އަމަލީ މަސައްކަތް ފަށާފައިވާ އެއްވެސް މަޝްރޫޢެއް ހުއްޓާނުލާނެ: ވަޒީރު ޑރ. މުއްޠަލިބް
-
މިއަހަރުގެ ބަޖެޓުގައި ގިނަ މަޝްރޫއުތަކަށް ފައިސާ ހިމަނާފައި ނުވާކަން ވަޒީރު ފާހަގަކުރެއްވި
ސަރުކާރުން ކުރިއަށްގެންދާ މަޝްރޫޢުތަކުގެ ތެރެއިން ޢަމަލީ މަސައްކަތް ފެށިފައިވާ އެއްވެސް މަޝްރޫޢެއް މަޑުޖައްސާލަން އަންގާފައިވާ ނުވާނެކަމަށް އިމާރާތްކުރުމާއި ބިނާރާބެހޭ ވަޒީރު ޑރ. އަބްދުﷲ މުއްޠޮލިބް ވިދާޅުވެއްޖެއެވެ.
އިމާރާތްކުރުމާއިބެހޭ ވަޒީރު މިކަން ހާމަކުރައްވައި އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޓީސީސީއާ ހަވާލުކޮށްފައިވާ މަޝްރޫއުތަކުގެ ތެރެއިން ޢަމަލީ މަސައްކަތް މިހާރު ފެށިފައިވާ އެއްވެސް މަޝްރޫޢެއް ހުއްޓާލުމަށް އަންގާފައި ނުވާނެ ކަމަށެވެ. ނަމަވެސް ޢަމަލީ މަސައްކަތް ނުފެށި ހުރި މަޝްރޫޢުތަކަށްވުރެ ފަށާފައިވާ މަޝްރޫޢުތައް ނިންމުމަށް އިސްކަން ދިނުމަށް އަންގަވާފައިވާކަމަށް ވަޒީރު ވިދާޅުވިއެވެ.
އެމް.ޓީ.ސީ.ސީ އާ ޙަވާލުކޮށްފައިވާ މަޝްރޫޢުތަކުގެ ތެރެއިން ޢަމަލީ މަސައްކަތް ފެށިފައިވާ އެއްވެސް މަޝްރޫޢެއް މަޑުޖައްސާލަން ސަރުކާރުން ނިންމާފައި ނުވާނެއެވެ. އެހެން ނަމަވެސް ސޮއިކޮށް ޢަމަލީ މަސައްކަތް ނުފެށިވާ މަޝްރޫޢުތައް މިވަގުތައް ނުފަށައި ޢަމަލީ މަސައްކަތް ފެށިފައިވާ…
— Abdulla Muththalib (@muththo) July 30, 2024
އިމާރާތްކުރުމާއިބެހޭ ވަޒީރު މުއްޠަލިބު ވިދާޅުވީ މިގޮތަށް ނިންމި މައިގަނޑު ސަބަބަކީ، މި ހުރިހާ މަޝްރޫޢުތައް ކުރިއަށް ގެންދަން ބޭނުންވާ މިންވަރަށް މިއަހަރަށް ފާސްކޮށްފައިވާ ބަޖެޓުގައި ފައިސާ ހިމަނާފައި ނުވާތީ ކަމަށެވެ.
ވަޒީރު މިފަދައިން ވިދާޅުވެފައި މިވަނީ، އެމްޓީސީސީން ކުރިއަށް ގެންދާ މަޝްރޫޢުތައް ހުއްޓާލުމަށް އެކުންފުންޏަށް އަންގާފައިވާ ކަމަށް ބުނެ ބައެއް މީޑިއާތަކުން ރިޕޯޓުކޮށްފައިވާ ދަނޑިވަޅެއްގައެވެ.
ސަރުކާރު ޚަރަދުތައް ކުޑަކުރުމަށް މަސައްކަތްތަކެއް ކުރަމުންދާއިރު، ފަށާފައިވާ އެއްވެސް މަޝްރޫޢެއް ހުއްޓާނުލާނެ ކަމުގެ ޔަޤީންކަން މީގެކުރިންވެސް ސަރުކާރުން ވަނީ ދީފައެވެ.