ފުވައްމުލަކު މަގުހެދުމުގެ ޢަމަލީ މަސައްކަތް މޯލްޑިވްސް ރޯޑް ޑިވަލޮޕްމަންޓް ކޯޕަރޭޝަން، އެމްއާރްޑީސީން ފަށައިފިއެވެ.
މި މަޝްރޫޢުގެ ދަށުން ހެދުމަށް ހަމަޖެހިފައިވަނީ ފުވައްމުލަކުގެ ހުރިހާ އަވަށަކަށްވެސް ވާގޮތަށް، ރަށުގެ އެއްކޮޅުން އަނެއް ކޮޅަށް އޮންނަ ނައިބު ތުއްތު މަގެވެ. މިމަގުން ތިނެއް ޕޮއިންޓް ހަތަރެއް ކިލޯ މީޓަރުގެ ސަރަޙައްދެއް މިމަޝްރޫޢުގެ ދަށުން ހަދާނެއެވެ.
ފުވައްމުލަކަކީ، އާބާދީގައި ދިހަހާށްވުރެ ގިނަމީހުން ދިރިއުޅޭ ރަށެކެވެ. މި ރަށަކީ، ރާއްޖޭގެ ގިނަ ރަށްރަށުގެ ނިސްބަތުން ބޮޑު އަދި ދަނޑުވެރިރަށަކަށްވުމާއި އަދި އެކި ސަރަޙައްދުތަކުގައި ތަފާތު އަވަށްތަކަކަށް އޮންނަ ރަށަކަށް ވުމުން އެރަށުގެ މަގުތަކަކީ ވަރަށް ބޮޑަށް ބޭނުންކުރަންޖެހޭ މަގުތަކެކެވެ. ޚާއްޞަކޮށް ދުއްވާ އެއްޗެހި ދުއްވުން ގިނަ މަގުތަކެކެވެ. މިގޮތުން އެންމެ ބޮޑަށް ބޭނުންކުރަންޖެހޭ އެއް މަގަކީ، މުޅިރަށަށް ދެމިގެންގޮސްފައިވާ ނާއިބު ތުއްތު މަގެވެ. މި މަގުގެ އެއްބައިގައި މިހާރުވެސް އޮންނަނީ ތާރުއަޅާފައެވެ. އަދި އެއް ސަރަޙައްދެއްގައި ވަނީ ގާވެސް އަތުރާފައެވެ.
އަލަށް މިފަށާ މަޝްރޫޢަކީ، މިހާރު ގާ އަޅާފައިވާ ބައިން ގާ ނަގައި، އެބައިގައި ތާރުއެޅުމާއި އަދި ގައު ވެސް، ތާރުވެސް ނާޅާ އޮތް ބައިން ބޮޑު ސަރަޙައްދެއްގައި ތާރުއެޅުމަށް ހިންގާ މަޝްރޫޢެކެވެ. ނައިބު ތުއްތު މަގުގައި މިހާރު ތާރުއަޅާފައި އޮންނަނީ، ބަނދަރު ސަރަޙައްދުން ފެށިގެން ޣާޒީ މަގާ ގުޅޭހިސާބަށެވެ. އަލަށް ފަށާ ޕްރޮޖެކްޓްގެ ދަށުން ތާރުއެޅުމަށް ހަމަޖެހިފައިވަނީ، ޣާޒީ މަގާ ގުޅޭ ހިސާބުން ފެށިގެން ދަނޑިމަގު އަވަށުގައި މީހުން އާބާދުވެފައިވާ ސަރަޙައްދު ނިމޭ ހިސާބަށެވެ. ތާރުއަޅައިގެން އަލަށް ހަދަނީ ތިނެއް ހަތަރެއް ކިލޯމީޓަރުގެ ދިގުމިނަށެވެ.
img:http://s1.psmnews.mv/images/660x400/14639034126417.jpg|ފުވައްމުލަކު ނައިބު ތުއްތު މަގު / މިމަގުގެ ވަކި ހިސާބެއްގައި ވަނީ ތާރުވެސް އަޅާފައި
ޕީއެސްއެމް ނިއުސްއަށް މަޢުލޫމާތު ދެއްވަމުން މޯލްޑިވްސް ރޯޑް ޑިވަލޮޕްމަންޓް ކޯޕަރޭޝަން، އެމްއާރްޑީސީގެ މެނޭޖިންގ ޑިރެކްޓަރ އިބްރާހީމް ނަޒީމް ވިދާޅުވީ، ފުވައްމުލަކު މަގު ހެދުމުގެ މަސައްކަތް ނުފެށި ލަސްވީ، މަގުގެ ކުރެހުމަށް ބައެއް ކަހަލަ ބަދަލުތަކެއް ގެންނަންޖެހުމާ ގުޅިގެން ކަމަށެވެ. އެހެންނަމަވެސް މިހާރު ކުރެހުން ފައިނަލްވެ މަގު ހެދުމުގެ އަމަލީ މަސައްކަތް ވަނީ ފަށާފައެވެ. ނަޒީމް ވިދާޅުވީ، ނައިބުތުއްތު މަގު ނިމޭ ހިސާބުން ޕޮލިސް ސްޓޭޝަނާ ހަމަޔަށް އޮތް މަގަކީ ގާ އަތުރާފައިވާފައިވާ މަގަކަށްވުމާއެކު، މަގުގައި ހުރި ގާތަށް ނަގާ މަގު ލެވެލް ކުރުމުގެ މަސައްކަތާއި މަގުތަކުގައި ކާބް ސްޓޯން ޖެހުމުގެ މަސައްކަތް މިހާރު ކުރަމުން އަންނަ ކަމަށެވެ.
ފުވައްމުލަކު މަގުތަކުގެ ޙާލަތު މިހާރު ހުރި ގޮތުން ދުއްވާ މީހުންނާއި ހިނގާބިގާވެ އުޅޭ މީހުންނަށް ބޮޑެތި އުނދަގޫތަކާއި ކުރިމަތިވަމުންދާ ކަމަށް އެރަށުގެ ރައްޔިތުން ފާހަގަކުރެއެވެ. މަގުތަކުގައި ފެންބޮޑުވެ ބޮޑެތި ވަޅުގަނޑު ހެދިފައި ހުރުމުގެ ސަބަބުން ދުއްވާ އުޅަނދުތަކަށްވެސް ބޮޑެތި ގެއްލުންތައް ކުރިމަތިވަމުންދާ ކަމަށް އެރަށު ރައްޔިތުން ބުނެއެވެ.
އެމްއާރްޑީސީން ބުނީ، މަގު ހެދުމުގެ މަސައްކަތް އެއްހަރު ދުވަހުގެ ތެރޭގައި ނިންމާލެވޭނެ ކަމަށެވެ. އަދި މިމަސައްކަތަށް ފަސް މިލިޔަން ރުފިޔާ ޚަރަދު ވާނެ ކަމަށް އެމްއާރްޑީސީން ހާމަކުރެއެވެ.