އަނަސްގެ މަރަށް 7އަހަރުވުމުން ރަށް އަނދިރިކޮށް އިންސާފަށްއެދި އަޑުއުފުލައިފި

މާލޭގައި އަނިޔާވެރިކޮށް މަރާލި ރ. މީދޫ ފެންފިޔާޒުގޭ މުޙައްމަދު އަނަސްގެ މަރަށް 7 އަހަރުވުމުން އޭނާގެ އުފަން ރަށުގައި އިންސާފަށް އެދި އިޙްތިޖާޖުކޮށްފިއެވެ. އަނަސްގެ މަރަށް އިންސާފު ނުލިބޭކަމަށް ބުނެ އިޙްތިޖާޖުކުރުމުގެ ގޮތުން އެރަސް އަނދިރިކޮށް އިންސާފު ލިބުމަށް ވަނީ އަޑުއުފުލާފައެވެ.

މިގޮތުން އަނަސް މަރާލިކަމަށް ލަފާކުރާ ގަޑިއާއި އެއްވަގުތެއްގައި 15 މިނެޓަށް މީދޫގެ ހުރިހާ މަގުބައްތިތައް ނިއްވާލާ މުޅި ރަށް އަނދިރިކޮށްލިއެވެ ރަށް އަނދިރި ކޮށްލާފައިވަނީ އޭނާ މަރާލި ވަގުތާ ދިމާވާ ގޮތަށް ރޭ 9:15 އިން 9:30 އަށެވެ. އަދި އަނަސްގެ މަރަށް އިންސާފަށް އެދި ސޯޝަލް މީޑިއާގައި ވަނީ އަޑުއުފުލާފައެވެ.

އަނަސް މަރާލާފައިވަނީ 31 ޖުލައި 2017 ވަނަ އަހަރުއެވެ. ލިޓަސް ސާވިސް ސެންޓަރު ތެރޭގައި ގްރޫޕަކުން ގޮސް ހަމަލާދީ އަނަސް މަރާލި މައްސަލައިގައި އަށް މީހެއްގެ މައްޗަށް ދައުވާކޮށްފައިވެއެވެ. އޭގެ ތެރެއިން ކުށް ސާބިތުވެފައިވަނީ އެ މައްސަލާގައި ހައްޔަރުކުރިއިރު 18 އަހަރު ނުފުރޭ ކުޑަކުއްޖާގެ މައްޗަށެވެ. ނަމަވެސް ނިމިދިޔަ ދައުރުގައި ކުރީގެ ރައީސް އިބްރާހީމް މުހައްމަދު ޞާލިޙް ވަނީ އޭނާގެ ޖަލު ހުކްމް މަޢާފްކޮށްދީފައެވެ. މިއާއެކު މިމައްސަލާގައި ހިމެނޭ އެންމެން ވަނީ މިނިވަންވެފައެވެ.

މިމައްސަލައިގައި ދައުވާކުރި އެންމެ މިނިވަންވެފައިވާތީ އައު ސަރުކާރުންވެސް ވަނީ އެކަމާއި ކަންބޮޑުވުން ފާޅުކޮށްފައެވެ. އަނަސްއަށް ހަމަލާ ދީފައިވަނީ އާންމުންގެ ތެރޭގައި ކަމަށްވެފައި، އެހާ ހާމަކަން ބޮޑު ގޮތެއްގައި މީހެއްގެ ފުރާނައަށް ގެއްލުން ދިނުމުންވެސް އެމައްސަލައިގައި ތުހުމަތުކުރެވޭ ފަރާތްތަކަށް އަދަބު ނުލިބި ދިއުމަކީ ތަންފީޒީ އިދާރާތަކާއި އަދުލް އިންސާފް ގާއިމްކުރުމުގެ ޒިންމާ ހަވާލުވެފައިވާ މުއައްސަަސާތަކާމެދު ރައްޔިތުންގެ އިތުބާރު ކުޑަވެގެންދާނެ ކަމެއްކަންވެސް ސަރުކާރުން ވަނީ ވިދާޅުވެފައެވެ.