ސްކޭމްތައް ތަޙުޤީޤުކުރާއިރު ކޯޓު ޢަމުރެއްނެތި ފޯނުކޯލުގެ މަޢުލޫމާތު ފުލުހުންނަށް ލިބޭނެގޮތް ހަދަނީ

ސައިބަރ ކްރައިމް މައްސަލަތަކުގެ ތަޙުޤީޤަށް ބޭނުންވާ އަސާސީ މަޢުލޫމާތު ކޯޓު އަމުރަކާ ނުލައި ދިވެހި ފުލުހުންގެ ޚިދުމަތަށް ހޯދޭނެ ގޮތަށް ޖިނާއީ އިޖުރާތުގެ ޤާނޫނަށް އިޞްލާހު ގެނައުމަށް ހުށައަޅައިފިއެވެ. ޕްރޮސިކިޔުޓަރ ޖެނެރަލްގެ އޮފީހުން ވަނީ މި އިސްލާޙުތަކާ ބެހޭގޮތުން ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް މަޢުލޫމާތު ޙިއްސާކުރައްވާފައެވެ.

ރައްޔިތުންގެ މަޖިލީހުގެ ޖުޑީޝަރީ ކޮމިޓީގައި ވާހަކަދައްކަވަމުން ޕްރޮސެކިއުޓަރީ ޖެނެރަލް އޮފީހުގެ ޕަބްލިކް ޕްރޮސެކިޔުޓަރ އަޙްމަދު ނައުފަލް ވިދާޅުވީ، ސައިބަރ ކްރައިމްގެ މައްސަލަތައް ތަޙުޤީޤުކުރާއިރު މުއާސަލާތީ މަޢުލޫމާތު ނުވަތަ ކޮމިއުނިކޭޝަން ޑޭޓާއާއި ސަބްސްކްރައިބަރ މަޢުލޫމާތަކީ ވަރަށް މުހިންމު އެއްޗެއް ކަމަށެވެ.

ކޮމިޔުނިކޭޝަން ޑޭޓާއަކީ މައްސަލާގައި ހިމެނޭ ފަރާތްތަކަށް ފޯނު ކޯލެއް އައިސްފިނަމަ، ގުޅީ ކާކުކަމާއި، ގުޅި ވަގުތާއި، ގުޅައިގެން ހުރި ވަގުތުފަދަ މަޢުލޫމާތެވެ. އަދި ސަބްސްކްރައިބަރ މަޢުލޫމާތުތަކުގެ ތެރޭގައި ހިމެނެނީ ފޯނު ނަންބަރެއް ރަޖިސްޓްރީކޮށްފައި އޮތީ ކާކު ނަމެއްގައިކަމާއި، އެ ނަންބަރާ ގުޅިގެންހުރި އެކި އެކައުންޓުތަކާއި ފޯނު ބިލު ފޮނުވާ އެޑްރެސްފަދަ މަޢުލޫމާތުތަކެވެ.

ނައުފަލް ވިދާޅުވީ މިފަދަ މަޢުލޫމާތުތަކަކީ ތަޙުޤީޤަށް މުހިންމު އެއްޗަކަށްވާއިރު މި މަޢުލޫމާތު ލިބުމުގައި ފުލުހުންނަށް ގިނަ ގޮންޖެހުން އެބަހުރި ކަމަށެވެ. އެގޮތުން މިހާރު ޤާނޫނު އޮންނަ ގޮތުން މިފަދަ މަޢުލޫމާތު ފުލުހުންނަށް ލިބޭނީ ކޯޓު އަމުރެއްގެ ދަށުންކަމަށް ނައުފަލް ވިދާޅުވިއެވެ.

ނައުފަލް ވިދަޅުވީސްކޭމްގެ މައްސަލައެއްނަމަ މިފަދަ މަޢުލޫމާތު ލިބި ފުލުހުން ތަޙުޤީޤު ފެށެނީ ފައިސާ ފޭރިގަނެ ނިމޭ ހިސާބުންކަމަށެވެ.

އެހެންކަމުން ޖިނާއީ އިޖުރާތުގެ ޤާނޫނަށް މިހާރު ގެންނަ އިސްލާޙުގައި ސަބްސްކްރައިބަރ މަޢުލޫމާތު އަދި ކޮމިޔުނިކޭޝަން ޑޭޓާ، ކޯޓު އަމުރަކާ ނުލައި ފުލުހުންނަށް ލިބޭނެގޮތް ހެދުމަށް ހިމަނާފައިވާކަން ނައުފަލް ފާހަގަކުރެއްވިއެވެ. އެގޮތުން ފުލުހުންގެ ވަކި ރޭންކެއްގެ އޮފިސަރުގެ ހުއްދައާއެކު މިފަދަ މަޢުލޫމާތު ފުލުހުންނަށް ނެޓްވަރކް ޚިދުމަތްދޭ ކުންފުނިތަކާއި ބޭންކުތަކުން ފޯރުކޮށްދޭންޖެހޭނެކަމަށް އިސްލާޙުގައި ބަޔާންކޮށްފައިވާކަންވެސް ނައުފަލް ފާހަގަކުރެއްވިއެވެ.

"މިސާލަކަށް ގިނަ އަދަދެއްގެ މީހުން ސްކޭމެއްގައި ބައިވެރިވަންޔާ، ގިނަ ކޯޓު އަމުރުތަކަކަށް ހުށައަޅަންޖެހޭ މަޢުލޫމާތު ހޯދަން. ކޯޓު އަމުރު ހޯދައިގެން އެ އަމަރު ސަރވިސް ޕްރޮވައިޑަރަށް ހިއްސާކޮށް މަޢުލޫމާތު ފުލުހުންނަށް ލިބޭއިރު އެ ސްކޭމެއް ހިންގާ ނިމިފައި މިއޮންނަނީ. މިފަދަ މަޢުލޫމާތު ނުލިބިއްޔާ ތަޙުޤީޤުކު ކުރިއަށް ނުގެންދެވޭނެ." ނައުފަލް ވިދާޅުވިއެވެ.

ފަހަކަށް އައިސް ރާއްޖޭގައި ސައިބަރ ކްރައިމްގެ މައްސަލަތައް ވަނީ ކަންބޮޑުވާ މިންވަރަކަށް އިތުރުވެފައެވެ. އެގޮތުން 2023 ވަނަ އަހަރު 1،661 ސްކޭމް މައްސަލަ ރިޕޯޓުކޮށްފައިވާއިރު 20 މިލިޔަން ރުފިޔާ އެކައުންޓްތަކުން ގެއްލިފައިވާކަމަށް ފުލުހުންގެ ޚިދުމަތުން ހާމަކުރައްވާފައިވެއެވެ. އަދި މިއަހަރުގެ ޖެނުއަރީ މަހުން ފެށިގެން ޖުލައި މަހާ ހަމައަށް 1302 މައްސަލަ ރިޕޯޓުކޮށްފައިވާއިރު 13 މިލިޔަނަށްވުރެ ގިނަ ރުފިޔާ ގެއްލިފައިވާކަމަށްވެސް ފުލުހުން ވިދާޅުވެފައިވެއެވެ.

މީގެ އިތުރުން މިއަހަރުގެ މިހާތަނަށް ސްކޭމްގެ 156 މައްސަލަ ޕީޖީއަށް ހުށަހަޅާފައިވާކަމަށްވެސް ފުލުހުން ވަނީ ވިދާޅުވެފައެވެ.