ވިސްނުމަކީ އިންޑިއާގައި އިންވެސްޓްމެންޓް ފޯރަމެއް ބޭއްވުން: ފަތުރުވެރިކަމާ ބެހޭ ވަޒީރު

އިންޑިއާގައި ބޭއްވި"ވެލްކަމް އިންޑިއާ" ރޯޑް ޝޯ ކާމިޔާބު ކަމަށާއި، މިހާރުގެ ވިސްނުންފުޅަކީ އެޤައުމުގެ އިންވެސްޓްމެންޓުތަކެއް ރާއްޖެ ގެނައުމުގެ މަޤްޞަދުގައި އިންވެސްޓް ފޯރަމެއް ބޭއްވުންކަމަށް ފަތުރުވެރިކަމާއިބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ފަތުރުވެރިކަމާއިބެހޭ ވަޒީރު މިހެން ވިދާޅުވީ ވެލްކަމް އިންޑިއާ ރޯޑް ޝޯ ނިންމާލުމަށް ފަހު ރާއްޖެއަށް ވަޑައިގެން އިންޑިއާގައި، ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމަށް ކުރެވުނު މަސައްކަތްތަކުގެ ތަފްސީލް ހާމަކުރުމަށް ބޭއްވި ނޫސްވެރިންގެ ބައްދަލުވުމުގައެވެ.

ފަތުރުވެރިކަމާއި ބެހޭ ވަޒީރު އިސްވެހުންނަވާ އިންޑިއާގެ ބޮޑު 3 ސިޓީއެއްގައި ރޯޑް ޝޯވްތަކެއްވަނީ ބާއްވާފައެވެ. މި ރޯޑް ޝޯވތައް ބާއްވާފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ އާއި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް، މަޓާޓޮ އަދި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް، އެންއެޗްޖީއޭއެމް ގުޅިގެންނެވެ. މި ރޯޑްޝޯތައް ބޭއްވީ 30 ޖުލައިގައި ނިއުދިއްލީގައި، 01 އޯގަސްޓްގައި މުމްބާއީގައި އަދި 03 އޮގަސްޓްގައި ބެންގަލޫރުގައެވެ.

މި ރޯޑް ޝޯ ތަކުގެ އިތުރުން އިންޑިއާގެ ފަތުރުވެރިކަމާއިބެހޭ ވަޒީރާއި އެ ޤައުމުގެ މަދަނީ އުދުހުންތަކާއިބެހޭ ވަޒީރާ، ރާއްޖޭގެ ފަތުރުވެރިކަމާއިބެހޭ ވަޒީރު އިބްރަހީމް ފައިސަލް ވަނީ ބައްދަލުކުރައްވާފައެވެ. މި ބައްދަލުވުންތަކުގައި ރާއްޖޭގެ ފަތުރުވެރިކަމުގެ ސިނާޢާތް ކުރިއަރުވައި ދަށްވެފައިވާ އިންޑިއާގެ އެރައިވަލްސްތައް ކުރިއެރުވުމަށް ދިވެހި ސަރުކާރަށް އެއްބާރުލުން ދޭނެކަމުގެ ޔަޤީންކަން ވަޒީރުން އަރުވާފައިވާކަމަށް ވަޒީރު ފައިސަލް ވިދާޅުވިއެވެ. އަދި މިމަޝްވަރާތަކުގެ އަލީގައި ދިވެހިރާއްޖޭގެ ފަތުރުވެރިކަމުގެ ސިނާޢަތަށް ބޭނުންވާ ކަންކަން ދާދި އަވަހަށް އިންޑިއާގެ ވުޒާރާތަކާއި ހިއްސާ ކުރައްވާނެކަމަށް ވަޒީރު ވިދާޅުވިއެވެ.

ރާއްޖޭގެ ފަތުރުވެރިކަން ކުރިއެރުވުމުގެ އިތުރުން މި ދާއިރާއަށް ބޭނުންވާ އިންވެސްޓްމެންޓުތައް ހޯދުމަށްވެސް އިންޑިއާގައި ބައެއް ފަރާތްތަކާއި މަޝްވަރާތައް ކުރިއަށްދިޔަކަން ވަޒީރު ފާހަގަކުރެއްވިއެވެ. އެގޮތުން ހަނިމާދޫ އެއާޕޯޓާއި، އައްޑޫ އެއާޕޯޓު ނިމެންވާއިރަށް ކަނެކްޓިވިޓީ ހޯދުމާއި އެ ސަރަހައްދުތަކުގެ ފަތުރުވެރިކަމަށް އިންވެސްޓްމެންޓް ހޯދުމަށް މަޝްވަރާކުރެވުނުކަން ވަޒީރު ފާހަގަކުރެއްވިއެވެ.

"އަޅުގަނޑުގެ ވިސްނުމަކީ އަޅުގަނޑުމެންގެ އެތެރޭގެ އަދި އެމްއެމްޕީއާރްސީގެ ލަފަޔާއެކު، ރައީސުލްޖުމްހޫރިއްޔާއާއިވެސް މަޝްވަރާކޮށް އިންޑިއާގައި އިންވެސްޓް ފޯރަމެއް ބޭއްވުން. އޭގެ ތެރޭގައި މި ރޯޑް ޝޯ ވެސް ކުރިއަށްދާނެ. އަޅުގަނޑުމެން ވަރަށް ބޮޑަށް ފޯކަސް ކުރަން ބޭނުން އިންޑިއާ މާކެޓަށް" ވަޒީރު އިބްރާހީމް ފައިސަލް ވިދާޅުވިއެވެ.

އިންޑިއާގައި ކުރެވުނު މަސައްކަތުން މިހާރު މި މާކެޓުގައި އޮތް މާޔޫސްކަން ވަރަށް ބޮޑަށް ފިލައިގެން ގޮސްފައިވާކަމަށް މި ނޫސްވެރިން ބައްދަލުވުމުގައި ވާހަކަ ދައްކަވަމުން އެމްއެމްޕީއާރްސީގެ މެނޭޖިންގް ޑިރެކްޓަރ އިބްރާހީމް ޝިއުރީ ވިދާޅުވިއެވެ. އަދި ކުރިއަށް އޮތްތަނުގައި ލޯ ސީޒަނަށް މިއަށްވުރެ ރަނގަޅަށް ތައްޔާރުވެ، އިންޑިއާ މާކެޓު ރަނގަޅުވެގެންދާނެ ކަމަށް އެމްއެމްޕީއާރްސީން ވަނީ ފާހަގަކޮށްފައެވެ.

ފަތުރުވެރިކަމުގެ ތަފާސް ހިސާބުތައް ދައްކާގޮތުން އިންޑިއާއިން މިއަހަރު މިހާތަނަށް 73000 އަށް ވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. އަދި މިހާތަނަށް 1.2 މިލިއަން ފަތުރުވެރިން ރާއްޖެ ޒިޔާރާތްކޮށްފައިވާއިރު ސަރުކާރުގެ އަމާޒަކީ 2 މިލިއަން ފަތުރުވެރިން ގެނައުމެވެ.