ގަވާއިދާ ޚިލާފަށް ކާބޯތަކެތީގެ ވިޔަފާރި ކުރަމުން ދިޔަ ބިދޭސީންތަކެއް އިމިގްރޭޝަންގެ ބެލުމުގެ ދަށަށް
-
މިމައްސަލާގައި 4 ބިދޭސީއެއް އިމިގްރޭޝަން ބެލުމުގެ ދަށަށް ގެންދިޔަ
-
މާލޭގެ މިތަނަކީ ކުރީގައި ކެފޭއެއް ހިންގި ތަނެއް
ފުޅާ ދާއިރާއެއްގައި މާލޭގައި ކާބޯތަކެތި ޑެލިވަރކުރުމުގެ ޚިދުމަތް ދެމުން ދިޔަ ބިދޭސީންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ވިދާޅުވީ، މާލޭގައި ފުޅާ ދާއިރާއެއްގައި ކާބޯތަކެތި ތައްޔާރުކޮށް ޚިދުމަތް ދެމުން ދިޔަ މިތަނުގެ މައުލޫމާތު އިމިގްރޭޝަނަށް ލިބިފައިވަނީ "އިމިގްރޭޝަން ވޮޗް" މެދުވެރިކޮށް ކަމަށެވެ. އަދި މި ތަން ބަލާ ފާސްކޮށް، ޤަވާއިދާ ޚިލާފަށް އެތަނުގައި ކާބޯތަކެތީގެ ޑެލިވަރީ ޚިދުމަތް ދެމުން ދިޔަ 4 ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށް އެއިދާރާއިން މައުލޫމާތު ދެއެވެ.
މިތަނަކީ ކުރީގައި ކެފޭއެއް ހިންގި ތަނެއް ކަމަށް އިމިގްރޭޝަނުން ވިދާޅުވިއެވެ. އަދި މިހާރު މިތަން ބޭނުން ކުރަމުންދަނީ ކާބޯތަކެތި ތައްޔާރުކޮށް ޑެލިވަރީގެ ޚިދުމަތް ފުޅާކޮށް ދިނުމަށް ކަމަށްވެސް އިމިގްރޭޝަނުން ވިދާޅުވެއެވެ.
އިމިގްރޭޝަނުން ވަނީ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތަށް ރައްޔިތުން ދެއްވާ އެއްބާރުލުމަށް ޝުކުރުއަދާކޮށްފައެވެ. އަދި އެއިދާރާއަށް ރިޕޯޓް ކުރުމަށް ކަނޑައެޅިފައިވާ އިމިގްރޭޝަން ވޮޗް ނިޒާމުގެ ތެރެއިން ޤަވާދައިދާއި ޚިލާފަށް އުޅެމުންދާ ބިދޭސީންގެ މައްސަލަތައް ރިޕޯޓް ކުރަމުން ދިއުމަށް ވަނީ އެދިފައެވެ.
އިމިގްރޭޝަނުން ވަނީ ދާދިފަހުންވެސް ސާފުތާހިރުކަން ކުޑަކޮށް، ކާބޯތަކެތި ތައްޔާރުކުރަމުން ދިޔަ ތަނެއް ހުޅުމާލޭގައި ބަލާފާސްކޮށްފައެވެ. އެ މައްސަލާގައި 2 ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔައިރު، އިމިގްރޭޝަނުން ވަނީ ސާފުތާހިރުކަމުގެ މިންގަނޑާއި އިޖްތިމާޢީ މިންގަޑަށް ތަން ނުފެތުމުން ކަމާބެހޭ އިދާރާތަކަށް އެކަން އަނގާފައެވެ.