުނިޓީގެ "އަންވެއިލިންގ ވިޜަންސް 2024" މައުރަޒު ބައްލަވާލެއްވުމަށްފަހު ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ "އަންވެއިލިންގ ވިޜަންސް 2024" މައުރަޒުގައި ފެންނަންހުރީ ވަރަށް ވިސްނުންތެރި އަދި ހުނަރުވެރި އަތްތަކަކުން ކޮށްފައިވާ ވަރަށް ފުރިހަމަ މަސައްކަތްތަކެއްކަމަށެވެ.

ރައީސް ދެއްވި ޔަޤީންކަމަކީ އާޓިސްޓުންނަށާއި، މި ދާއިރާގައި މަސައްކަތްކުރާ އަދި މި ފަންނަށް ވަންނަން ބޭނުންވާ ފަރާތްތަކަށް ފުރިހަމަ ފުރުޞަތުތައް ހުޅުވައި ދެއްވާނެކަމެވެ. އެގޮތުން ރައީސް ވިދާޅުވީ ފަންނު ދަސްކުރަން ބޭނުންވާ ފަރާތްތަކަށް ސަރުކާރުގެ އެކި ޕްރޮގްރާމުތަކާއި، އަމިއްލަ ފަރާތްތަކުގެ އެހީގައި ފުރުޞަތު ފަހިކޮށްދެއްވާނެކަމަށެވެ. އަދި މާލީ އެހީތެރިކަން ސަރުކާރުގެ ބަޖެޓުގެ ތެރެއިން އަންނަ އަހަރުން ފެށިގެން ފަންނުވެރިންނަށް ހަމަޖައްސައިދެއްވާނެކަމަށް އެމަނިކުފާނު ވިދާޅުވިއެވެ. ހަމައެހެންމެ ފަންނުވެރިންނަށް ބޭނުންވާ އާލާތްތައް ހޯދުމަށް ބޭނުންވާ ފަންޑުވެސް އޭގެތެރޭގައި ހިމެނޭނެކަމަށާއި، އެހެން ގޮތްގޮތުންވެސް ކުރިއަށްދިއުމަށް ވަކި ބަޖެޓެއް ކަނޑައަޅުއްވާނެކަމަށް ރައީސް ވިދާޅުވިއެވެ.

"އަންނަ އަހަރުން ފެށިގެން ޔޫތު މިނިސްޓްރީގެ ބަޖެޓުގެ ތެރެއިން މި އިންޑަސްޓްރީއަށް ޚަރަދުކުރުމަށް، ތިބޭފުޅުންނަށް ދޫކުރުމަށް ކަނޑައެޅޭ އުސޫލެއްގެ ތެރެއިން 25 މިލިއަން ރުފިޔާ ކޮންމެ އަހަރަކު ހަމަޖައްސައިދޭނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވަނީ ފަންނުވެރިންގެ ހުނަރުތައް ދައްކާލުމަށް ޖާގައިގެ ދަތިކަން އޮތްކަން ފާހަގަކުރައްވާ، ފަންނުވެރިންގެ މައުރަޒުތައް ބޭއްވުމަށް ޖާގަ އިތުރުކޮށްދެއްވާނެކަމަށްވެސް ވިދާޅުވެފައެވެ. އެގޮތުން ނެޝަނަލް އާޓު ގެލަރީގެ ޖާގަ އިތުރުކޮށްދެއްވާނެކަން ފާހަގަކުރައްވާ ރައީސް ވިދާޅުވީ، ހުޅުމާލޭގައި ޔޫތު މިނިސްޓްރީގެ ދަށުން ހިންގާ އެކި ކަންކަމަށް ޖާގަ ހަމަޖައްސާނެކަމަށެވެ. އެކަމަށް ވަރަށް އަވަހަށް މަސައްކަތްކުރައްވާނެކަމަށް ވިދާޅުވިއެވެ.

"މާލޭގަ ޖާގަ ހަމަޖެއްސުމާ، އަދި އިރާދަކުރެއްވިއްޔާ ހުޅުމާލޭގަ މާލެއަށްވުރެ ބޮޑުޖާގައެއް ހަމަޖެހިގެންދާގޮތަށް ކަންތައްތައް ހަމަޖެއްސުން. ނަތީޖާއަކަށްވަނީ މިކަހަލަ މައުރަޒުތައް ބޭއްވުމަށް ތިބޭފުޅުންނަށް ލިބޭ ޖާގަ އެތައް ގުނައަކުން ހަމަޖެހިގެންދާނެ. އެއީ ނަތީޖާއަކީ. އިރާދަކުރެއްވިއްޔާ އެކަންކޮށްދޭނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރާއްޖޭގެ އެހެން ސަރަހައްދުތަކުގައި ފަތުރުވެރިކަމަށް އަމާޒުކޮށް މައުރަޒުތައް ބޭއްވުމަށް ސަރުކާރުން ފުރުޞަތު ފަހިކޮށްދެއްވާނެކަމަށާއި، ރާއްޖެއިން ބޭރުގައިވެސް އެންމެ ބޮޑަށް ފުރުޞަތު ހުޅުވާލެވޭނެ މަގުތައްބަލައި އެކި ފޯރަމްތަކުން ފަންނުވެރިން ކުރިއަރައިގެން ދިއުމަށް ފުރުޞަތު ހޯދައިދެއްވާނެކަމުގެ ޔަޤީންކަން ރައީސް ދެއްވިއެވެ.

ރައީސްގެ ވާހަކަފުޅުގައި އެމަނިކުފާނުގެ ސަރުކާރުގެ އިޤްތިޞާދި މެނިފެސްޓޯގައި ކްރިއޭޓަރ އިކޮނޮމީއެއް އުފެއްދުން ހިމެނޭކަން ފާހަގަކުރައްވާ ވިދާޅުވީ އާޓިސްޓުންނާއި އައިޓީ ދާއިރާ އަދި އަތްތެރިކަމުގެ ދާއިރާފަދަ ދާއިރާތައް ހިމެނޭހެން ތަފާތު ހުނަރުތައް ބޭނުންކޮށްގެން އުފައްދާ އުފެއްދުންތައް ވިއްކޭނެ ގޮތް ބައިނަލްއަޤްވާމީ ޕްލެޓުފޯމްގައި ފަހިކޮށްދެއްވާނެކަމަށެވެ.

"ތިބޭފުޅުންގެ ހުނަރުތައް ވިއްކުމުގެ ފުރުޞަތު ހުޅުވާލުމަށް މަސައްކަތް އެބަކުރެވޭ. އަޅުގަނޑު ތިބޭފުޅުންނަށް ދޭނެ ޔަޤީްނކަމަކީ އެ މަސައްކަތްތައް ކާމިޔާބުވާނޭ. އޭރުން ތިބޭފުޅުންނަށް ދުނިޔޭގެ ކޮންމެ ތަނަކަށް މަސައްކަތްތައް ވިއްކާ އާމްދަނި ހޯދުމުގެ ފުރުޞަތު ފަހިވެގެންދާނޭ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ

ރާއްޖެ ކުރިއަރައިދާނީ ޒުވާނުންނާ ފަންނުވެރިންނަށް ފުރުޞަތު ފަހިކޮށްދީގެންކަމަށާއި، އެ ފުރުޞަތު ދެވޭނީ އެނިޔަތް އޮވެގެންކަމަށް ރައީސް ވިދާޅުވިއެވެ. ސަރުކާރުގެ ނިޔަތް އެކަމުގައި އެބައޮތްކަމަށާއި، ފަންނުވެރިންގެ ޚިޔާލުތައް ބަލައިގަނެ ވީހާވެސް ގިނަ ފުރުޞަތުތައް ފަހިކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވިއެވެ.