ޝަރަފުގެ ހިނގާލުން ބާއްވާތީ، ހުކުރު ދުވަހު ހަވީރު މާލެގައި އެއްގަމު އުޅަނދު ދުއްވުން މަނާ

މިނިވަން ދުވަހާ ގުޅިގެން ޤާއުމީ ދިފާޢީ ބާރުން ބާއްވާ ޝަރަފުގެ ހިނގާލުން ހުކުރު ދުވަހު ބާއްވަން ހަމަޖެހިފައިވާތީ ހުކުރު ދުވަހުގެ ހަވީރުގެ ވަގުތަކީ މާލޭގެ މަގުތުކުގައި އެއްގަމު އުޅަނދު ދުއްވުން މާނާކޮށްފިއެވެ.

މިކަން ހާމަކުރައްވައި މާލެ ސިޓީ ކައުންސިލުން ވިދާޅުވީ މިއަހަރުގެ މިނިވަން ދުވަހުގެ މުނާސަބަތުގައި ޤައުމީ ކެޑޭޓް ކޯ އާއި، ޤައުމީ ދިފާޢީ ބާރުން އެއްވަގުތެއްގައި މާލޭގެ ބޮޑެތި މަގުތަކުގައި ހިނގާލުމެއް ކުރިއަށް ގެންދިއުމަށް ހަމަޖެހިފައިވާތީ ހިނގާލުން ކުރިއަށްދާ ވަގުތު މާލޭގެ މަގުތަކުގެ ޓްރެފިކް ފްލޯ މެނޭޖްކުރުމަށް ދިމާވާނެ ދަތިތައް ހައްލުކުރުމަށް އެ ހިނގާލުން ކުރިއަށްދާ ވަގުތުގައި މާލޭގައި އެއްގަމު އުޅަނދު ދުއްވުން މަނާ ވަގުތެއްގެ ގޮތުގައި ހަމަޖައްސަވާފައިވާކަމަށެވެ.

އެގޮތުން ހުކުރު ދުވަހު ހަވީރު 4:00 އިން 6:00 އަށް މާލޭގެ މަގުތަކުގައި އެއްގަމު އުޅަނދު ދުއްވުން މަނާވާނެކަން ސިޓީ ކައުންސިލުންވަނީ އަންގައި އިޢުލާންކޮށްފައެވެ.

މިނިވަން ދުވަހު މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ބާއްވަން ތާވަލުކުރި ޝަރަފުގެ ހިނގާލުން ފަސްކުރީ މޫސުން ތަންނުދިނުމުގެ ސަބަބުންނެވެ. ޝަރަފުގެ ހިނގާލުމަކީ ކޮންމެ އަހަރަކުވެސް މިނިވަން ދުވަހާ ގުޅިގެން އެމްއެންޑީއެފުން ބާއްވަމުން އަންނަ ހަރަކާތެކެވެ. މި ހަރަކާތް ބެލުމަށް ގިނަ އަދަދެއްގެ ރައްޔިތުން މަގުތަކަށް ޖަމާވެއެވެ.

ކޮންމެ އަހަރަކުވެސް ދިވެހިރާއްޖޭގެ މިނިވަން ދުވަސް، ފާހަގަކުރަނީ ޖުލައި މަހުގެ 26 ވަނަ ދުވަހުއެވެ. މިގޮތުން މިއަހަރު ފާހަގަކުރީ 59 ވަނަ މިނިވަން ދުވަހެވެ.