ފުލުހެއްގެ ސައިކަލުގައި ރޯކޮށްލި މައްސަލައިގައި 2 މީހަކު ހައްޔަރުކޮށްފި
-
މިމައްސަލައިގައި ހައްޔަރުކޮށްފައިވަނީ 33 އަހަރު ދެ ފިރިހެނުން
-
ސައިކަލުގައި ރޯކޮށްލާފައިވަނީ މިމަހުގެ 1 ވަނަ ދުވަހު
ނ. ހެނބަދޫގައި ފުލުހެއްގެ ސައިކަލުގައި ރޯކޮށްލި މައްސަލާގައި 2 މީހުން ހައްޔަރުކޮށްފިއެވެ.
ހެނބަދޫ ޕޮލިސް ޕޯސްޓުގައި މަސައްކަތް ކުރާ ފުލުހެއްގެ ސައިކަލަށް، މިމަހުގެ އެއްވަނަ ދުވަހު ގެއްލުންދީ ރޯކޮށްލި މައްސަލައިގައި ހައްޔަރުކޮށްފައިވަނީ އުމުރުން 33 އަހަރުގެ 2 ފިރިހެނުންނެވެ.
މި މައްސަލައިގައި ހައްޔަރުކޮށްފައިވަނީ ހެނބަދޫ ސެލްވިޔޯ، އިލްޔާސް އިބްރާހީމާއި އެރަށު ހުދުތަރި، މުޙައްމަދު އިރުޝާދެވެ.
މި ދެ މީހުން ހައްޔަރުކޮށްފައިވަނީ ކޯޓު އަމުރެއްގެ ދަށުން ކަމަށް ފުލުހުން ވިދާޅުވެއެވެ.
މި މައްސަލައިގެ ތަޙްގީގަށް ނ.ހެނބަދޫ އަށް ނިސްބަތްވާ 33 އަހަރުގެ 2 ފިރިހެނުން، ކޯޓުއަމުރެއްގެ ދަށުން، މިއަދުވަނީ ހައްޔަރުކޮށްފައި. https://t.co/eockGH5Ved
— Ahmed Shifan (@Shifan4040) August 4, 2024
މި މައްސަލާގައި ދެ މީހަކު ހައްޔަރުކޮށްފައިވަނީ، ހެނބަދޫ ޕޮލިސް ޕޯސްޓުގައި މަސައްކަތް ކުރާ ފުލުހުންނަށާއި ޢާއިލާ އަދި މުދަލަށް ގެއްލުންދޭނެކަމުގެ އިންޒާރުވެސް ދީފައިވާ ދަނޑިވަޅެއްގައެވެ.
ދެ ފުލުހެއްގެ ސައިކަލުތަކަށް ގެއްލުން ދީފައިވަނީ ނ. އަތޮޅުގައި ފުލުހުން ހިންގަމުންދާ މަސްތުވާތަކެތީގެ އޮޕަރޭޝަނަކާ ދެކޮޅަށް އެކަމުގައި ތުހުމަތު ކުރެވޭ ބަޔަކުކަމަށް ތުހުމަތުކުރެވޭ ކަމަށް ދިވެހި ފުލުހުންގެ ޚިދުމަތުގެ ތަރުޖަމާނު، އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން މީގެކުރިން ވިދާޅުވެފައިވެއެވެ.
މިމައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.