މާރަންދޫ ކައުންސިލްގެ ބައި-އިލެކްޝަން އަންނަ މަހު

އަންނަ ސެޕްޓެންބަރު މަހު ކައުންސިލެއްގެ ބައި-އިލެކްޝަން އޮންނާނެކަމަށް އިލްޝަންސް ކޮމިޝަނުން ވިދާޅުވެއްޖެއެވެ.

އަންނަ މަހު އޮންނަ ބައި-އިލެކްޝަނަކީ ހއ. މާރަންދޫ ކައުންސިލަށް މެންބަރަކު ހޮވުމަށް ބާއްވާ އިންތިޚާބެވެ. މި އިންތިޚާބު އޮންނާނީ އަންނަ މަހުގެ 14 ވަނަ ދުވަހުއެވެ.

އިލެކްޝަންސް ކޮމިޝަނުން މިހާރު ވަނީ މި ބައި-އިލެކްޝަންގައި ވޯޓުލެވޭ މީހުންގެ ރަޖިސްޓްރީ ޢާންމުކޮށް، ރަޖިސްޓްރީއަށް ޝަކުވާ ހުށައެޅުމަށް ހުޅުވާލާފައެވެ. ވޯޓުލެވޭ މީހުންގެ ރަޖިސްޓްރީ ދިވެހި ސަރުކާރުގެ ގެޒެޓާއި ކޮމިޝަނުގެ ވެބްސައިޓުގައި ވަނީ ޢާންމު ކޮށްފައެވެ. އަދި ޝަކުވާ ހުށައެޅުމަށް ބޭނުންވާ ފޯމުވެސް ވެބްސައިޓުން ލިބޭނެކަމަށް ކޮމިޝަނުން ވިދާޅުވެއެވެ.

ވޯޓުލެވޭ މީހުންގެ ރަޖިސްޓްރީއަށް ޝަކުވާ ހުށައެޅުމަށް ހުޅުވާލާފައިވަނީ މިމަހުގެ 11 ވަނަ ދުވަހުގެ މެންދުރު ފަހު 3:00 ޖެހުމާ ހަމައަށެވެ.

މިހާރު ރަޖިސްޓްރީ އޮތްގޮތުން 736 މީހަކަށް މި ބައި-އިލެކްޝަންގައި ވޯޓުލުމުގެ ޙައްޤު ލިބެއެވެ.

މާރަންދޫ ކައުންސިލަށް މެންބަރަކު އިންތިޚާބުކުރުމަށް ބައި-އިލެކްޝަނެއް ބޭއްވުމަށް ނިންމާފައިވަނީ، އެކައުންސިލްގެ ނައިބު ރައީސްކަމުގައި ހުންނެވި އަހުމަދު ރަމީޒު މިދިޔަ މަހުގެ 13 ވަނަ ދުވަހު ނިޔާވުމާއި ގުޅިގެންނެވެ.