ފަލަސްޠީނުގެ މައްސަލައިގަ ބައިނަލްއަޤްވާމީ މުޖުތަމައުން ޤާނޫނަށް ޢަމަލުކުރަން ރާއްޖެއިން ބާރުއަޅައިފި

ފަލަސްތީނުގައި ހިންގާ ނަސްލު ނައްތާލުމުގެ އަމަލުތައް ނިމުމަކަށް ގެނެވޭނީ ޤާނޫނުގެ ވެރިކަމަށް އިޙްތިރާމްކޮށް ޤާނޫނީ ވެރިކަމެއް ޤާއިމުކޮށްގެންކަމަށްވާތީ އެކަން ކަށަވަރުކުރުމަށް ބައިނަލްއަޤްވާމީ މުޖުތަމަޢަށް ރާއްޖެއިން ބާރުއަޅައިފިއެވެ.

ރާއްޖެއިން މިކަމަށް ބާރުއަޅާފައިވަނީ ފަލަސްތީނުގެ ބިންތައް ހިފާ ފަލަސްތީނުގެ ރައްޔިތުންނާ ދެކޮޅަށް ޔަހޫދީ އިސްރާއިލުން ދެމުންދާ ހަމަލާތަކާ ގުޅޭގޮތުން ޚާރިޖީ ވަޒީރުންގެ ފެންވަރުގައި ސަޢުދީ އަރަބިއްޔާގެ ޖިއްދާގައި މިއަދު ބޭއްވި އޯއައިސީގެ އެގްޒެކްޓިވް ކޮމިޓީގެ އޯޕަން-އެންޑެޑް އެކްސްޓްރާ އޯޑިނަރީ ބައްދަލުވުމުގައެވެ.

މި ބައްދަލުވުމުގައި ރާއްޖޭގެ ފަރާތުން ބަޔާން އިއްވަވަމުން ޚާރިޖީ ވަޒީރު މޫސާ ޒަމީރު ވަނީ ފަލަސްޠީނު މައްސަލައަށް ހައްލެއް ގެނައުމުގައި ބައިނަލްއަޤްވާމީ މުޖްތަމަޢުގެ ޒިންމާއޮތްކަން ފާހަގަކުރައްވާފައެވެ.

އެ މަނިކުފާނުގެ ތަޤުރީރުގައި ޔަހޫދީ އިސްރާއިލުން މެދުކެނޑުމެއްނެތި ފަލަސްޠީނުގައި ހިންގަމުންދާ "ޖެނޮސައިޑް" ނުވަތަ ނަސްލު ނައްތާލުމުގެ އަމަލުތައް ވަނީ ހަރުކަށި އިބާރާތުން ކުށްވެރިކުރައްވާފައެވެ. ވަކި ޤައުމެއް ނުވަތަ ޤައުމުތަކެއް އިސްތިސްނާ ނުވާނެހެން ބައިނަލްއަޤްވާމީ ޤާނޫނާއި ބައިނަލްއަޤްވާމީ އިންސާނީ ހައްޤުތަކާބެހޭ ޤާނޫނު ތަންފީޒުކުރުމަކީ ބައިނަލްއަޤްވާމީ މުޖުތަމަޢުގެ ޒިންމާއެއްކަމުގައި ވަޒީރު ވިދާޅުވިއެވެ.

އެއާއެކު ފަލަސްތީނުގެ ނަސްލު ނައްތާލަން ކުރާ ހަނގުރާމަ ވަގުތުން ހުއްޓާލައި، ފަލަސްޠީނު ރައްޔިތުންގެ ޒަރޫރީ ބޭނުންތަކަށް ބޭނުންވާ އަސާސީ ޚިދުމަތްތައް އެ ރައްޔިތުންނަށް ފޯރާކަން ކަށަވަރުކުރުމަކީ މި ވަގުތައް އެންމެ މުހިންމުކަންދޭންވީ ކަމެއްް ކަމުގައި ވަޒީރުގެ ތަޤުރީރުގައި ފާހަގަކުރެއްވިއެވެ.

މީގެ އިތުރުން ދިވެހިރާއްޖެއިން އަބަދުވެސް ފަލަސްޠީނުގެ ރައްޔިތުންގެ ޙައްޤުގައި ވަކާލާތުކޮށް، ފަލަސްތީނުގެ މައްސަލައަށް ދާއިމީ ހައްލެއް ހޯދައިދިނުމަށް ދެގޮތެއްނުވެ ފަލަސްތީނާއެކު ތިބޭނެކަމަށް ވިދާޅުވާ ވިދާޅުވުން ވަޒީރު ތަކުރާރު ކުރެއްވިއެވެ. ވަޒީރު ވަނީ ފަލަސްޠީނު މައްސަލައަށް ދެމެހެއްޓެނިވި ޙައްލެއް ހޯދޭނީ 1967ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ، އިރުމަތީ ޤުދުސް ވެރިރަށެއްގެ ގޮތުގައި ކަނޑައެޅިފައިވާ ގޮތަށް ފަލަސްޠީން އިސްރާއީލުގެ އަތްދަށުން މިނިވަންކޮށް، އެއީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ޤައުމަކަށް ހެދުމުގެ މުހިންމުކަން ފާހަގަކުރައްވާފައެވެ.

ދާދި ފަހުން ހަމާސްގެ ސިޔާސީ ގޮފީގެ ވެރިޔާ އަދި އެޤައުމުގެ ކުރީގެ ބޮޑުވަޒީރު، އިސްމާއިލް ހަނިއްޔާ އަވަހާރަކޮށްލައިފައިވާތީ، އެކަން ރާއްޖެއިންވަނީ މި ބައްދަލުވުމުގައިވެސް ކުށްވެރިކުރައްވާފައެވެ.

އޯ.އައި.ސީއަކީ މުސްލިމް އުއްމަތަށް ދިމާވެފައިވާ ތަފާތު މައްސަލަތަކާމެދު ފުޅާ ދާއިރާއެއްގައި މަޝްވަރާކޮށް، މުސްލިމް ޤައުމުތަކުގެ މެދުގައި އޮންނަ ގުޅުން އިތުރަށް ބަދަހި ކުރުމުގެ މަޤްޞަދުގައި 1969 ވަނަ އަހަރު އުފެދުނު ޖަމްޢިއްޔާއެކެވެ. މި ޖަމްޢިއްޔާގައި މުސްލިމުންގެ އާބާދީ އެންމެ ބޮޑެތި ޤައުމުތައް ހިމެނޭހެން ޖުމްލަ 57 ޤައުމު ތަމްސީލްކުރެއެވެ. އޯ.އައި.ސީގެ މެންބަރަކަށް ދިވެހިރާއްޖެއިން ވެފައިވަނީ 26 ޖުލައި 1976 ގައެވެ.