ދެކުނުގަވެސް މަސްވެރިކަން ރަނގަޅުވާން ފަށައިފި، މުޅި ރާއްޖޭގެ މަސްވެރިކަން ރަނގަޅުވުމާ ދިމާއަށް

ދެކުނުގެ މަސްވެރިކަން ރަނގަޅުވެ މުޅި ރާއްޖޭގެ ހުރިހާ ސަރަހައްދަކަށްވެސް އާންމު ގޮތެއްގައި މަސްވެރިކަން ރަނގަޅުވާން ފަށާފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް، މިފްކޯ އިން ވިދާޅުވެއްޖެއެވެ.

މިފްކޯއިން މީގެ ކުރިން އަންދާޒާ ކުރީ ދެކުނުގެ މަސްވެރިކަން އަންނަ ހަފްތާއަށް ރަނގަޅުވާނެ ކަމަށެވެ. ނަމަވެސް މިފްކޯއިން މިއަދު ވިދާޅުވީ ރާއްޖޭގެ ދެކުނުގެ މަސްވެރިކަން ރަނގަޅުވަމުން ކަމަށާއި އައްޑޫގެ މަސްދޯންޏަކުން މިއަދުވެސް އައްޑޫ ފިޝަރީޒް ކޮމްޕްލެކްސްއަށް 25 ޓަނުގެ މަހާއިއެކު ވަދެފައިވާ ކަމަށެވެ.

ރާއްޖޭގެ ދެކުނުގެ މަސްވެރިކަން ރަނގަޅުވަމުންދާއިރު އުތުރާއި މެދުރާއްޖެތެރެއާއި އުތުރުގެ މަސްވެރިކަންވެސް މިހަފްތާތެރޭގައި ރަނގަޅު ކަމަށް މިފްކޯއިން ވަނީ ހާމަކޮށްފައެވެ.އެގޮތުން މިހަފްތާ ފެށިގެން އުތުރާއި މެދުތެރޭގެ އަތޮޅުތަކަށް ވަނީ މަސްވެރިކަން ރަނގަޅު ވެފައެވެ. އަދި މިއާއެކު އެ ސަރަހައްދުތަކުން ކިރާ މަހުގެ ޢަދަދުވެސް އިތުރުވެފައިވާކަމަށް މިފްކޯއިން ވިދާޅުވެއެވެ.

މިފްކޯއިން ވިދާޅުވީ، މިމަހުގެ 4 ވަނަ ދުވަހު 27 ޓަނުގެ މަސް ކިރާފައިވާކަމަށެވެ. އަދި ހޯމަ ދުވަހު އެކަނިވެސް 20 ޓަނުގެ މަސް ކިރާފައިވާކަމަށް މިފްކޯއިން ވިދާޅުވެއެވެ. މިއީ މ. އަތޮޅު ހިމެނޭ ސަރަހައްދުން ކިރާފައިވާ މަހުގެ ޢަދަދެވެ. މަސްވެރިކަން މިހާރު އެންމެ ރަނގަޅީ މ. އަތޮޅު ހިމެނޭ ސަރަހައްދުގައިކަމަށް މިފްކޯއިން ވަނީ ވިދާޅުވެފައެވެ.

މިއާއެކު މިހަފްތާ ތެރޭގައި މުޅި ރާއްޖޭގެ ހުރިހާ ސަރަހައްދަކުންވެސް މަސްވެރިކަން ރަނގަޅުވެފައިވާއިރު ރާއްޖޭގެ އެކި ސަރަހައްދުތަކުން ކިރަމުންދާ މަހުގެ އަދަދުވެސް ދަނީ އިތުރުވަމުންނެވެ.