ރާއްޖެއަށް ކަނޑުމަސް އެތެރެކުރުމަށް ނަގާ ޑިއުޓީ ބޮޑުކުރާނަން: ވަޒީރު ޝިޔާމް

ކުޑަ ޑިއުޓީއެއް ދައްކައިގެން ރާއްޖެއަށް ކަނޑުމަސް އެތެރެކުރުމަކީ މައްސަލައެއްކަމަށާއި، އެކަން ހުއްޓުވާނޭކަމަށް މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ވަޒީރު ވިދާޅުވީ ރާއްޖެއިން ބޭރުކުރާ ކަނޑުމަހުގެ ބާވަތްތައް ކުޑަ ޑިއުޓީއެއް ދައްކައިގެން ރާއްޖެ އެތެރެ ކުރާ މައްސަލަ ފާހަގަވެފައިވާކަމަށެވެެ.

މަސްވެރިކަމާއި ކަނޑުގެ ވަސީލަތްތަކާއި މަސްވެރިކަމުގެ ސިނާޢަތަށް ގެންނަން ބޭނުންވާ ބަދަލުތައް ހިއްސާ ކުރައްވަމުން މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު އަޙްމަދު ޝިޔާމް ވިދާޅުވީ ކަނޑުމަހުގެ ބާވަތްތައް ކުޑަ އަގެއްގައި އެތެރެވުމަށް ފުރުސަތު ދިނުމަކީ ސަރުކާރުގެ ވިސްނުމެއް ނޫންކަމަށެވެ. އަދި އެކަމާއި ގުޅޭގޮތުން ވަޒީރުންގެ މަޖިލީހުގައި މިހާރު މަޝްވަރާ ކުރެވިފައިވާކަމަށްވެސް ޝިޔާމް ވިދާޅުވިއެވެ.

"އަޅުގަނޑުމެން ޕޯލް އެންޑް ލައިން ޗެމްޕިއަނުން ގޮތުގައި ވާހަކަ ދައްކާއިރު މިތަނަށް ކަޅުބިލަ މަސް ކުޑަ އަގެއްގައި އެތެރެވުމަކީ މައްސަލައެއް. އަޅުގަނޑުމެންގެ ވިސްނުމުގައި އެބަހުރި މިތަނަށް އެތެރެވާ މަހުގެ ބާވަތްތަކުގެ ތެރެއިން ހާއްސަކޮށް ކަޅުބިލަ މަހަށް ޑިއުޓީ ބޮޑުކުރަން" ވަޒީރު ވިދާޅުވިއެވެ.

މަސްވެރިކަމުގެ ސިނާޢަތަށް ގެންނަން ބޭނުންވާ ބަދަލުތަކުގެ ވާހަކަ ދައްކަވަމުން ވަޒީރު ޝިޔާމް ވިދާޅުވީ، ރާއްޖޭގެ މަސް ޕްރޮސެސިން ކެޕޭސިޓީ ދަށްވުމުން ކޮންމެ އަގެއްގައި ވިއަސް މަސް ބޭރުކުރަން މަޖުބޫރުވެފައިވާ ކަމަށެވެ. އެހެން ނަމަވެސް އެކަން ބަދަލުކޮށް ސަރުކާރުގެ ވިސްނުމަކީ މަސް ޕްރޮސެސިންގް ކެޕޭސިޓީ ތިން ގުނަ ބޮޑުކުރުން ކަމަށް ވަޒީރު ވިދާޅުވިއެވެ.

އޭގެ ސަބަބުން ރާއްޖޭގައި މިހާރު ބާނާ މަހުގެ 95 އިންސައްތަ ޕްރޮސެސް ކުރެވިގެންދާނެ ކަމަށް ވަޒީރު ވިދާޅުވިއެވެ.

"ޕްރައިވެޓް ކުންފުނިތަކާއި އެކީގައި މިހާރު ރާއްޖޭގައި 110 މެޓްރިކް ޓަނުގެ މަސް ޕްރޮސެސް ކުރެވޭ ކަމަށް ވަންޏާ، އަޅުގަނޑުމެން މި އިތުރު ކުރަނީ 300 މެޓްރިކް ޓަން. މީގެ ސަބަބުން ރާއްޖޭގެ މިހާރު ބާނާ މަހުގެ 95 އިންސައްތަ ޕްރޮސެސް ކުރެވޭ. އަޅުގަނޑުމެން ބޭނުންވަނީ ރޯ މަހުގެ ގޮތުގައި މި ބޭރުކުރާ ބޭރު ކުރުން އެއްކޮށް ހުއްޓާލަން" ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖެއިން ބާނާ މަހަށް ހަމަ އަގު ހޯދައިދީ، އެހެން މާކެޓުތަކަށް މަސް ބޭރުކުރުމަށް ސަރުކާރުން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ޗައިނާ ތުރުކީ އަދި އިންގިރޭސިވިލާތާއެކު ޤާއިމްކުރާ މިނިވަން ވިޔަފާރީގެ އެއްބަސްވުންތަކަށް ޢަމަލު ކުރަން ފެށުމުން ރާއްޖެގެ މަސްވެރިކަމުގެ ސިނާޢަތައް ހެޔޮ ބަދަލުތަކެއް އަންނާނެކަމަށް ވަޒީރު ވިދާޅުވިއެވެ.

އަދި މީގެ އިތުރުން މަސްވެރިކަން މާކެޓު ކުރުމަށް ކުރެވޭ މަސައްކަތުގެ ތެރެއިން މާކެޓިން ކުންފުނީގެ މަސައްކަތް އިދާރީ ގޮތުން ފެށިފައިވާއިރު، އެކަށީގެންވާ ބަޖެޓަކާއިއެކު އަންނަ އަހަރު އެ މަސައްކަތް ބާރަށް ކުރިއަށްދާނެކަމަށްވެސް ވަޒީރު ވިދާޅުވިއެވެ.