ޑިވެލޮޕްމަންޓް ބޭންކުގެ ސީއީއޯގެ މަގާމަށް ދެ ބޭފުޅެއްގެ ނަން

މޯލްޑިވްސް ޑިވެލޮޕްމެންޓް ބޭންކުގެ ސީއީއޯގެ މަޤާމަށް ދެ ބޭފުޅެއްގެ ނަން ލިބިފައިވާ ކަމަށް ސަރުކާރުން ހާމަކޮށްފިއެވެ.

ރާއްޖޭގެ ޑިވެލޮޕްމެންޓް ބޭންކް ޤާއިމް ކުރުމަށް ސަރުކާރުން ނިންމަވާފައިވާއިރު، ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން މި ބޭންކު އުފައްދަވާފައިވަނީ މޭމަހުގެ 16 ވަނަ ދުވަހުއެވެ.

ބޭންކެއް ޤާއިމްކުރުމުގެ ބޭނުމަކީ ސަރުކާރުގެ ސިޔާސަތުތަކާއި އެއްގޮތްވާ ގޮތުގެ މަތީން ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި ޢުމްރާނީ ތަރައްޤީއަށް ބޭނުންވާ ފައިސާ ހޯދުމެވެ. އަދި ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރު ކުރުމަކީވެސް މިފަދަ ބޭންކެއް ޤާއިމްކުރުމުގެ އެއް ބޭނުންކަމަށް ސަރުކާރުން ވިދާޅުވެއެވެ.

މި ބޭންކް އޮޕަރޭޓް ކުރުމުގެ ލައިސެންސް ހޯދުމަށް ސަރުކާރުން މިހާރު ހުށަހަޅާފައިވާއިރު، އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސައީދު ވަނީ ބޭންކު އުފައްދަން ބޭނުންވާ ކުންފުނި ރެޖިސްޓަރކޮށް ނިމިފައިވާކަން ހާމަކޮށްފައެވެ. އަދި ބޭންކްގެ ބޯޑަށް ރާއްޖެއިން ބޭރުގެ ފަންނީ ބޮޑެތި ބޭންކްތައް ހިންގާފައި ތިއްބެވި ބޭފުޅުންގެ ތެރެއިން 2 ބޭފުޅުން މިހާރު ނަގާފައިވާކަމަށްވެސް ވަޒީރު ވަނީ ހާމަކުރައްވާފައެވެ.

ބޭންކުގެ މަސައްކަތްތައް ކުރިއަށްދާކަން ހާމަކުރައްވާ މޯލްޑިވްސް އެކައުންޓެންޓް ފޯރަމް ހުޅުވުމުގެ ރަސްމީއްޔާތުގައި ވާހަކަ ދައްކަވަމުން ވަޒީރު ވިދާޅުވީ، ޑިވެލޮޕްމެންޓް ބޭންކުގެ ގަވަނިންގް ބޯޑު އެކުލަވާލުމުގައި ސަރަހައްދުން ލިބޭނެ އެންމެ ފެންވަރު ރަނގަޅު ބޭފުޅުން ހިމަނާފައިވާކަމަށެވެ. އަދި ބައިނަލްއަޤްވާމީ މާލީ ދައިރާގެ ތަޖުރިބާކާރުން ބޯޑުގައި ހިމެނޭކަން ވަޒީރު ފާހަގަކުރެއްވިއެވެ.

ދާދި އަވަހަށް ޑިވެލޮޕްމެންޓް ބޭންކަށް ލައިސެންސް ލިބޭނެކަން ފާހަގަކުރައްވާ ވަޒީރު ވިދާޅުވީ، ބޭންކުގެ ސީއީއޯކަށް ހަމަޖަށްސަން ދެ ބޭފުޅެއްގެ ނަން ލިބިފައިވާ ކަމަށެވެ.

"އަޅުގަނޑުމެން އެނައުންސްކޮށްގެން ބޭރުގެ ރެކްރޫޓްމެންޓް އޭޖެންސީއެއް މެދުވެރިކޮށް ސީއީއޯގެ މަޤާމަށް ދެ ބޭފުޅެއްގެ ނަން ވަނީ ލިބިފައި" ވަޒީރު ވިދާޅުވިއެވެ.

މިވަގުތު ލައިސެންސް ހޯދުމަށް މަރުކަޒީ ބޭންކް އެމްއެމްއޭގައި އެދިފައިވާއިރު، ޑިވެލޮޕްމެންޓް ބޭންކް ހިންގުމަށް ބޭނުންވާ އިމާރާތެއް ހޯދުމުގެ މަސައްކަތް އެކުއެކީގައި ކުރިއަށް ގެންދަވާ ކަމަށް ވަޒީރު ވިދާޅުވިއެވެ. އަދި ކުރިއަށް އޮތް މަދު ހަފްތާތަކެއްގެ ތެރޭގައި ބޭންކް ވުޖޫދު ކުރެވޭނެ ކަމަށް ވަޒީރު ވިދާޅުވިއެވެ.

މިނިވަން ދުވަހުގެ ރަސްމީ ޖަލްސާފައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ ޑިވެލޮޕްމަންޓް ބޭންކަށް ޢައްޔަންކުރައްވާނީ އެކަމުގެ ތަޖުރިބާ، އަދި ދުނިޔޭގެ އެހެން ޤައުމުތަކުގައި މިކަން ކޮށްފައި ތިބި ބޭފުޅުންކަމަށެވެ. ރާއްޖޭގެ ޑިވެލޮޕްމަންޓް ބޭންކް މެދުވެރިކޮށް ވިޔަފާރި ކުރުމުގެ ޔަޤީންކަން، އެ ބޯޑުގައި ތިބި މީހުންނަށް ބަލާލުމުން ލިބޭނެ ފެންވަރުގެ މީހުން އެ ބޭންކުގެ ބޯޑަށް ޢައްޔަންކުރައްވާނެކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ.