ބަންގްލަދޭޝްގެ ރަށްފުށުގެ ސަރަޙައްދުތަކަށް ތޫފާނެއް އެރުމުގެ ސަބަބުން 21 މީހުން މަރުވެ އެތައް ބަޔަކު ޒަޚަމްވެއްޖެއެވެ.
ބަންގްލަދޭޝްގެ މޫސުމާބެހޭ އިދާރާއިން މަޢުލޫމާތުދިން ގޮތުގައި މި ތޫފާނުގެ ބާރު މިހާރު ދަށްވެފައިވީނަމަވެސް ބައެއް ވަގުތުތަކުގައި ބައެއް ސަރަޙައްދުތަކަށް އަދިވެސް ގަދަ ވަޔާއިއެކު ވިއްސާރަ ކުރަމުންދާނެ ކަމަށެވެ. ބަންގްލަދޭޝްގެ ޑިޒާސްޓަރ މެނޭޖްމަންޓް މިނިސްޓްރީއިން ބުނީ މިހާތަނަށް އެޤައުމުގެ ރަށްފުށުގެ ސަރަޙައްދުތަކުގައި ދިރިއުޅޭ ފައްސަތޭކަ ހާހަށްވުރެ ގިނަ މީހުން ރައްކާތެރި ސަރަޙައްދުތަކަށް ބަދަލްކޮށްފައިވާ ކަމަށެވެ.
ޙާލުގައިޖެހިފައިވާ މީހުން ބޭތިއްބުމަށް 3500 ވަގުތީ ހިޔާ ބަންގްލަދޭޝްގެ ކަމާބެހޭ ފަރާތްތަކުން ވަނީ ހަދާފައެވެ. މިތޫފާނުގެ ސަބަބުން ވެހުނު ވާރޭގައި ފެންބޮޑުވެ، ބިންގަނޑު ކަނޑައިގެން ގޮސް، އަދި ވައިގަދަވުމުގެ ސަބަބުން ބޮޑެތި ގެއްލުންތަކެއް ވަނީ ލިބިފައެވެ.
ތޫފާނުގެ ސަބަބުން މީހުން ބަދަލުކޮށްފައިވާ ސަރަޙައްދުތަކުގެ ތެރޭގައި ފަރުބަދަމަތީ ޗިޓަގޮންގް ސަރަޙައްދުވެސް ހިމެނެއެވެ. މިސަރަޙައްދުގައި ހުންނަ ޗިޓަގޮންގް އެއަރޕޯޓްގެ ދަތުރުތައްވެސް ވަނީ ތޫފާންގެ އަސަރު އެންމެ ބޮޑަށް ކުރަމުންދިޔަ ވަގުތުގައި ކެންސަލްކޮށްފައެވެ. އަދި ބަންގްލަދޭޝްގެ ކަނޑުތަކުގެ ދަތުރުފަތުރާއި ބެހޭ ވުޒާރާއިންވަނީ ކަނޑުމަތީގެ ދަތުރުފަތުރުވެސް ތޫފާނުގެ އަސަރު ދަށްވަންދެން ނުކުރުމަށް އަންގާފައިވެއެވެ.
ބަންގްލަދޭޝްގެ މޫސުމާބެހޭ އިދާރާއިން ބުނީ ކުރިއަށްއޮތް ގަޑިތަކުގައި މޫސުމް ކޮންމެވެސް ވަރަކަށް ރަނގަޅުވާނެ ކަމަށް ލަފާކުރެވޭ ކަމަށާއި މާދަމާއިން ފެށިގެން ދަތުރުފަތުރު ފެށޭނެކަމަށް ބެލެވޭ ކަމަށެވެ.